४५ अर्बको दाल, २९ अर्बको चामल आयात

A+ A A-

४५ अर्बको दाल, २९ अर्बको चामल आयात भइरहेको, ४ करोडको कोदो, ३ करोडको फापर, ५३ करोडको केरा, ५७ करोडको सुन्तला आयात भएको समाचार आजको नयाँपत्रिका दैनिकमा छापिएको छ ।

समाचारमा संघीय सरकारको कृषि मन्त्रालयको बजेट यसपालि २२ अर्बको छ भने त्यसको १२ अर्ब अनुदानमा जान्छ । निर्वाहमुखी कृषि प्रणाली अपनाइरहेका निम्न आर्थिकस्तरका किसानलाई व्यावसायिक कृषितर्फ आकर्षित गर्न सरकारले गरेको अर्बौँ लगानीको प्रतिफल भने निराशाजनक छ । बरु सरकारका आयोजना र कार्यक्रमबाट वास्तविक किसानले भन्दा राजनीतिक पहुँच भएका र उच्च तहका कर्मचारीका निकटस्थहरूले लाभ लिइरहेका छन् ।

अनुदान कार्यक्रमको प्रभावकारिता अध्ययन गर्न कृषि तथा पशुपक्षी विकास मन्त्रालयले २२ असारमा गठन गरेको समितिले नै कृषिको रकममा दुरुपयोग भएको निष्कर्ष निकालेको उल्लेख छ ।

नेपाल कम्युनिस्ट पार्टी (नेकपा)का अध्यक्ष केपी ओली र पुष्पकमल दाहाल प्रचण्डले पछिल्ला घटनाक्रम र पार्टी एकीकरणमा भइरहेको ढिलाइबारे छलफल गरेका छन् । उनीहरूबीच गत बिहीबार पनि पार्टी एकीकरणमा भइरहेको ढिलाइ र एकीकरण कार्यदलका काममा केन्द्रित रहेर छलफल भएको समाचार पनि आजको नयाँपत्रिकामा छ ।

तीन सातादेखि सडकमा जमेको हिउँ पन्छाउन नसक्दा मनाङको जनजीवन कष्टकर बनेको छ । हिमपातले सडकमा खसेका ढुंगा, ढालेका रूख पन्छाउन नसक्दा तीन सातादेखि मनाङमा खाद्यान्नलगायत कुनै पनि सामग्री ढुवानी हुन सकेको छैन ।

हिमपातसँगै मनाङमा सवारी आवागमन ठप्प भएको मनाङका प्रमुख जिल्ला अधिकारी रुद्रनाथ देवकोटाले बताए । उनका अनुसार तिमाङ र थान्चोकबीचको स्याक्र्यु खोलानजिकैको सडकमा ठूलो ढुंगा खसेपछि अवरुद्ध भएको समाचार आजको नयाँ पत्रिका दैनिकमा छापिएको छ ।

त्यस्तै नयाँपत्रिका दैनिकमा प्रधानमन्त्री तथा मन्त्रिपरिषद् कार्यालयअन्तर्गतको गरिबी निवारण कोषमा व्यापक अनियमितता भएको भेटिएको छ । राष्ट्रिय सतर्कता केन्द्रले छानबिनमा करोडौं अनियमितता खुलेको भन्दै अधिकारसम्पन्न निकायबाट थप अनुसन्धान गर्न प्रधानमन्त्री तथा मन्त्रिपरिषद्को कार्यालयलाई सिफारिस गरेको समाचार पनि छापिएको छ ।

प्रकाशित मिति: आइतबार, माघ २७, २०७५ १८:४९