गोरखामा ढुक्क प्रचण्ड : प्रचारलाई १० दिन, ८५ प्रतिशत मतको आस

A+ A A-

नेकपा माओवादी केन्द्रका अध्यक्ष पुष्पकमल दाहाल प्रचण्ड गोरखा २ बाट उम्मेदवार भए पनि यहाँ धेरै समय बिताएका छैनन् । मनोनयन दर्तापछि तीनपटक गोरखा आउजाउ गरेका उनले गोरखामा आफ्नो निर्वाचन क्षेत्रमा पर्ने सबै पालिकामा एकपटक पुगिसकेका छन् ।

मनोनयन दर्ता गराएको एक महिनामा उनले पाँच दिन गोरखामा बिताएका छन् । गोरखाबाहिर रहेका मतदातासँगको भेटघाट काठमाडौं, चितवन, पोखरातिर पनि चलेको छ । गोरखा २ मा गोरखा नगरपालिकाको ८ देखि १४ नम्बर वडा, पालुङटार नगरपालिका, सिरानचोक गाउँपालिका, अजिरकोट गाउँपालिका र बारपाक सुलिकोट गाउँपालिका पर्छन् ।

गोरखा २ मा ३८ वडा छन् जहाँ मतदाताको संख्या १ लाख ६ हजार २४० छ । माओवादी नेताहरूका अनुसार यो निर्वाचन क्षेत्रका ३८ वडामध्ये प्रचण्ड अब १० देखि १५ वटा जति वडामा पुग्न बाँकी छ । अब २८ कात्तिकमा गोरखा आउँदा प्रचण्ड बाँकी रहेका वडामा पुग्नेछन् ।

प्रचण्ड गोरखा आउँदा एक ठाउँमा ५ देखि १५ मिनेटसम्म समय बिताउने गरी सेड्युलमा दौडधुप गरिरहेका छन् । ‘निर्वाचन क्षेत्रमा पर्ने सबै वडा कभर गर्नुभयो । अब आउँदा वडाभित्रका गाउँमा जाने योजना छ,’ माओवादी नेता लेखबहादुर थापामगरले शिलापत्रसँग भने, ‘७० प्रतिशत निर्वाचन क्षेत्र तीन दिन आउँदा नै कभर गरिसक्नुभयो ।’

प्रचण्ड पछिल्लोपटक १८ कात्तिकमा गोरखा आएका थिए । एकैदिन उनी पाँचवटा कार्यक्रममा सहभागी भएर फर्किएका थिए । त्यसअघि १२ कात्तिकमा प्रचण्ड गोरखामा मतदाता भेट्न आएका थिए । १२ कात्तिकमा बास बस्ने गरी गोरखा आएका थिए । मनोनयन दर्तापछि २८ असोजमा पहिलोपटक प्रचण्ड गोरखा आएका थिए । यसरी अहिलेसम्म तीनपटक गोरखा आएका प्रचण्डले पाँच दिन यहाँ बिताएका छन् । उनी आफ्नोमात्रै नभई गोरखा १ मा पनि पुगिरहेका छन् ।

अब चुनावअघिका चार दिन प्रचण्डले गोरखामा बिताउनेछन् । त्यसमा प्रचण्डलाई गोरखामा उनी लडिरहेको र गोरखा १ का गाउँगाउँ पुर्‍याउने तयारी छ । अब गोरखा आउँदा प्रचण्ड भूकम्पको केन्द्रबिन्दु बारपाक जानेछन् । यसरी हेर्दा गोरखामा उनले १० दिन चुनाव प्रचारमा खर्चिने देखिन्छ । १२ कात्तिकमा उनी एकैदिन चारवटा पालिकाका ठाउँठाउँ डुलेका थिए । त्यो दिन आरुघाट गाउँपालिका, त्यसपछि भीमसेन थापा गाउँपालिकाको घ्याम्पेसाल, बारपाक सुलिकोट गाउँपालिका र अजिरकोट गाउँपालिकासम्म पुगेका थिए । त्यो दिन अजिरकोटको भच्चेकमा बास बसेका प्रचण्डले भोलिपल्ट १३ कात्तिकमा गोरखा २ का १० वडामा पुगेका थिए ।

१३ कात्तिकमा सिरानचोक गाउँपालिकाको वडा नम्बर १, २, ४, ५ का मतदातासँग भेटघाट गरेका थिए । त्यसपछि पालुङटार नगरपालिकाको १, १०, ९, ६, ७, ८ पुगे । प्रचण्डसँगै पूर्वप्रधानमन्त्री डा. बाबुराम भट्टराई पनि साथसाथै छन् । १३ कात्तिकमा प्रचण्ड बाबुरामको गाउँ पालुङटार–१, खोप्लाङ गएका थिए । गोरखामा प्रचण्ड सबै ठाउँमा एकपटक पुग्ने तर धेरै समय नबिताउने गरी मतदाता भेटिरहेका छन् ।

कम्तीमा ८५ प्रतिशत मतको अपेक्षा

माओवादीको आफ्नै जनाधार राम्रो भएको त्यहीँमाथि कांग्रेस पनि साथमा हुँदा प्रचण्ड चुनाव जित्नेमा ढुक्क छन् । उनी कसरी हुन्छ मतान्तर बढी बनाएर रेकर्ड कायम राख्न चाहन्छन् । गोरखा संग्रहालयमा गत १८ कात्तिकमा पत्रकारसँग कुरा गर्दै प्रचण्डले धेरैभन्दा धेरै मत ल्याउने गरी लाग्ने बताएका थिए ।

गठबन्धनविरुद्ध चुनाव लडिरहेको नेकपा (एमाले)ले माओवादीको पकड क्षेत्र गोरखामा अब्दुस मियाँलाई उम्मेदवार बनाएको छ । पहिलोपटक चुनाव लड्न लागेका अब्दुस प्रचण्डका अगाडि कमजोर प्रतिस्पर्धी रहेकाे माओवादीहरू बताउँछन् । यही कारण गोरखामा प्रचण्डले चुनाव जित्ने मात्रै होइन, नतिजामा रेकर्ड कायम हुने दाबी गरिरहेका छन् ।

कतिसम्म भने प्रचण्डले आफूले प्रतिस्पर्धी उम्मेदवार नै नचिनेको भन्न भ्याएका थिए । ‘प्रतिस्पर्धी नै पत्ता लगाउन सकेको छैन । मैले चिनेको पनि छैन । देखेको पनि छैन,’ उनले पत्रकारसँग भनेका थिए, ‘यहाँको परिणामलाई अझै उचाइमा कसरी लैजाने भन्नेमा यहाँका जनता, बुद्धिजीवी रहेको पाएको छु ।’

गोरखा २ मा आगामी ४ मंसिरमा कुल खस्नेमध्ये कम्तीमा ८५ प्रतिशत मत अध्यक्ष प्रचण्डलाई आउने अपेक्षा गोरखाका माओवादीहरूको छ । ‘उहाँलाई एमाले उम्मेदवारको चासो, चिन्ता छैन,’ नेता थापामगरले थपे, ‘जित्नेमा दुई मत छैन । मात्र कति मतले जित्ने भन्ने कुरा हो । खसेकोमध्ये ९० प्रतिशत मत हाम्रो पक्षमा छ । ८५ घट्दैन ।’

कुल मतदातामध्ये ७० प्रतिशत मत खस्ने माओवादीको आन्तरिक अनुमान छ । त्यसो हुँदा ७४ हजार मत खस्छ । त्यसमा ६३ हजार मत अध्यक्ष प्रचण्डले पाउने नेता मगर दाबी गर्छन् । गोरखामा प्रचण्डले प्रचारमा त्यति समय नखर्चनुको कारण गठबन्धन र माओवादीको संगठन हो । प्रदेशसभाका उम्मेदवार गाउँगाउँ पुगिरहेका छन् र उनीहरूले नै प्रचण्डको प्रचार गरिरहेका छन् ।

स्थानीय तहको नतिजा हेर्दा माओवादी गोरखाको पहिलो शक्ति हो । गोरखा २ का वडाध्यक्षको मत हिसाब गर्दा ३८ वडामा माओवादीले २२ हजार ६४० मत पाएको थियो । कांग्रेसले २० हजार ८५१, एमालेले ७ हजार ८४८ र जसपाले ७ हजार १०९ मत पाएका थिए । स्थानीय तहमा गठबन्धन हुँदा माओवादी–कांग्रेसका सबै ठाउँमा उम्मेदवार थिएनन् । त्यसले गर्दा यी दुई पार्टीको मत अझ बढी हुन सक्छ । गोरखामा एमाले तेस्रो शक्ति हो ।

प्रकाशित मिति: मंगलबार, कात्तिक २२, २०७९ ०७:०८