विद्यासुन्दरसँग काम गरिसकेका वडाध्यक्षहरू यसपटक 'बालेन शैली'बारे के भन्छन् ?

काठमाडौँ महानगरपालिकामा बालेन्द्र (बालेन) शाह निर्वाचित भएपछि महानगरपालिकामा भएका कार्यपालिकाका तीनवटा बैठकको प्रत्यक्ष प्रसारण गरियो । स्वतन्त्रबाट निर्वाचित भएका बालेनले आफ्नो चुनावी घोषणापत्रमा नगरसभाको बैठक प्रत्यक्ष प्रसारण गरिने कुरा पनि समावेश गरेका थिए । सोहीअनुरुप शाहले पहिलो बैठकबाटै प्रत्यक्ष प्रसारण सुरु गरे ।

बैठकको लाइभ प्रसारण गर्दा खुलेर बहस गर्न बाधा पुग्ने भन्ने खालका धारणा बाहिर पनि आए । लाइभ गरिँदा सबैको योजना प्रस्ट रूपमा जनताले सुन्न पाउने भन्ने तर्क पनि सुनिए । बैठक लाइभ भएकाले सबै काम पारदर्शी हुने र काम गराइमा पनि पहिलाको भन्दा फरक नतिजा देखिने आकलन भइरहेका छन् । त्यसमाथि स्वतन्त्रबाट जितेर आएका जनप्रतिनिधिबाट महानगरमा धेरैले सकारात्मक आस पनि गरेको देखिन्छ ।

दुवैपटक वडाध्यक्ष जितेका प्रतिनिधि कार्यपालिका लाइभप्रति सकारात्मक सुनिए । काठमाडौँ महानगरपालिका– १७ का वडाध्यक्ष नवीन मानन्धरको यो दोस्रो कार्यकाल हो । उनी पनि बैठकको प्रत्यक्ष प्रसारण गर्ने कुरामा सहमत छन् । बैठक लाइभ गर्दाका धेरै फाइदा हुने उनी देख्छन् । त्यस्तै, महानगरमा बालेन शाहको भूमिकालाई लिएर पनि उनी आशावादी नै सुनिए ।

पहिलाको तुलनामा तात्त्विक फरक नपाएको मानन्धरले बताए । उनका अनुसार बैठक लाइभ हुँदा वा नहुँदा, छलफलको विषय उस्तै प्रकृतिका हुन्छन् । प्रत्यक्ष प्रसारण नगर्दा पनि यसैगरी बैठक सञ्चालन हुन्थ्यो । यद्यपि, प्रत्यक्ष प्रसारण गर्दा पहिलाको भन्दा थप प्रभावकारिता हुने आस भने उनमा छ ।

‘सबैको उद्देश्य जनउत्तरदायी काम नै हुन्छ । त्यसैले हामीले भनेका र गरेका कामहरू जनतालाई लुकाउनुपर्ने नै हुँदैन । अहिले महानगरमा भएको लाइभ बैठक पनि त्यही भावनाअनुसार चल्दैछ,’ मानन्धर भन्छन्, ‘जनताको आवश्यकताको माग राखिएको छ वा छैन, स्पष्ट रूपमा वडाका कुराहरू महानगरपालिकामा पुगेका छन् वा छैनन् र एजेन्डाअनुसार काम भएको छ वा छैन भन्ने जानकारी दिन पनि लाइभ बैठकले सहयोग गरेको छ । यो हिजोको दिनमा पनि चाहिएको रहेछ भन्ने आज बुझियो । यसलाई निरन्तरता दिनुपर्छ ।’

उनले तत्काल स्वतन्त्रबाट जितेका मेयर र दलबाट जितेका मेयरसँगको काम गराइमा भिन्नता छुट्याउन भने हतार हुने बताए । व्यक्ति विशेषलाई महत्त्व दिनेभन्दा पनि कसरी एक भएर काम गर्न सकिन्छ भन्नेमा जोड दिनुपर्ने उनको बुझाइ छ ।

त्यस्तै, वडा २ का वडाध्यक्ष राजेन्द्रकुमार श्रेष्ठको पनि उस्तै मत छ । नयाँ निर्वाचित मेयर शाहको कामको मूल्याङ्कन गर्ने समय नआइसके पनि उनको व्यवहारबाट केही आशावादी भएको तर्क उनले राखे ।

‘महानगरमा अघिल्लो कार्यकालमा भन्दा केही फरक पक्कै भएको छ । तर, मूल्याङ्कन गर्ने समय आएको छैन । बैठकको सन्दर्भमा लाइभ गर्न मिल्ने कि नमिल्ने भन्ने एउटा पाटो भयो । तर, लाइभ गर्दा हुन सक्ने फाइदाहरू लाइभ नगर्दाभन्दा धेरै छन् । बैठक लाइभ हुँदा महानगर पारदर्शी रहन्छ । आफूले छानेको प्रतिनिधि कत्तिको सक्षम छ भन्ने परीक्षा पनि बैठकमा नै हुन सक्छ’, श्रेष्ठले शिलापत्रसँग भने ।

तर, बैठकमा आउँदा वडाका प्रतिनिधिले कम तयारी गरेकोमा श्रेष्ठको गुनासो छ । यसपटक भने बैठकमा सदस्यहरू र वडाध्यक्षहरूमा पर्याप्त तयारीको कमी महसुस गरेका छन् । जनप्रतिनिधिहरूले के बोल्ने भन्ने पनि जान्न आवश्यक रहेको उनी देख्छन् । साँच्चै समस्या पस्कन बोल्नेभन्दा पनि बोल्नका लागि मात्र बोल्नेहरू धेरै रहेको उनको भनाइ छ ।

श्रेष्ठ भन्छन्, ‘समस्या लिएर प्रस्तुत हुनेभन्दा पनि प्रत्यक्ष प्रसारणमा देखिने होडबाजी पनि वडाध्यक्षहरूमा देखिन्छ । आक्षेप लगाउने, अनावश्यक विवाद निम्त्याउने गरेका हुन्छन् । यसले कतै नकारात्मकता फैलाउने हो कि भन्ने डर छ ।’

२९ नम्बर वडाका कुश ढकाल भने महानगरका समस्याको जड महानगरका कर्मचारी नै रहेको दाबी गर्छन् । उनको अनुभवमा महानगरमा अहिलेको कार्यकाल र पहिलाको कार्यकालमा काम गराइ त्यति फरक छैन । समस्या प्रतिनिधिमा भन्दा पनि कर्मचारीमा रहेकाले खासै फरक नपाएको उनी बताउँछन् । महानगरभित्रकै कर्मचारीहरू नसप्रिएसम्म परिवर्तन होला भन्ने आस उनमा छैन ।

‘बैठकहरू लाइभ भएको देख्न चाहन्छौँ । लाइभ सधैँ र सबै होस् । तर, लाइभ गरिनु मात्र महानगरमा फरक हुँदैछ अथवा सुधार हुँदैछ भन्न सकिन्न । महानगर सुधार्न पहिला महानगरका कर्मचारीहरूकोे तालिम, सिकाइ बढाउनुपर्छ । पहिलाको मेयर र अहिलेको मेयरसँग काम गर्दा त्यति फरक छैन । बरु कर्मचारी सुध्रिए केही फरक अनुभूति हुन्थ्यो कि’, ढकालले भने ।

वडा नम्बर ३२ का वडाध्यक्ष नवराज पराजुली भने सबै नयाँ–पुरानो मिलेर जानुपर्ने मत राख्छन् । यद्यपि, अहिले भने पहिलाको तुलनामा केही फरक प्रक्रियाबाट काम भइरहेकाले आशावादी रहेको उनको भनाइ छ । उनले देखेको फरक प्रक्रिया भनेको प्रत्यक्ष प्रसारणलगायतका विषय हुन् । सबैले आफ्नो ठाउँबाट सहयोग गरेमा धेरै काम सहज र छिटो हुने उनी बताउँछन् ।

‘केही काम फरक प्रक्रियाबाट भइरहेका छन् । यसबाट आशा राख्ने ठाउँ धेरै छ । तर, लाइभ मात्र गरेर पनि हुँदैन । निर्णय हुने र काम गर्ने बेलामा उस्तै रह्यो भने समस्या हुन्छ,’ पराजुलीले भने, ‘त्यसैले जनताले सिधै अनुभूत गर्न सक्ने किसिमको काम गर्नुपर्छ । त्यसका लागि पर्याप्त समय पनि चाहिन्छ । अहिले नै फरक छुट्याएर यस्तो–उस्तो भनिहाल्न अलि हतारो होला ।’

प्रकाशित मिति: बुधबार, असार १५, २०७९ ०९:५६