लमजुङको रोचक दृश्यः उम्मेदवार गठबन्धनतिर लागिसके, पार्टी भोट मागिरहेछ

A+ A A-

निर्वाचन आयोगका लागि नरेन्द्रबहादुर गुरुङ लमजुङको एकमात्रै प्रतिनिधिसभा निर्वाचन क्षेत्रमा जनता समाजवादी पार्टी नेपालका उम्मेदवार हुन् । तर, उनले आफ्नो लागि मत मागेका छैनन् ।

जसपाका उम्मेदवार गुरुङ सत्तारुढ गठबन्धनका उम्मेदवार माओवादी केन्द्रका देव गुरुङलाई मत माग्दै हिँडेका छन् । गत १३ कात्तिकमा उनले आफ्नो उम्मेदवारी निष्क्रिय पारेर माओवादी महासचिवसमेत रहेका नेता गुरुङलाई समर्थन गरेका थिए । वर्तमान राष्ट्रिय राजनीतिको अध्ययन गर्दा राष्ट्रियताको पक्षमा अडिग रहने वाम-लोकतान्त्रिक गठबन्धन उम्मेदवारलाई समर्थन गरेको बताउँदै नरेन्द्रले आफ्नो उम्मेदवारी निष्क्रिय बनाएको घोषणा गरेका थिए । त्यसपछि जसपासँग उनको सम्बन्धमा विराम लाग्यो ।

जसपाले भने लमजुङमा प्रतिनिधिसभामा नरेन्द्रका लागि मत माग्दै हिँडिरहेको छ । चुनावी ब्यानरमा पनि नरेन्द्रको तस्वीर छुट्दैन । नेता नरेन्द्र आफूहरूको आधिकारिक उम्मेदवार भएकाले अहिले पनि घरदैलोमा मत मागिरहेको लमजुङका जसपा नेता खेमजंग गुरुङ बताउँछन् । गठबन्धनका दलले अनावश्यक खेल खेलेको उनले आरोप लगाए । ‘नरेन्द्र हाम्रो आधिकारिक उम्मेदवार हो । हामीले उहाँलाई नै भोट मागेका छौँ । केही साथीहरूले उहाँलाई प्रभावमा पार्नुभयो,’ समानुपातिक उम्मेदवार रहेका खेमजंगले शिलापत्रसँग भने ।

जसपाका आधिकारिक उम्मेदवार नरेन्द्रसँग पार्टीले प्रचार गरिरहेको विषयमा कुरा गर्न प्रयास गर्दा सम्पर्क हुन सकेन ।नेपाली कांग्रेस (बीपी) का केन्द्रीय सदस्य लक्ष्मीकान्त पौडेलले पनि पार्टीलाई धोका दिएका छन् । उम्मेदवारी दर्ताको दिन कांग्रेस (बीपी) ले लमजुङको प्रतिनिधिसभा निर्वाचन क्षेत्रमा लक्ष्मीकान्त पौडेल, प्रदेशसभा (क) मा अस्मिता गुरुङ र प्रदेशसभा (ख) मा नवराज बसौलालाई उम्मेदवार बनाएको थियो ।

प्रदेशसभा उम्मेदवार गुरुङ उम्मेदवारी फिर्ताको समय २६ असोजमै पछि हटेकी थिइन् । प्रतिनिधिसभा उम्मेदवार पौडेलले गत १३ कात्तिकमा आफ्नो उम्मेदवारी निष्क्रिय पार्दै सत्तारुढ गठबन्धनलाई समर्थन गरेका थिए । उनले त पार्टीको केन्द्रीय सदस्यबाटै राजीनामा दिएका छन् ।

अहिले कांग्रेस बीपीका प्रदेशसभा (ख) का उम्मेदवार बसौला प्रचारमा एक्लै हिँडेका छन् । उनी आफ्ना लागि मात्रै मत मागिरहेका छन् । ‘उहाँहरू दुवै जना गठबन्धनतिरै लाग्नुभयो,’ बसौलाले भने, ‘राजनीति भनेको विचार जोगाउने कुरा हो । मेरो क्षेत्रमा म उम्मेदवारको हिसाबले आफ्नो राजनीतिक दृष्टिकोण राख्ने, भेटघाट गरिरहेको छु ।’

निर्वाचन आयोगकाअनुसार लमजुङमा नरेन्द्र, लक्ष्मीकान्तसहित प्रतिनिधिसभामा एमालेका पृथ्वीसुब्बा गुरुङ, माओवादीका देव गुरुङ, राप्रपाका बालचन्द्र श्रेष्ठ, नेपाल मजदुर किसान पार्टीका राजेन्द्रप्रसाद प्रजापति, राप्रपा नेपालका टकबहादुर गुरुङ, मंगोल नेसनल अर्गनाइजेसनका विकास गुरुङ, राष्ट्रिय स्वतन्त्र पार्टीका धर्मराज केसी, आमुल परिवर्तन मसिहा पार्टी नेपालका नन्दजंग गुरुङ र स्वतन्त्र उम्मेदवार चन्दन बस्याल चुनावी मैदानमा छन् ।

लमजुङमा एक लाख ३३ हजार ५ सय ५९ मतदाता छन् ।

प्रकाशित मिति: आइतबार, कात्तिक २७, २०७९ १०:३७