शेयर कारोबारमा किन आक्रामक हुँदै छन् लगानीकर्ता ? सूचक ४ अंकले बढ्दा कारोबार ७ अर्बकाे नजिक

शेयर कारोबारमा किन आक्रामक हुँदै छन् लगानीकर्ता ? सूचक ४ अंकले बढ्दा कारोबार ७ अर्बकाे नजिक

bullish-vs-bearish.jpg

A+ A A-

तिहारपछिको दुई दिनबाट मौलाएको शेयरबजारले अहिले धमाधम नयाँ रेकर्ड कायम गरिरहेको छ । बजारमा कारोबारसँगै २ दिन नेप्से सूचक बढ्दा लगानीकर्ताहरू कारोबारमा आक्रामक रूपमा प्रस्तुत भइरहेका छन् । जसको प्रत्यक्ष असर कारोबारको पहिलो दिन आइतबार नै देखिएको छ ।

आइतबार शेयरबजार परिसूचक नेप्से ४.६९ अंकले बढेर १७८२.८२ अंकमा पुग्दा २ सय १ कम्पनीको १ करोड ६० लाख ३४ हजार ७ सय १७ कित्ता शेयर ६ अर्ब ९० करोड ६७ लाख २८ हजार ३ सय १५ रुपैयाँमा किनबेच भएको छ ।

शेयरमूल्य बढ्छ भन्ने मनोबल लिएर कारोबार गर्ने लगानीकर्ता हावी हुँदा कारोबार रकम तीव्र रूपमा उकालो लागेको विश्लेषकहरूको बुझाइ छ ।

बैंकहरूमा तरलता छ्याप्छ्याप्ती हुँदा न्यून ब्याजदरमै ऋण पाउने र शेयर बढ्छ भन्ने उत्साह लगानीकर्तामा छाउँदा शेयरबजारमा कारोबार बढ्न थालेको नेपाल इन्भेष्टर फोरमका अध्यक्ष छोटेलाल रोनियार बताउँछन् ।

‘यो त सामान्य हो । अब बजार मात्र नभएर मानिसको जीवनशैली सामान्य बन्दै जाँदै छ । यसले शेयर बजारमा सकारात्मक परिवर्तन ल्याउनेमा लगानीकर्ताहरू १० दिनयताको कारोबारले ढुक्क बनिसकेका छन्,’ उनले भने, ‘त्यसैले शेयर किन्नेहरू बढिरहेका छन् । यो अझै बढ्छ कम्तीमा पनि दैनिक ८ अर्ब रुपैयाँबराबरको कारोबार हुने आँकलन गरिएको छ ।’

त्यसो त शेयर बढ्ने आँकलन गरिरहँदा शेयर विश्लेषकहरू नेप्सेमा इन्टरनल ट्रेडको चलखेल भइरहेको आशंकासमेत गर्दै आएका छन् ।

कसले कति कमाए ?

कारोबार रकममा उछाल आए पनि आइतबार नेप्से सूचक अस्थिर बन्दा बैंकिङ, विकास बैंक र अन्य समूहको सूचक मात्रै हरियाली छाएको छ । जसले गर्दा गत हप्ताको जस्तो कमाउने कम्पनीहरू आज निकै कम छन् ।

आइतबार सबैभन्दा धेरै सिटिजन्स म्युचुअल फण्ड–२ ले १० प्रतिशतले शेयरमूल्य बढायो भने जानकी फाइनान्स लिमिटेडले ९.२१ प्रतिशतले मूल्य बढाउन सफल भएको छ ।

कारोबार बढे पनि कारोबारमा आएका ६२ कम्पनीका लगानीकर्तालाई मात्रै शेयरबजारले खुसी तुल्याउन सक्यो । बाँकी ९८ कम्पनीको मूल्य भने आज घटेको छ ।

कारोबारसँगै सूचक पनि बढ्ने आँकलन

पछिल्लो केही दिनयता कारोबार गर्ने लगानीकर्ता मात्र आक्रामक नभएर लगानीकर्ताहरूले सूचक बढ्दा आक्रमक रूपमा कमाउन पनि सफल बने ।

लगानीकर्ता संरक्षण चौधरी हौसिएका लगानीकर्ताको कारणले बजारमा बढेको बताउँछिन् । बजारले बुलिस ट्रेण्ड अझै केही साता लिन सक्ने उनको आँकलन छ ।

त्यसो त नेपाल स्टक एक्स्चेन्जका सीईओ चन्द्रसिंह साउद नेप्सेको प्रविधिको विकासले लगानीकर्ता थप हौसिँदा कारोबार रकम बढेको बताउँछन् । ‘प्रविधि सजिलो छ अहिले ९० प्रतिशत लगानीकर्ता घरमै बसेर कारोबार गरिरहेका छन्,’ उनले भने, ‘योबाहेक कोरोना संक्रमणले लगानी गर्ने स्थान नहुँदा शेयरमा लगानी गर्नेहरूको संख्या बढ्दो छ ।’

गत बिहीबारको बजारले खुसी तुल्याएको लगानीकर्तालाई आइतबारको शेयरबजारले त्यति सन्तुष्टि नदिए पनि लगानीकर्तामा शेयर किन्ने र बेच्नेको क्रेज नघटेको आजको कारोबारले देखाएको छ ।

प्रकाशित मिति: आइतबार, मंसिर ७, २०७७ १६:०१