अब्दुसको चुनावी प्रचारः प्रचण्डकै कुरा, अंग्रेजीले झमेला

A+ A A-

गोरखा-२ मा माओवादी केन्द्रका अध्यक्ष पुष्पकमल दाहाल प्रचण्ड लड्ने पक्का भइसकेपछि एमालेले नवप्रवेशी अब्दुस सलाम मियाँलाई उम्मेदवार बनायो । अब्दुस लड्ने भएपछि धेरैको टिप्पणी रह्यो- डमी उम्मेदवार ।

वैकल्पिक राजनीतिक शक्ति स्थापना भन्दै पछिल्लो पाँच वर्ष साझा पार्टीमा बिताएका २९ वर्षीय अब्दुस गत ६ असोजमा एमाले प्रवेश गरेका थिए । एमाले प्रवेश गरेलगत्तै उनले चुनाव लड्ने टिकट पाएका हुन् । अब्दुसलाई चुनावबारे सिक्न, मतदातासँग साक्षात्कार गर्न यो राम्रो अवसर बनेको छ । तर, संगठनात्मक हिसाबले एमाले निकै कमजोर रहेको जिल्लामा जित निकाल्न अब्दुसलाई सहज भने छैन । उनले प्रचण्डलाई हराउने अभिलाषासहित पछिल्लो एक हप्ता निरन्तर मतदाता भेटघाटलाई समय दिएका छन् ।

एक हप्ता निरन्तर सभा, मतदाता भेटघाटमा खर्चिएका अब्दुस अहिले केही दिनलाई काठमाडौं पुगेका छन् । सम्भवतः अब चुनावअघि दुई-चार दिन उनी गोरखा डुल्ने छन् । घरदैलो कम, एमालेले गोरखामा सामान्य सभा बढी गरिरहेको थियो । सभामा अब्दुसको सम्बोधन १० देखि १५ मिनेटको हुन्छ । प्रचण्डबारे टिप्पणी गर्नमै उनले आफ्नो सम्बोधनको अधिकांश समय खर्चिन्छन् ।

आफ्नो सम्बोधनमा अब्दुसले मुख्यतः तीनवटा कुरा उठाउँछन् ।

पहिलो- ठूला पार्टीमध्ये एमालेले देशभर उठाएकोमध्ये सबैभन्दा कान्छो उम्मेदवार म हुँ । अघिल्लो संसदको ढोका खोलेर हेर्दा औँलामा गन्न सकिने युवा पुगेका थिए । त्यो कारण युवाका मुद्दा समेटिन सकेनन् । गोरखाले सबैभन्दा कम उमेरको सांसद बनाएर पठाउने अवसर पाएको छ ।

दोस्रो- म गोरखामा जन्मेको हुर्केको, यहीँको पानी खाएको मान्छे हुँ । गोरखाको नाम संसारमा फैलिँदा तपाईंको छाती जति चौडा हुन्छ मेरो पनि त्यति नै हुन्छ ।

र, तेस्रो- उनले नछुटाउने भनेको प्रचण्डको उछितो काट्न हो । उनी हरेक सम्बोधनमा दोर्‍याउँछन्- प्रचण्डजी गोरखामा जन्मिनुभएको होइन । उहाँले पहिला जितेका ठाउँमा पनि कायापलट भएको छैन । गोरखामा पनि केही गर्नुहुन्न ।

अब्दुस गोरखाको सिरानचोक गाउँपालिकामा जन्मिएका हुन् । प्रचण्ड कास्कीको ढिकुरपोखरीमा जन्मिएर ठाउँठाउँबाट चुनाव लडे । पहिलोपटक चुनाव लड्न लागेका अब्दुस प्रचण्डका कमजोरी, गोरखा आगमनबारे कुरा गरिरहन्छन् ।

प्रतिस्पर्धी प्रचण्ड आफ्ना सम्बोधनमा कहिल्यै अब्दुसको कुरा नै गर्दैनन् । अब्दुस आफ्ना कुनै सम्बोधनमा प्रचण्डको नाम छुटाउँदैनन् । कतिसम्म भने पछिल्लोपटक गोरखा पुग्दा १८ कात्तिकमा प्रचण्डले आफ्नो प्रतिस्पर्धी नै नचिनेको भनेर अब्दुसलाई ‘अन्डरस्टिमेट’ गरेका थिए । अब्दुसलाई त्यो सहन सकेन । प्रचण्डले त्यसो भनेको उनले थाहा पाइसकेका थिए ।

१८ कात्तिक राति उनी २०७२ सालको भूकम्पको केन्द्रबिन्दु बारपाक पुगेका थिए । १९ कात्तिकको बिहानै उनले त्यहाँ एउटा सभामा बोल्दै प्रचण्डलाई जवाफ फर्काइहाले- गाउँको जो कोहीलाई सोध्नुस् भनिदिनुहुन्छ र जिताएर अब्दुस तपाईंको प्रतिस्पर्धी हो भन्ने देखाउनुहुन्छ । गाडीबाट झरेर प्रतिस्पर्धी सोध्नुस् । तपाईंलाई मेरो चुनौती छ ।

अब्दुसले आफ्ना एजेण्डा सुनाउने काम कम, आलोचना बढी गरेर समय खर्चिरहेका छन् । प्रचण्डलाई कमजोर देखाउन अब्दुस पनि पछि परेका छैनन् । उनी प्रचण्डको विगतबारे कुरा गरिरहन्छन् । अब्दुस आफू युवा भएको दोर्‍याउँछन् । तर, गोरखाको लागि के काम गर्छु त्यो भन्न सकिरहेका छैनन् । चुनाव आउन ११ दिन बाँकी हुँदा पनि उनले आफ्नो घोषणापत्र सार्वजनिक गर्न सकेका छैनन् ।

अब्दुस काठमाडौं ६ मा स्वतन्त्र उम्मेदवारी दिने तयारीमा थिए । पूर्वआइजीपी सर्वेन्द्र खनालसँगै एमाले प्रवेश गरेका अब्दुस अहिले धुलाम्मे गोरखाका गाउँगाउँमा आफूलाई चिनाउन कस्सिएका छन् । स्थानीय तहको चुनावलाई आधार मान्ने हो भने गोरखा जिल्लाभर एमालेका जति मतदाता छन् त्यति प्रचण्ड र अब्दुस लड्न लागेको ठाउँमा माओवादीको छ । एउटा उदाहरण होरौँः गोरखामा दुई वटा निर्वाचन क्षेत्र छन् । ९४ वडा रहेको गोरखामा गोरखा १ निर्वाचन क्षेत्रमा ५६ र गोरखा २ मा ३८ वडा पर्छन् । ती दुवै निर्वाचन क्षेत्रका वडामा अर्थात् जिल्लाभर एमालेले गत स्थानीय तहमा २२ हजार ४६१ मत पाएको थियो । जबकि माओवादी एक्लैले गोरखा २ मा मात्रै २२ हजार ६४० मत ल्याएको थियो ।

गोरखामा दुई पार्टी जो मिल्छ उसैले चुनाव जित्छ । गोरखा २ मा तत्कालीन नयाँ शक्ति पार्टी र कांग्रेसले तालमेल गरेका थिए । प्रतिनिधिसभामा तत्कालीन नयाँ शक्तिका अध्यक्ष डा. बाबुराम भट्टराईले चुनाव जिते भने प्रदेश सभामा नयाँ शक्तिकै हरिशरण आचार्य र कांग्रेसका प्रकाशचन्द्र दवाडीले चुनाव जिते । यो निर्वाचन क्षेत्रमा डा. भट्टराईको प्रभाव अझै पनि छ । यसपटक यो क्षेत्रमा गोरखाका ठूला शक्ति माओवादी पनि कांग्रेसकै साथमै रहेकाले अब्दुसलाई चुनाव जित्नु निकै गाह्रो पर्ने देखिन्छ ।

अब्दुस कमजोर संगठनकै बलमा चुनावी मैदानमा उत्रिएका छन् । संगठन कमजोर भए पनि भित्रबाट आफू कमजोर नभएको उनी बताउँछन् । ‘हाम्रो संगठन त्यति बलियो छैन भन्ने थाहा छँदै छ । तर, गोखराबाट कसलाई जिताउने भन्ने गोरखाली मतदाताको कुरा हो,’ उनले हालैको एउटा सम्बोधनमा भनेका थिए, ‘गोरखालीले मतदान गर्ने भएकाले म भित्रबाट त्यति कमजोर छैन किनकि मेरो प्रतिस्पर्धा कुनै गोरखालीसँग छैन ।’

सम्बोधनको अंग्रेजीले झमेला

अब्दुस सिरानचोक गाउँपालिका-३, हर्मी बयापानीमा जन्मिएका हुन् । त्यहाँको मदरासामा प्रारम्भिक शिक्षा पढेका उनी बाल्यकालमै परिवारसँगै काठमाडौँ गएका थिए ।

काठमाडौं गएपछि पनि उनले आठ महिना मदरासामा मुस्लिम समुदायसँग सम्बन्धित शिक्षा लिइरहेका थिए । पछि उनले निजी विद्यालयसँग जोडिए । त्यहीँबाट उनी अंग्रेजीसँग नजिक भए । पढ्न विदेश पुगे, त्यहाँ अंग्रेजी कहिल्यै टुटेन । विभिन्न गैरसरकारी संस्थामा काम गर्दा पनि उनको सामिप्यता अंग्रेजी भाषासँगै रह्यो । त्यसको प्रभाव अहिले उनको चुनावी प्रचारमा पनि देखिन्छ । निकै सामान्य र दिनानुदिन प्रयोग हुने नेपाली शब्द पनि उनी अंग्रेजीमै भनिरहेका हुन्छन् ।

११ पालिका रहेको गोरखामा दुई नगरपालिका छन् । अब्दुसको निर्वाचन क्षेत्रमा गोरखा नगरपालिकाको सातवटा वडा र पालुङटार नगरपालिका पर्छन् । बाँकी तीन गाउँपालिका छन् । पहाडी भेग भएकाले उनको नर्वाचन क्षेत्रमा प्रायः ग्रामीण बस्ती छ । उनको सम्बोधन सुन्नेहरू पनि अधिकांश युवा उमेर कटेका हुन्छन् । तर, त्यो भिडमा पनि सम्बोधनलाई अंग्रेजी शब्दबाट टाढा राख्न सकेका छैनन् ।

उनी चुनावी सम्बोधनमा बारम्बार प्रयोग हुने अवसरलाई ‘अपरचुनिटी’, समुदायलाई ‘कम्युनिटी’, अवस्थालाई ‘कन्डिसन’ भनिरहेका हुन्छन् । जबकि यी शब्द राजनीतिक सम्बोधनमात्रै होइन, दैनिकजसो पनि बारम्बार प्रयोग भइरहन्छन् । उनी आफैँले पनि यो विषय मेसो पाएका रहेछन् ।

गोरखाको छेबेटारमा उनको सम्बोधन सुनेपछि हामीले अब्दुसलाई सोधेका थियौँ- अंग्रेजी टोन आफैँलाई समस्या लाग्दैन ? उनले सहजै आफूमा त्यो समस्या रहेको स्वीकारे । यसको कारणबारे अब्दुसले भने, ‘बोल्दाबोल्दै नेपाली शब्द ठ्याक्कै आउँदैन । अनि अंग्रेजी आउँछ । म सानैबाट अंग्रेजी भाषा आसपास भएँ । विदेशमा पढ्दा पनि संगत त्यस्तै भयो । तर, पहिलेभन्दा सुधार भएको छ । अझै गर्नुपर्ने छ ।’

यी पनि :

प्रचण्डले गोरखाबाट विध्वंश मच्याउनुभयो, चुनाव हराएर न्याय गर्नुपर्छः अब्दुस मियाँ (अन्तर्वार्ता)

अब्दुस–टिकादत्त भेटः ‘प्रचण्डले गोरखालीलाई भेडा सम्झिए, मिलेर हराऔँ’

म २५ वर्ष गोरखाबाटै राजनीति गर्छु, प्रचण्डले फेरि अर्को सुरक्षित ठाउँ खोज्छन् : अब्दुस मियाँ

को हुन् गोरखा २ मा प्रचण्डलाई चुनौती दिने २८ वर्षीय अब्दुस मियाँ ?

प्रकाशित मिति: बुधबार, कात्तिक २३, २०७९ १७:३९