सहुलियतपूर्ण पसलदेखि नि:शुल्क होम डेलिभरीसम्म

A+ A A-

लामो समयको बन्दपश्चात् बजार खुल्न थालेको छ । नेपालीहरूका दुई ठूला पर्व दसैँ-तिहार नजिकिँदै गर्दा बजारमा खाद्य अभाव हुन नदिन खाद्य व्यवस्था तथा व्यापार कम्पनी आपूर्तिका लागि जुटेको छ ।

कम्पनीले बजारमा फैलिएजस्तो दसैँ-तिहारमा अभाव सिर्जना नहुने भन्दै आपूर्तिका लागि विभिन्न योजनाहरू बनाइरहेको छ । कोभिडलाई लक्षित गर्दै अनलाइन डेलिभरी सेवादेखि खसी-बोका आयात र चामल, दाललगायतका खाद्यवस्तुहरू धमाधम आयातको व्यवस्था गर्दै छ ।

कम्पनीकी सूचना अधिकारी शर्मिला न्यौपानेले कम्पनीले बजारमा अभाव सिर्जना हुन नदिन १४ सय भन्दा बढी मेट्रिकटन खाद्यवस्तु मौज्दातमा राखेको बताइन् ।

योबाहेक कम्पनीले तराईक्षेत्रबाट १० हजार मेट्रिकटन चामल आयात गरिसकेको छ । जसमा ६ हजार मेट्रिकटन चामल काठमाडौँ आइसकेको छ भने बाँकी ४ हजार मेट्रिकटन चामल केही दिनभित्रै आयात गर्दै छ ।

त्यस्तै, खसी-बोकाका लागि अहिलेको बजारको अवस्था हेरेर संख्या तलमाथि हुने सूचना अधिकारी न्यौपानेले बताइन् । ‘हामीले सुरुमा ३ हजार खसी-बोका भित्र्याउने तयारी गरेका थियौँ,’ उनले भनिन्, ‘अहिले आएर उपभोग कम हुने आँकलन गरेसँगै अहिलेका लागि खसी-बोकाको आयात २ हजारको संख्यामा मात्र गर्ने योजना बनाएका छौँ ।’

कम्पनीले माग बढेसँगै संख्या पनि बढाउँदै च्याङ्ग्रा मुस्ताङबाट र खसी-बोका हेटौँडा र तुलसीपुरबाट आयात गर्दै छ ।

कम्पनीले दाल, गेडागुडीलगायतका खाद्यवस्तु कति मात्रामा आयात गर्ने भनेर अझै निर्क्याेल गरिसकेको छैन । न्यौपानले कम्पनीले कति मात्रामा दाल गेडागुडी आयात गर्ने भन्नेमा छलफल भइरहेको जानकारी दिइन् ।

सहुलियतपूर्ण पसल

कम्पनीले १५ असोजदेखि उपत्यकाका पाँच स्थानमा सहुलियतपूर्ण पसलहरू सञ्चालनमा ल्याउने तयारी गरेको छ । जसमा काठमाडौं जिल्लाका लागि कम्पनीको थापाथली कार्यालय तथा रामशाहपथ, नक्खु, भक्तपुरको सूर्यविनायक र ललितपुरको लगनखेल बिक्री केन्द्रबाट सहुलियतपूर्ण सामान बिक्री गरिनेछ । कम्पनीले साल्ट ट्रेडिङको सहकार्यमा सहुलियतपूर्ण पसलहरू सञ्चालन गर्नेछ । कम्पनीले अघिल्लो वर्षको तुलनामा यस वर्ष केही नयाँ तरिका अपनाउँदै छ ।

कम्पनीले यस वर्ष सहुलियतपूर्ण पसलहरूमा पनि अनलाइन खरिदबिक्रीको व्यवस्था मिलाउँदै छ । यसरी सहुलियतपूर्ण पसलहरू तथा खाद्यको अनलाइन पोर्टलमा कम्पनीले अन्य संस्थाहरूका उत्पादन पनि बेच्ने जनाएको छ । खाद्यले यस वर्ष स्टल राख्दा डीडीसी, साल्ट ट्रेडिङसँगै केही निजी संस्थाका उत्पादन पनि बेच्ने जनाएको छ ।

खाद्यको अनलाइन व्यापार, नि:शुल्क होम डेलिभरी

खाद्य व्यवस्था तथा व्यापार कम्पनीले कोभिड- १९ को माहामारीलाई लक्षित गर्दै सुपथ मूल्यमा खाद्यकै वेबसाइटबाट उपभोक्ताले सामान किन्न सक्ने व्यवस्था गरेको छ । जसका लागि उपभोक्ताले डब्लूडब्लूडटनेपालफुडडटजीओभीडटएनपीमा गएर सामानहरूको मूल्यसूची हेर्न तथा अडर्र गर्न सकिनेछ ।

सो पोर्टलमा उपलब्ध खाद्यवस्तु अर्डर गर्नका लागि उपोभोक्ताले अनलाइन पेमेन्ट गरेर होम डेलिभरीका लागि आग्रह गर्न सक्छन् । यसरी अर्डर गरिसकेको एक देखि दुई दिनभित्रमा खाद्यले नि:शुल्क होम डेलिभरी गरिदिनेछ ।

कम्पनीकी सूचना अधिकारी न्यौपानेले बजारमूल्यभन्दा सस्तोमा खाद्यले सामान बिक्री वितरण गर्नुका साथै नि:शुल्क होम डेलिभरीको व्यवस्थासमेत गरेको बताइन् ।

प्रकाशित मिति: बुधबार, असोज १४, २०७७ ००:१९