आमहडतालमा कार्यकर्ता : चालकमाथि जाइलाग्ने, प्रहरीलाई धम्क्याउने

प्रहरीसँग भनाभन गर्दै बन्दकर्ता

A+ A A-

केही युवा स्कुटर र बाइक रोकिरहेका छन् । हातमा सूर्य चिह्न भएको झन्डा छ । झन्डा बोक्ने युवा बाइकवालालाई प्रश्न गर्छन् – कहाँ जाने ? बाइकवाला जवाफ दिन्छन् – बाटो किन छेक्या, छोड्नुस् । बन्दकर्ता फेरि प्रश्न गर्छन् – आज बन्द हो थाहा छैन ?

बाइकवाला कड्किन्छन् – जे भए पनि होस् । बाटो छोड्नुस् । बाइकमा सवार युवा कड्किन थालेपछि झन्डा लिएर सोधपुछ गरिरहेका युवा हच्किए । उनले केही बोलेनन् ।

पल्सर बाइकमा आएका युवा आफ्नै बाटो हुइँकिए । उनले बन्दलाई अवज्ञा गरिदिए । बिहीबार बिहान सवा १० बजे पोखराको बिरौटा चोकमा यस्तै दृश्य देखियो ।

नेकपा माधव-प्रचण्ड पक्षले घोषणा गरेको आमहडतालको दिन बिहीबार पोखराका हरेक मुख्यचोकमा सवारी चालकलाई सोधपुछ गरिरहेका थिए । पोखरामा ठूलो झडप नभए पनि चोकचोकमा सामान्य भनाभन भयो ।

पोखराको बिरौटामा सवारी चालकसँग सोधपुछ गर्दै बन्दकर्ता

बिहीबारको बन्द देखेर पोखरा नदीपुर बस्ने राजेश घले पनि आजित छन् । उनलाई प्रदर्शनकारीले हात नै हाले । ग १४ प ४१३५ नम्बरको स्कुटरमा रानीपौवाबाट नदीपुर जाँदै थिए । महेन्द्रपुलमा बन्दकर्ताले रोक्न खोजे । उनले बन्दकर्ताको वास्ता गरेनन् ।

आफ्नै बाटो लागे । थोरै अगाडि बढ्नेबित्तिकै रातो ज्याकेट लगाएका युवा राजेशमाथि जाइलागे । आफूलाई हात हालेपछि उनी पनि आक्रोशमा आइहाले । आमहडताल सफल बनाउन खटिएका युवा दादागिरी देखाउन थाले । राजेश स्कुटरबाट ओर्लिए । रातो ज्याकेटसँगै कालो चस्मा लगाउने युवा कड्किए, ‘तैंले किन हात हालिस् ।’ राजेश पनि चुप बसेनन् । उनले जवाफ फर्काए, ‘मैले कहाँ हात हालेँ ?’

राजेशसँगै स्कुटरमा श्रीमती पनि थिइन् । उनी बोलिन्, ‘तपाईंले पहिला हात हालेको, हामी घर जान पनि नपाउने ?’ अराजक युवासँग राजेश प्रतिकार गर्दैनन् । स्कुटी लिएर हिँड्न खोज्छन् । रातो ज्याकेट लगाउने युवालाई प्रहरीले समाइरहेको थियो । तर ती युवा राजेशलाई भन्छन्, ‘तैँले गर्न खोजेको के हो ?’

स्कुटर चालक राजेशसँग भनाभन गर्दै बन्दकर्ता

युवा कुटपिटमै उत्रिने मनस्थितिमा थिए । राजेश चुप लागेर घरतिर जान खोज्छन् । बन्दकर्ता उनको स्कुटरमाथि दायाँबायाँबाट प्रहार गर्छन्, लात्ती बजाउँछन् । प्रहरी ती युवालाई समात्छ तर भ्यानमा कोच्ने आँट गर्न सक्दैन । राजेश आफ्नो बाटो लाग्छन् ।

युवा उनको पछिपछि भाग्न खोज्दै थिए, प्रहरीले समात्यो । त्यत्तिकैमा नेकपा कास्की (प्रचण्ड–माधव समूह) इन्चार्ज राजकाजी गुरुङ (करण) घटनास्थल आइपुग्छन् । उनी कार्यकर्ता र प्रहरीलाई सम्झाउँछन् । करणको कुरा बेवास्ता गर्दै कार्यकर्ता प्रहरीलाई भन्छन्, ‘बर्दीको मर्यादा राख्नुस् ।’

बन्दकर्ता देश र जनताका लागि सडकमा आएको बताउँदै थिए । अश्लील शब्द प्रयोग गर्ने, ‘बढी बोल्नेलाई भाटाले सेक्दिम’ जस्ता अभिव्यक्ति बन्दकर्ताले दिइरहेका थिए । बन्दकर्ताबाट दुर्व्यवहारमा परेका राजेशसँग बिहीबार साँझ शिलापत्रले सम्पर्क गर्‍यो । ४७ वर्षे उनले सुनाए, ‘बन्द गरेर के हुन्छ र हामीलाई ?, केही मतलब छैन, आफ्नो मानो खाने । आफ्नो बाटो हिँड्ने हो ।’

चालकसँग सोधपुछ गर्दै बन्दकर्ता

नेताहरूको व्यक्तिगत झगडाले गर्दा जनताले दुःख भोग्नुपरेको भन्दै घलेले आक्रोश पोखे । ‘बुझ्नेहरू भएको भए त्यस्तो गर्थेनन्, त्यहाँ नबुझ्नेहरू भएर हो,’ आफूमाथि दुर्व्यवहार गर्नेबारे टिप्पणी गरे ।

कास्कीमा प्रचण्ड माधव समूहको प्रदर्शनमा कुनै भौतिक र मानवीय क्षति भने भएन । प्रहरीले एक जना प्रदर्शनकारीलाई नियन्त्रणमा लिएको थियो । उग्र भएर प्रदर्शनमा उत्रिएपछि महेन्द्रपुलबाट अनेरास्ववियुका विद्यार्थी नेता विनायक तिमिल्सिनालाई प्रहरीले नियन्त्रणमा लिएको थियो । कास्की प्रहरी प्रवक्ता सुवास हमालका अनुसार तिमिल्सिनालाई ५ बजेपछि छाडिसकेको छ । गण्डकी प्रदेशमा बन्दको सामान्य प्रभाव परेको थियो ।

पोखराको न्यूरोड सडकखण्ड

बन्दको विरोधमा र्‍याली

नेकपाको एउटा पक्षले हडताल गरिरहँदा अर्को पक्ष भने त्यसको विपक्षमा थियो । नेकपाको विद्यार्थी संगठन अनेरास्ववियुका ओली पक्षीय विद्यार्थी नेताले बन्दको विरोधमा बिहीबार दिनभर मोटरसाइकल र्‍याली गरे । त्यसबाहेक सार्वजनिक सवारी नचल्दा मर्कामा परेका परीक्षर्थीलाई सहज होस् भनेर ‘पिक एन्ड ड्रप’ अभियान चलाए ।

पृथ्वीनारायण क्याम्पसबाट सुरु भएको र्‍यालीले पोखरा परिक्रमा गरेको थियो । विद्यार्थीले त्यसरी प्रदर्शन गर्दा नेकपाकै अर्को पक्षसँग झडपको स्थिति सिर्जना भएको थियो । बन्द-हडताल गरेर जनतालाई दुःख दिने नियतको विरोधमा आफूहरूले र्‍याली निकालेको अनेरास्ववियुका केन्द्रीय कमिटी सदस्य महेन्द्र उपाध्यायले बताए ।

‘बन्दलाई वास्ता नगरी व्यापार व्यवसाय खोलौँ भन्ने खालको नारा लगाउँदा अर्को पक्षसँग झडपको स्थिति पनि बन्यो । हामी त्यतातिर लागेनौँ,’ उनले भने, ‘पिक एन्ड ड्रप अभियान पनि राम्रो भयो, झन्डै चार सयले सेवा लिनुभयो ।’

प्रकाशित मिति: बिहीबार, माघ २२, २०७७ २१:०५