दसैँमा यसरी दिनुस् भर्चुअल दक्षिणा

A+ A A-

दसैँ नजिकै आइसक्यो । यसपालिको दसैँमा भने सबै दक्षिणा जम्मा गरेर घुम्न जान्छु, नभए लुगा किन्छु, दक्षिणा अलि धेरै मागेर मोटरसाइकल नै किन्छु भन्दै बस्नुभएको छ भने तपाईंको यसपालिको दसैँको दक्षिणा कोरोनाले नै लैजाने भयो ।

कोरोनाले बोकेर लैजाने हाेइन, दसैँमा टीका लगाउन जान नपाएपछि भिडियोबाट आशीर्वाद थाप्ने अनि आशीर्वादमा जमरासँगै पाउने पैसा भने हात नपर्ने भयो भनेर चिन्तित हुनुहुन्छ ? त्यसो हो भने सजिलै आशीर्वाद पनि थाप्ने पैसा पनि पाउने अनि संक्रमण पनि नहुने गरी अहिले बैंकहरूले गज्जबको योजना ल्याएका छन् । त्यो हो भर्चुअल दक्षिणा ।

भर्चुअल दक्षिणा पनि हुन्छ र ? भन्नेहरूका लागि भने यस पटक अनुभव नै गर्न राम्रो साइत जुरेको छ । जहाँ बसे पनि इन्टरनेटको माध्यमबाट आफन्तजनबाट आशीर्वादसँगै मोबाइलमा दक्षिणाबापतको पैसा आउनुले दसैँलाई थप आकर्षक बनाउने देखिन्छ । किनभने यसपालि दसैँमा घर आउन नपाएका आफन्तसँग पनि आशीर्वादसँगै दक्षिणा पनि पाइन्छ । आशीर्वाद नसकिँदै तपाईंको मोबाइलमा पैसाको घण्टी बज्दा हातैमा आएजस्तै नलाग्ने कुरै भएन ।

के हो भर्चुअल दक्षिणा ?

तपाईंले दिन चाहेकाे दक्षिणाबापतको रकम बैंकको एकाउन्टबाट मोबाइल बैंकिङ प्रयोग गरेर अर्को व्यक्तिको एकाउन्टमा पठाउन सक्नुहुन्छ । सामान्य पैसा ट्रान्सफर गरेजस्तै भए पनि चाडमा आशीर्वादसँगै पैसा पनि हातैमा पाइन्छ । यसरी दिइने दक्षिणालाई नै भर्चुअल दक्षिणा भनिन्छ ।

कोरोना संक्रमणको जोखिम दिनदिनै बढिरहँदा घर जान नपाउने र संक्रमण भएकै कारण अस्पतालमा नै बस्नुपर्ने भन्दै विभिन्न सेवा प्रदायक कम्पनीहरूले 'टीका भिडियोबाट अनि दक्षिणा बैंकबाट' भन्ने नारासहित भर्चुअल दक्षिणाको व्यवस्था गरेका छन् । जसमा दक्षिणा दिने मानिसले पनि खटाई खटाई टीका लगाएर मोबाइलबाट दक्षिणाबापतको रकम पठाइदिन सक्नुहुनेछ भने पाउँदा पनि कोबाट कति पाएँ भनेर हिसाब पनि सजिलै राख्न सक्नुहुनेछ ।

त्यति मात्र कहाँ हो र ? अहिले भर्चुअल दक्षिणाको योजनाअन्तर्गत विभिन्न बैंक तथा सेवाप्रदायक कम्पनीहरूले दक्षिणा पठाएबापत पठाउने व्यक्तिलाई क्यास ब्याकको अफरदेखि पाउने व्यक्तिले दक्षिणाको ब्याज पाउने व्यवस्थासमेत गरेका छन् ।

भर्चुअल दक्षिणा लेनदेन गर्ने तरिका

एनआईसी एशिया बैंकका सीईओ रोशन न्यौपाने भर्चुअल दक्षिणा लेनदेन गर्ने प्रक्रिया सामान्य रहेको बताउँछन् । उनका अनुसार तपाईं हामीले प्रयोग गर्ने अनलाइन बैंकिङ एपमा गएर भर्चुअल दक्षिणा भन्ने फिचरमा क्लिक गरेर दक्षिणा दिनुपर्ने व्यक्तिको एकाउन्ट नम्बर हालेर आफूले चाहेको रकम दक्षिणास्वरुप पठाउन सकिन्छ ।

‘हातमा पैसा दिँदा दसैँमा अनावश्यक खर्च गर्ने, तास खेलेर सकिने हुँदा भर्चुअल दक्षिणा बचत पनि हुन्छ र बचतबापतको ब्याज पनि आउँछ,' उनले भने, त्यति मात्र होइन, दक्षिणा पठाउने मानिसले पनि १ हजार दक्षिणा पठाउँदा १ सय रुपैयाँ बोनसबापत क्यास ब्याकसमेत पाउन सक्छन् ।’

भर्चुअल दक्षिणा योजना अहिले विभिन्न बैंक तथा अनलाइन पेमेन्ट कम्पनीहरूले धमाधम सार्वजनिक गरिरहेका छन् । जसमा तपाईंले बैंक वा अनलाइन पेमेन्ट ई-सेवा, खल्ती, फण्ड ट्रान्सफर, कनेक्ट आईपीएस आदिको प्रयोगबाट पनि दक्षिणा पठाउन र थप बोनस पाउन सक्नुुहुनेछ ।

कसको कस्तो अफर ?

एनआईसी एशिया बैंकले डिजिटल दक्षिणाका लागि मोबाइल बैंकिङ एपमा छुट्टै फिचर नै सार्वजनिक गरेको छ । जसमा विजया दशमीदेखि पूर्णिमासम्म बैंकको मोबाइल बैंक एपबाट एनआईसी एशियाकै खातामा दक्षिणाबापतको रकम पठाउँदा पठाउने व्यक्तिले १० प्रतिशत रकम फिर्ता पाउन सक्नेछन् ।

त्यस्तै, मेगा बैंकले पनि ‘तीनमा तीन सय’ नामक आकर्षक भर्चुअल दक्षिणा अफर ल्याएको छ । उक्त अफरका लागि मेगा बैंकका ग्राहकले मेगा स्मार्ट बैंकिङ एप प्रयोग गरेर फोनपेमार्फत कुनै पनि बैंकका तीनवटा खातामा दक्षिणास्वरुप रकम पठाउनुपर्नेछ ।

दक्षिणाबापत रकम पठाउनेको खातामा मेगा बैंकबाट ३ सय रुपैयाँ ‘क्यास ब्याकको व्यवस्था गरिएको छ । अर्थात् तपाईंले दक्षिणाबापतको रकम पठाउँदा एक पटकमा ३ सय रुपैयाँसम्म रकम फिर्ता पाउन सक्नुहुनेछ । तर रकम पठाउँदा विवरण (रिमार्कस) मा ‘दक्षिणा’ भनी खुलाउनुपर्नेछ ।

यस्तै, प्रभु पेले दसैँमा टीका लगाएपछि अनलाइनबाट दक्षिणा भुक्तान गर्ने व्यक्तिलाई आकर्षक छुट तथा नगद फिर्ताको योजना ल्याएको छ । जसमा प्रभु पेले दसैँमा नयाँ रजिष्ट्रेसन गर्नेलाई ३० रुपैयाँ र अरुलाई रिफर गर्दा पनि ३० रुपैयाँ दिने अफर अघि सारेको छ । योसँगै पुराना ग्राहकहरूले समेत दक्षिणा उल्लेख गरेर रकम ट्रान्सफर गरे आकर्षक बोनस दिने व्यवस्था गरेको छ ।

त्यसो त यस वर्षको दसैँ भर्चुअल बनाउन दसैँलक्षित विभिन्न योजना सार्वजनिक गरिइसकेको छ । जसअन्तर्गत ई-सेवाका प्रयोगकर्ताहरूले भर्चुअल दक्षिणा लिने वा दिने दुवै गरेमा हरेक हप्ता एक भाग्यशाली विजेताले मोटरसाइकल उपहार पाउन सक्ने योजना ई-सेवाले ल्याएको छ ।

कोरोना संक्रमणको जोखिम उच्च भइरहँदा राष्ट्र बैंकले नै राष्ट्रव्यापी रूपमा सबै बैंक तथा पेमेन्ट कम्पनीलाई दसैँमा डिजिटल भुक्तानी प्रक्रियालाई सरलीकृत गर्दै विस्तार गर्न आग्रह गरको थियो । जसअन्तर्गत अहिले दसैँमा सपिङदेखि टिकट र दक्षिणासमेत दिनका लागि विभिन्न योजनाहरू सार्वजनिक गरिरहेका छन् ।

प्रकाशित मिति: बुधबार, कात्तिक ५, २०७७ १३:३३