...अनि डिल्लीरामले भने, ‘श्री ५ सरकारले आएर भने पनि प्रचण्डलाई भोट दिन्नँ’ (भिडियो)

...अनि डिल्लीरामले भने, ‘श्री ५ सरकारले आएर भने पनि प्रचण्डलाई भोट दिन्नँ’ (भिडियो)

डिल्लीराम लामिछाने ।

A+ A A-

देशका सबै शीर्ष नेताप्रति कट्टर कार्यकर्ताबाहेक आम जनताको व्यापक असन्तुष्टि छ । त्यसैको उपज ‘नो, नट अगेन’ अहिले चर्चामा छ । यो अभियानबारे नसुनेका, थाहा नपाएका कतिपय मतदाता पनि अब एमाले अध्यक्ष केपी ओली, कांग्रेस सभापति शेरबहादुर देउवा, माओवादी अध्यक्ष पुष्पकमल दाहाल प्रचण्डलगायत नेतालाई मत नदिने पक्षमा देखिन्छन् ।

राष्ट्रिय राजनीतिका खेलाडी प्रचण्डले यो चुनावमा आफ्नो पछिल्लो निर्वाचन क्षेत्र चितवन ३ छोडेर गोरखा २ उक्लिएका छन् । माओवादीको बलियो संगठन भएको, स्थानीय तहको जनाधारले पार्टी बलियो रहेको र जित्ने निश्चित भएकाले प्रचण्ड गोरखा आएको टिप्पणी भइरहेको छ ।

गोखरा २ मा प्रचण्डसँग नेकपा एमालेका २९ वर्षीय अब्दुस मियाँ चुनावी मैदानमा छन् । मियाँ चुनाव प्रचारअन्तर्गत शुक्रबार बिहान गोरखा नगरपालिका-१०, छेबेटार पुगेका थिए । त्यहाँ उनले सभा गरेको ठाउँ आसपासका मतदातासँग सामान्य चिनजान गर्दै मत मागिरहेका थिए ।

feature photo dilliram lammichhane abdus miya ghardailo1667561471.jpg

मियाँको चुनावी सम्बोधन, मतदाताको प्रतिक्रियाबारे बुझ्न हामी उनलाई पछ्याइरहेका थियौँ । उनी स्थानीय डिल्लीराम लामिछानेको घर पुगे । लामिछाने घाम ताप्दै आँगनमै बसेका थिए । उनीसँगै छिमेकी लक्ष्मीराम सुनार गफिँदै थिए ।
अब्दुसले मत मागेपछि लक्ष्मीरामले ढाडस दिँदै भने– ढुक्क रहनुस्, दायाँबायाँ सोच्नु पर्दैन ।

त्यसपछि अब्दुस डिल्लीरामको अघि उभिए, उनीसँग पनि मत मागे । त्यत्तिकैमा प्रचारमा हिँडेका एमाले कार्यकर्ताले डिल्लीसँग भने, ‘धेरै कुरा किन गर्ने, युवालाई दिने भए उहाँलाई दिनुस् । प्रचण्डलाई दिने भए उनले यहाँभन्दा अगाडि के गरेर त्यो हेरेर दिने हो ।’

डिल्लीराम एकैछिन रोकिए । प्रचण्डप्रति उनको साह्रो असन्तुष्टि रहेको जवाफले प्रष्ट पार्‍यो । ‘श्री ५ सरकार आएर प्रचण्डलाई दिनुपर्छ भने पनि दिनेवाला छैन । तपाईंहरू प्रचण्डकै पार्टीको हो भने यहाँ आउनै पर्दैन म दिन्नँ,’ डिल्लीरामले फेरि दोर्‍याए, ‘प्रचण्डलाई दिँदै दिन्नँ ।’

उनले प्रचण्डलाई मत नदिने तर आफूलाई ठीक लागेको उम्मेदवार चुन्ने सुनाए । त्यसपछि एमालेको प्रचार टोली आफूहरूले मत पाउने आश गर्दै त्यहाँबाट निस्कियो । डिल्लीरामको त्यो आक्रोश सुनेपछि हामीले उनीसँग थप कुरा गर्न खोजेका थियौँ । तर, उनले कुराकानी गर्न गरिएको प्रस्ताव स्वीकारेनन् । डिल्लीरामका छिमेकीले शिलापत्रलाई बताएअनुसार उनको पृष्ठभूमि माओवादी निकट नै हो । तर, पछिल्लो समय कतै खुलेर लागेका छैनन् र कांग्रेसको नजिक छन् ।

abdus miya ghardailo1667564322.jpg

घरदैलोमा निस्केको एमालेको टोलीलाई वृद्धभत्ता पाउनेले पनि मत दिने वाचा गरेर पठाए । छेबेटारकै ६९ वर्षीय शिवमाया गुरुङले भनिन्, ‘बुढाबुढीलाई सेवा गर्ने पार्टी हो । एमालेलाई दिनुपर्ला ।’ अब्दुस आफू भिजन बोकेको युवा भएकाले आफूलाई मत दिन आग्रह गर्दै चुनावी प्रचारमा छन् । उनले प्रचण्ड गोरखाको नेता नभएको विषय पनि प्रमुखताका साथ उठाइरहेका छन् ।

सम्बन्धित समाचार

प्रचण्डले आफ्नो प्रतिस्पर्धी देखेकाे छैन भनेपछि गुञ्जियो हाँसो (भिडियो)

चुनावी घरदैलोमा मत पाउने आश्वासन पाएका अब्दुसको नतिजा भने मंसिर ४ को मतदान सकिएपछि हुनेछ । प्रचण्डलाई हराउनु गोरखामा उनलाई फलामको चिउरा चपाएसरह छ । किनकि स्थानीय तहको नतिजा हेर्दा गठबन्धन एमालेभन्दा ४५ हजार हाराहारी मतले अगाडि छ ।

गोरखा २ मा एक लाख ५ हजार २ सय ४० जना मतदाता छन् । गोरखाको क्षेत्र नम्बर २ मा पालुङटार नगरपालिका, सिरानचोक गाउँपालिका, अजिरकोट गाउँपालिका, सुलीकोट गाउँपालिका र गोरखा नगरपालिकाको वडा नम्बर ८, ९, १०, ११, १२, १३ र १४ नम्बर वडा पर्छन् ।

प्रकाशित मिति: शुक्रबार, कात्तिक १८, २०७९ १८:३१