कोरोना उपचारमा ८ लाख खर्च, गरिबले कसरी गर्ने उपचार ?

A+ A A-

जनता समाजवादी पार्टीका नेता वृषेशचन्द्र लाल १५ दिनअघि कोरोना संक्रमित भएर ललितपुरकाे मेडिसिटी अस्पतालमा भर्ना भए । उनको १४ दिने अस्पताल बसाइमा ८ लाख रुपैयाँ खर्च भयो ।

श्वासप्रश्वासमा समस्या आएपछि आईसीयूमा १३ दिन बसेका उनलाई अस्पतालले भर्ना हुनुपूर्व नै उक्त रकम धरौटी मागेको थियो । ८ लाख रुपैयाँ बुझाएपछि मात्रै उनले अस्पतालमा भर्ना हुन पाएका थिए । १५ दिनपछि कोरोनालाई जितेर घर फर्किएका नेता वृषेशचन्द्रलाइ अस्पतालको मनोमानी र सरकारको गैरजिम्मेवारीले गरिबहरू मर्ने दिन अब सुरु भएको अनुभव भयो ।

उनी भन्छन्, ‘मैले उपचारपूर्व नै ८ लाख रुपैयाँ खर्च गर्नुपर्‍याे उपचार पाउनका लागि । हामीजस्ताे अलिकति चिनिएकाे मानिसले समेत यस्ताे बेहाेर्याैं भनेपछि सामान्य नागरिकले कोरोना लागेको खण्डमा कसरी त्यत्रो पैसा तिर्ने ? मैले तिर्न सकेँ र म बाँचेँ । यदि ८ लाख तिर्ने हैसियत नभएको भए मैले मर्नुपर्थ्याे ।’

अस्पतालको महँगी र सरकारले नागरिकलाई दिनुपर्ने स्वास्थ्य सुविधा नदिँदा संक्रमणबाट सामान्य आयस्तर भएका बिरामी मर्नुबाहेक कुनै उपाय नरहेको उनी बताउँछन् ।

उनी भन्छन्, ‘निजी अस्पतालमा शुल्क महँगो छ, सेवा पनि राम्रो छ । मेडिसिटीमा पनि डाक्टरहरूको सहयोग राम्रो पाएँ तर सरकारी अस्पतालमा त्यो अवस्था छैन । आइसाेलेसनमा डाक्टरको चालचुल देखिँदैन । भर्ना हुनका लागि अस्पतालबाटै सहयोग पाइँदैन । गरिब बिरामी कहाँ जाऊन् ? सरकार कसरी यति निर्दयी हुन सक्छ ?’

त्यसो त पाटन अस्पतालको कोरोना आइसाेलेसनमा उपचार गरिरहेका ललितपुरका शिवराम परियार विगत सात दिनदेखि अस्पतालको शय्यामा छन् । उनले सात दिनमा दुई पटक मात्रै डाक्टरलाई भेटे । संक्रमितले भरिभराउ अस्पतालमा डाक्टर र नर्सहरू भने कमै आइसाेलेसन वार्डमा आउने गरेको उनी बताउँछन् ।

परियारमा कुनै लक्षण नदेखिए पनि छेवैमा सिकिस्त अवस्थाका संक्रमितले पनि स्वास्थ्य सेवा नपाएको गुनासो गर्छन् ।

‘म आएको एक हप्ता भयो । स्वास्थ्य अवस्था बुझ्न डाक्टरहरू नै आउँदैनन् । मभन्दा पनि धेरै सिकिस्त बिरामीहरू पनि छन्,' उनले भने, ‘समस्या आउनेबित्तिकै डाक्टर बोलाउँदा पनि आउँदैनन् । पैसा छैन भनेर सरकारी अस्पताल आएँ, बरु घरमै बसेको भए हुने रहेछ ।’

त्यसो त परियार संक्रमण भएलगत्तै निजी अस्पताल नपुगेका भने होइनन् । काठमाडौँका ह्याम्स, अल्कालगायत तीनवटा अस्पतालमा भर्ना हुन खोज्दा अस्पतालले भर्ना हुनुपूर्व नै १ देखि ५ लाख रुपैयाँसम्म धरौटी राख्नुपर्छ भनेपछि उनी पाटन अस्पतालमा भर्ना भएका थिए ।

यी त प्रतिनिधि पात्र मात्र हुन् । अहिले संक्रमित भएर अस्पताल बस्नुपर्ने अवस्थाका बिरामीले समेत अस्पतालमा भर्ना हुन नपाउँदा अनाहकमा ज्यान गुमाइरहेका छन् । संक्रमण भएसँगै उपचारका लागि अस्पताल चहार्नेको संख्या बढे पनि सरकारीस्तरबाट उपचारमा कुनै पहल हुन सकेकाे छैन ।

यता पाटन स्वास्थ्य विज्ञान प्रतिस्ठान भने विरामीलाई पर्याप्त समय डाक्टरहरुले दिन नसकेको स्विकार्छ । प्रतिस्ठानका निर्देशक रवि शाक्यले कोरोना संक्रमित विरामी बढिरहेको अवस्थामा डाक्टरको अभावले पनि विरामीको अवस्था हेरेर मात्रै काउन्सेलिङ गर्ने गरेको वताए ।

उनले भने,‘घरमा आइसुलेट हुन नसक्ने विरामीहरुलाई हामीले परैबाट उनिहरुको गतिविधी हेरिहेका हुन्छौँ, विरामीको शंख्या बढिरहँदा सिकिस्त विरामीहरुलाई दिनमा २ पल्टसम्म भिजिट गर्ने गरिन्छ भने अन्य विरामीहरुलाई खासै समय दिएको छैन । यद्यपी नर्सहरुले भने उहाँहरुको अवस्थाको बारेमा बुझि रहनु भएको हुन्छ ।’

निर्देशक डा.शाक्य कोरोना संक्रमित विरामीहरुको व्यवस्थापनमा अस्पताल अझै चुकिरेको स्विाकर्छन ।

उपत्यकाका अधिकांश सरकारी अस्पतालहरू कोभिडका बिरामीले भरिइसकेको अवस्थामा निजी अस्पतालको महँगो शुल्कले सामान्य आयस्तर भएका संक्रमितहरू घरमै बस्नुपर्ने बाध्यता छ । अस्पतालमा उचित हेरचाह नपाउने तथा निजी अस्पतालमा महँगो मूल्य तिर्न नसक्ने भन्दै घरमै आइसाेलेसन बनाएर बस्ने संक्रमितको मृत्युको ग्राफ पछिल्लो समय बढ्न थालेको छ ।

प्रकाशित मिति: मंगलबार, कात्तिक १८, २०७७ ०९:१०