गण्डकीमा मन्त्री र सचिवलाई कोरोना, मन्त्रालय एक हप्तादेखि सुनसान

A+ A A-

कोरोना संक्रमण पुष्टि भएपछि गण्डकी प्रदेशकी सामाजिक विकासमन्त्री नरदेवी पुन अहिले आइसोलेसनमा छन् । मन्त्रालयका सचिव विनोद कुँवर पनि एक हप्तादेखि आइसोलेसनमा छन् ।

मन्त्री पुन र सचिव कुँवर प्रदेश सरकारकै संक्रामक तथा सरुवा रोग अस्पताल सिसुवामा बसेका छन् । कोरोनासँग मिल्दोजुल्दो लक्षण देखिएपछि मन्त्री पुन आठ दिनदेखि आइसोलेसनमा रहेको उनका स्वकीय सचिव प्रकाश पौडेलले जानकारी दिए ।

मन्त्री पुनलाई श्वासप्रश्वासमा बढी समस्या देखिए पनि अहिले स्वास्थ्य सुधारोन्मुख रहेको सरुवा रोग अस्पतालका निर्देशक डा. विकास गौचनले जानकारी दिए । सचिव कुँवरलाई भने समस्या छैन । मन्त्री पुनलाई २१ माघ र सचिव कुँवरलाई २४ माघमा कोरोना पोजिटिभ देखिएको हो । दुवैको दोस्रो परीक्षण तीन दिनपछि गरिने निर्देशक. डा गौचनले बताए ।

मन्त्री र सचिवलाई नै कोरोना पोजिटिभ देखिएपछि पछिल्लो एक हप्तायता मन्त्रालय सुनसान प्रायः छ । विभिन्न महाशाखामा सीमित कर्मचारी मात्रै उपस्थित छन् । मन्त्री पुन र सचिवबाहेक अरु चार जनालाई पोजिटिभ देखिएको मन्त्रालय स्रोतले बतायो । तर यो विषयमा मन्त्रालयका उच्च अधिकारी, प्रदेश स्वास्थ्य निर्देशक विनोदविन्दु शर्मा पनि बोल्न तयार छैनन् ।

मन्त्रालयकी सूचना अधिकारी पनि अहिले बिरामी छन् । प्रवक्ता तेजप्रसाद काफ्लेले मन्त्रालयका कति कर्मचारी संक्रमित हुन् भन्ने आफूलाई जानकारी नभएको बताए । ‘कति साथीलाई देखियो भन्ने मलाई पनि थाहा छैन । हामी पनि कुनै न कुनै काममा उहाँहरुको कार्यकक्षमा पसेका छौँ,’ प्रवक्ता काफ्लेले भने, ‘चार÷पाँच जना साथीहरु मात्रै काममा जानुभएको छ ।’

निमोनिया नलुकाऔँ : डा. गौचन

गण्डकी प्रदेशको संक्रामक तथा सरुवा रोग अस्पतालका निर्देशक डा. विकास गौचनले निमोनिया देखिए जतिसक्दो छिटो अस्पताल पुग्न आग्रह गरेका छन् । सुरुआतका दिनमा संक्रमितलाई रुघाखोकी देखिए पनि अहिले निमोनियाका बिरामी ह्वात्तै बढेको उनले बताए ।

‘एक महिनामा ५० जना बिरामी आउनुभयो । त्यसमा अधिकांशलाई निमोनिया देखियो,’ उनले भने, ‘निमोनिया भइहाले अस्पताल जान सबैलाई आग्रह गर्छु । त्यसलाई लुकाएर बस्नुभएन ।’

अहिले १८ जना संक्रमित उपचाररत रहेकोमा धेरैलाई निमोनिया देखिएको डा. गौचनले बताए । गत साउनदेखि प्रदेश सरकार मातहत रहेको सरुवा रोग अस्पतालले अहिलेसम्म तीन सयभन्दा बढी संक्रमितको उपचार गरेको छ ।

गण्डकी प्रदेशमा बिहीबारसम्म १५ हजार ७७७ जनालाई कोरोना पोजेटिभ देखिएको छ । तीमध्ये १५ हजार २६० जना निको भएको प्रदेश स्वास्थ्य निर्देशक विनोदविन्दु शर्माले जानकारी दिए । संक्रमितमध्ये २०३ जनाको मृत्यु भएको छ ।

प्रकाशित मिति: बिहीबार, माघ २९, २०७७ २०:४३