पीडित भन्ने अनि फाेकस गरीगरी फाेटाे राखेर भाइरल बनाइदिने ?

A+ A A-

विश्व कोरोना माहामारीको सन्त्रासमा छ । तर महिला, किशोरी, घरपरिवार सामाजिक सञ्जालबाट समेत जोखिममा छन् । २१औँ शताब्दी आयो तर न्याय आएन । महामारीका बेला महिला, किशोरी, बालबालिकाहरूले हिंसा सहनुपरेको छ ।

फरकफरक प्रवृत्तिमा हिंसा दिनप्रतिदिन बढ्‌दो छ । हिंसा गर्ने व्यक्ति टाढाको होइन, घर र समाजमै समाहित सदस्यहरू हुन् । सविताजस्ता महिला आफ्नो घरमित्रै शोषित हुन पुगेका छन् । उनी त केवल एक प्रतिनिधिपात्र मात्र हुन् । उनीजस्ता हजारौँ महिलाले दिनप्रतिदिन हिंसा सहनुपरेको छ ।

संसारमा कोरोना भाइरसको संक्रमण फैलिन थालेको दुई वर्ष लागिसकेको छ भने लाखौँ नागरिकले ज्यान गुमाएका भए पनि अब विस्तारै यसबाट छुटकारा दिलाउने दिशामा विश्व लागिपरिसकेको छ । तर, घरेलु हिंसा अझैसम्म नियन्त्रणमा ल्याउन सकेको छैन सरकारले ।

कति हिंसाहरू समाजमा इज्जतका डरले दबिएरै बसेका छन् । बाहिर ल्याइएको छैन वा आउन दिइएको छैन । अझै पनि हाम्रो समाजमा पुरानो चलन यथावत् नै छ । महिलालाई केवल दयालु, लजालु, मायालु, मनाेरञ्जनको साधनका रूपमा यो समाजमा हेर्ने गरिएको छ । सधैँ पुरुषको भरमा जिउन बाध्य पारिएको छ । सबैतिर यस्तो त नहोला तर अधिकांश महिलाहरूको नियति यस्तै छ भन्दा फरक नपर्ला ।

अहिले नेपालजस्तै अरु देशको पनि हालत उस्तै छ । संसार नै ठप्प भएको बेला महिलामाथि यौनशोषण र हिंसा भएका घटना दिनहुँ बाहिरिइरहेका छन् भने कतिपय यस्ता हिंसाका घटना इज्जत जाने डरले लुकाइने गरेका पनि छन् । कहिले ससुराबाट यौन शोषणमा परेर मृत्युुको मुखमा पुगेका छन् । घरपरिवारकै सदस्यबाट हुने गरेका यस्ता दुर्व्यवहार घरभित्रै लुकाउने गरेका छन् ।

महिलालाई वास्तवमै स्वतन्त्रता दिने हो भने (भलै अहिले कानुनी रूपमा स्वतन्त्र छन्) सञ्चारमाध्यममा रहेर/पुगेर महिलाको आवाजलाई जीवन्त पार्न सक्छन् । समाज र देशलाई आर्थिक विकास र समृद्धिको बाटोमा अघि बढाउन सक्छन् । अहिले हिंसामा परेका महिला, किशोरी तथा बालिकाको अनुहारलाई सामाजिक सञ्जालमा देखाउने प्रवृत्तिले गर्दा उनीहरू झन् बढी मर्कामा परेका छन् । जसले गर्दा आत्महत्या गर्नेसम्मका घटना हुन पुगेका छन् ।

पीडित महिला, किशोरी तथा बालिकाको अनुहार युट्युबमा भ्युज बढी पाउने र पैसा कमाउने होडबाजीले गर्दा पनि यो अवस्था आउन सक्ने भएकाले युट्युबरहरू सचेत हुन जरुरी छ । महिलाका कुन कुरालाई मिडियामा ल्याउने, कुन कुरा गोप्य राख्नेजस्ता विषयमा युट्युबरहरूको ध्यान पुग्न सकेको पाइएको छैन । साथै, सामाजिक सञ्जालका प्रयोगकर्ताहरू पनि सचेत हुन आवश्यक देखिन्छ ।

प्रकाशित मिति: शनिबार, असार ५, २०७८ ०९:१५