फाष्टट्रयाक निर्माण : सेना मूलठेकेदार, २८ उपठेकेदार

A+ A A-

सरकारबाट पैसा लिने, ठेकेदार छान्ने र निर्माणको रेखदेख गर्ने काम सेनाले गर्ने गरेको समाचार आजको नयाँ पत्रिकाले प्रकाशित गरेको छ । निगरानीका लागि सेनाले विभिन्न ठाउँमा क्याम्प खडा गरेको छ । सिस्नेरी क्याम्पमा भेटिएका सेनाका प्राविधिक सुबेदार तुलाराम खड्काले भने, ‘द्रुतमार्गको ट्र्याक खन्ने काम सेनाकै निगरानीमा द्रुत गतिमा भइरहेको छ । हाम्रो क्षेत्रभित्र पनि साढे ९ किमि सडकखण्ड पर्छ । त्यसमध्ये २ किमिको ट्रयाक खोल्ने कामचाहिँ सेनाकै प्राविधिक र निर्माण सामग्रीमार्फत भइरहेको छ । बाँकी पेटीमार्फत निजी ठेकेदार कम्पनीले गर्दै छन् ।’

७६ किमि फास्ट ट्रयाक निर्माणको ठेक्का पाएको नेपाली सेनाले आफ्नै कर्मचारी र निर्माण सामग्री प्रयोग गरेर २२ किमि मात्रै ट्रयाक खोल्दै छ । ५४ किमि ट्रयाक निजी कम्पनीले खोल्दै छन् । ५४ किमि सडक निर्माणमा निजी २७ र सेनासमेत गरी २८ ठेकेदार परिचालन भएका छन् । ट्र्याक खोल्न खास कति पैसा लाग्ने हो भन्ने निश्चित छैन । सेनाले निजी कम्पनीलाई ठेक्का दिन्छ र सोबापत सरकारबाट पैसा लिन्छ । सेनाले मागेको पैसा सरकारले निकासा दिने गरेको नयाँ पत्रिकामा समाचार छ ।

त्यस्तै नयाँ पत्रिका दैनिकले पनि प्रधानमन्त्री रोजगार कार्यक्रम घोषणाबारे प्रमुख समाचार प्रकाशित गरेको छ । सबै नागरिकलाई रोजगारको प्रत्याभूति गर्ने उद्देश्यले सरकारले प्रधानमन्त्री रोजगार कार्यक्रम सुरु गरेको छ । बुधबार राजधानीमा प्रधानमन्त्री केपी शर्मा ओलीले उक्त कार्यक्रमको उद्घाटन गरेका हुन् ।

उद्योग, व्यापार, कृषि, पर्यटन, पूर्वाधार, सूचना प्रविधिलगायत विभिन्न क्षेत्रमा रोजगारीका अवसर सिर्जना गर्न भन्दै सरकारले कार्यक्रम ल्याएको हो । बेरोजगारलाई न्यूनतम सय दिनको रोजगारी ग्यारेन्टी गर्ने र रोजगारी दिन नसके क्षतिपूर्तिका रूपमा जीवन निर्वाह भत्ता उपलब्ध गराउने कार्यक्रमको लक्ष्य छ ।

यस्तै नयाँ पत्रिकाले संविधानको मर्म मिच्दै विधेयक शीर्षकमा सम्पादकीय प्रकाशित गरेको छ भने झलक सुवेदीले लेखेको नेकपामा (न) हल (न) चल शीर्षकमा प्रमुख लेख प्रकाशित गरेको छ । सीमान्तकृतको छात्रवृत्तिः कागलाई बेल शीर्षकमा भोला पासवानले लेखेको लेख पनि छापिएको छ ।