दमौलीमा चर्चाः गोविन्दको बढीमा १० हजार मत, अन्तिममा समर्थनको डर

A+ A A-

तनहुँ दमौलीको मालपोत लाइनका चिया पसलमा आजकल बिहानदेखि बेलुकासम्मै राजनीतिक गफगाफ बढ्दा हुन्छन् । नेपाली कांग्रेस, नेकपा एमाले, नेकपा माओवादी केन्द्र र तनहुँको राजनीतिको अर्को धार कांग्रेस पूर्व सहमहामन्त्री गोविन्दराज जोशी समर्थक एकै ठाउँमा भेटिन्छन् । उनीहरू आ-आफ्नै अडानसहित गफ गर्छन् । त्यसबाहेक कतै कांग्रेस, कतै एमालेका समर्थकको छुट्टाछुट्टै समूह चुनावी अंकगणितसहित गफगाफ गरिरहेको भेटिन्छ ।

तनहुँ–१ बाट प्रतिनिधिसभामा कांग्रेस वरिष्ठ नेता रामचन्द्र पौडेल र एमालेका एकबहादुर राना उम्मेदवार छन् । त्योभन्दा पनि यहाँ धेरैको चासो कांग्रेसबाट अनुशासनको कारबाहीमा रहेका नेता जोशीले कति भोट ल्याउलान् भन्ने छ । उनी पनि कैँची चुनाव चिह्न लिएर स्वतन्त्र उम्मेदवार छन् । तनहुँ १ मा १५ जना उम्मेदवार मैदानमा भए पनि मुख्य प्रतिस्पर्धी तीन जना हुन् ।

हामीले बिहीबार साँझ र शुक्रबार बिहान दमौलीका चिया पसलमा कांग्रेसका पूर्वजिल्ला पदाधिकारीसहित कांग्रेस, एमाले र जोशी समर्थकको कुराकानी सुन्यौँ । त्यसमा जोशीले चुनाव जित्नेभन्दा पनि पौडेललाई हराउन मत कति काट्छन् भन्ने धेरैको चासो रहेको देखियो । कांग्रेसका तीन जना समर्थक बिहीबार साँझ एउटा चिया पसलमा गफ गर्दै थिए । कांग्रेसका ती पुराना नेताहरूका अनुसार जोशीले गठबन्धनको १० हजार मत काट्ने छन् ।

एक जना वृद्धले हिसाब गरे, ‘एमालेको २४–२५ हजार मत छ । कांग्रेसको मत ३३–३४ हजार छ । माओवादीको १० हजारभन्दा धेरै छ । अब जोशीले हाम्रो कति काट्लान् ?’ अर्का समर्थकले उत्तर दिए, ‘हाम्रोबाट बढीमा १० हजार होला । तर, त्यहाँभन्दा बढी त हुँदैन । एमालेको पनि अलिअलि काट्लान् ।’

जोशीले १० हजारमात्रै मत काट्दा चुनाव वरिष्ठ नेता पौडेलले जित्ने उनीहरूको अपेक्षा छ । किनकि यसपटक माओवादी पनि गठबन्धनको साथमा हुँदा २०७४ सालजस्तो अवस्था छैन । ‘थोरै भए पनि २५ सय मतान्तरले जित्छौँ,’ कांग्रेस समर्थकले सुनाए ।

वरिष्ठ नेता पौडेलनिकट स्रोतले पनि जोशीले ८ देखि १० हजार मत ल्याउने आफूहरूको अनुमान रहेको सुनायो । अघिल्लो निर्वाचनमा पौडेलले जोशीको उम्मेदवारी खारेज गराएर आफ्नै खुट्टामा बञ्चरो हानेको टिप्पणी तनहुँतिर हुने गरेको छ । त्यतिबेला जोशीलाई चुनाव लड्न दिएको भए उनका समर्थकको मत एमालेलाई जाँदैनथ्यो । जसले गर्दा चुनाव जित्न सहज हुने थियो । राजनीतिबाट टाढा रहँदा शक्ति क्षयीकरण हुँदै गए पनि तनहुँमा जोशी पूर्ण शक्तिहीन भने छैनन् ।

अघिल्लो चुनावमा वरिष्ठ नेता पौडेल तत्कालीन वाम गठबन्धनका उम्मेदवार कृष्णकुमार श्रेष्ठ किसानसँग ६ हजार ४ सय १४ मतान्तरले पराजित भएका थिए । अहिले किसान गठबन्धनकै दल एकीकृत समाजवादीबाट चुनाव लड्न बारा–४ पुगेका छन् ।

गत स्थानीय तहको नतिजा हेर्दा तनहुँ–१ मा सत्तारुढ गठबन्धन एमालेभन्दा २१ हजार मतले अगाडि छ । एमाले समर्थकमा भने चुनाव जित्ने आश निकै कम देखियो । शुक्रबार बिहान दमौलीमा भेटिएका एक जनाले सुनाए, ‘हाम्रो २४–२५ हजार भोट छ । त्यसलाई जोगाउन पाए हुन्छ ।’

तनहुँ क्षेत्र नम्बर १ मा व्यास नगरपालिकाका १४ मध्ये १२ वडा (५ र ६ नम्बर वडाबाहेक), देवघाट, आँबुखैरेनी, बन्दीपुर गाउँपालिका, भानु नगरपालिका पर्छ । गत स्थानीय तहको चुनावमा कांग्रेसबाट वडाध्यक्ष उम्मेदवार रहेकाले ३३ हजार १०६, नेकपा माओवादीले आठ हजार १२४ र एकीकृत समाजवादीले ८९२ मत ल्याएको थियो । यी तीन दलले पाएको मत ४२ हजार १२२ हुन्छ ।

एमालेका वडाध्यक्ष उम्मेदवारले २० हजार ८७९ मत ल्याएका थिए । यसरी सत्तारुढ गठबन्धन र एमालेबीचको मतान्तर झण्डै २१ हजार २ सय ४३ छ । तनहुँ १ मा पर्ने व्यास नगरपालिकामा गत वैशाखको चुनावमा एमालेले जोशीका छोरा दीपकराज जोशीलाई समर्थन गरेको थियो । त्यतिबेला व्यासको १ र २ नम्बर वडामा एमालेका उम्मेदवार थिएनन् । त्यसैले ती वडाको मत जोड्दा एमाले थोरै अगाडि हुन्छ ।

तनहुँ १ मा एक लाख २३ हजार ४ सय ९० मतदाता छन् । तनहुँमा जोशी समूहले एमालेको समर्थन चाहेको थियो । तर, स्थानीय तहमा छोडेका एमालेका जिल्ला नेताहरूले यसपटक त्यो मानेका छैनन् । चुनावको एक-दुई दिनअघिसम्म त्यो सम्भावना रहन्छ । कांग्रेसमा जोशीले आफ्नो उम्मेदवारी निष्क्रिय गराएर एमालेलाई सघाउँछन् कि भन्ने डर छ ।गोविन्दराज जोशीका छोरा दीपक पनि शुक्रबार बिहान मालपोत लाइनकै चिया पसलमा पुगेका थिए । कांग्रेस समर्थकले उनलाई सोधे- एकबहादुर र जोशीमध्ये एक जनाले उम्मेदवारी निष्क्रिय पार्ने सम्भावना पनि होला नि ? दीपकले सटिक जवाफ दिए- सम्भावना हुन सक्छ ।

जोशीले २०७४ सालमा तत्कालीन वाम गठबन्धनका कृष्णकुमार श्रेष्ठलाई समर्थन गरेका थिए । उनकै कारण हारेको भन्दै रिसाएका रामचन्द्र योपटक जितेर देखाउने हुटहुटीबीच ७९ वर्षको उमेरमा पनि प्रचार र भेटघाटमा व्यापक सक्रिय छन् । गठबन्धनले स्थानीय तहमा पाएको मत आफ्नो पक्षमा पार्न सकेमा रामचन्द्रलाई गाह्रो देखिँदैन । स्थानीय तहमा एमालेले जोशीलाई सहयोग गरेकाले यसपटक जोशीले एमालेलाई सहयोग गर्नुपर्ने एमाले नेताहरू बताउँछन् ।

तनहुँमा जोशीको मुख्य उद्देश्य नै रामचन्द्र पौडेललाई हराउने हो । तर, जोशीले एमालेको समर्थन लिएर चुनाव जितिहाले भने पनि विचाराधीन मुद्दाले गर्दा संसद छिर्न पाउँदैनन् । जसले गर्दा रामचन्द्रलाई हराउन उनलाई पनि एमालेलाई समर्थन गर्नु फाइदा हुने देखिन्छ ।

जोशीले अन्तिमसम्म आफ्नो उम्मेदवार निष्क्रिय पारेर एकबहादुरलाई समर्थन गर्ने सम्भावना छ । यस्तो भएर एमाले, जोशी समूहको मत र गठबन्धनका असन्तुष्ट मत सूर्य चिह्नमा खस्दा रामचन्द्रलाई अप्ठ्यारो पर्न सक्छ । आँबुखैरेनी क्षेत्रबाट माओवादीले वरिष्ठ नेता पौडेललाई सहयोग नगर्ने डर कांग्रेसीमा छ ।

प्रकाशित मिति: शुक्रबार, कात्तिक २५, २०७९ २०:२६