हराएको फोनमा ‘बाँदरको सेल्फी’ र भिडियो !

A+ A A-

मलेसियामा एक युवकले आफ्नो मोबाइल हराए । तर, आफूले हराएको फोन भेटिँदा त्यसमा भेटिएका बाँदरका सेल्फी र भिडियोका कारण उनी अचम्ममा परेका छन् ।

२० वर्षीय जाक्रिद्ज रोद्जीले बाँदरका सेल्फी र भिडियो ट्विटरमा हालेका छन् । जसमा बाँदरले फोन खान खोजे जस्तो देखिन्छ ।

उनले भिडियो र तस्वीर हालेपछि सामाजिक सञ्जालमा व्यापक भएका छन् । रोद्जीले शनिबार बिहान उठ्दा आफ्नो फोन हराएको थाहा पाए ।

एउटा भिडियाेमा सोही दिन दिउँसो बाँदरले फोनको क्यामरामा ट्वाल्ल परेर हेरिरहेको र हरिया पातको पृष्ठभूमिमा काग कराएको सुनिन्छ । फोनमा बाँदर र रूखका धेरै तस्वीर छन् ।

रोद्जीले आइतबार दिउँसोसम्म फोन भेटाएका थिएनन् । तर, घरबाहिर एउटा बाँदर देखेपछि फोन गर्दा घरपछाडि जङ्गलमा मोबाइलको घण्टी बजेको सुनिएको बताए ।

त्यसपछि खोज्दै जाँदा हिलो लागेको फोन पामको रूखमुनि पातहरूले छोपिएको अवस्थामा भेटिएको थियो ।

उनले आफ्नो हराएको फोनमा बाँदरका सेल्फी र भिडियो रहेको कुरा बताउँदा पहिले कसैले पत्याएका थिएनन् । बरु चोरका तस्वीर होलान् र ठट्टा गरेको सम्झिएका थिए । तर, फोन खोलेर र्हेदा साँच्चै बाँदरका तस्वीर भेटिएका थिए ।

बाँदरले सेल्फी खिचेको विषय समाचारमा आएको यो पहिलो पटक भने हैन । सन् २०१७ मा एक बेलायती फोटोग्राफरले बाँदरले फोटो खिचेको विषयमा मुद्दा नै खेप्नु परेको थियो ।

सन् २०११ मा इन्डोनेसियाको जंगलमा डेभिड स्लेटरको क्यामरामा एउटा बाँदरले आफ्नो फोटो खिचेको थियो । सो तस्वीर सर्वाधिकार आफ्नो हुनुपर्ने उनको दाबी थियो । तर, पशुअधिकारवादी समूह पेटाले त्यो तस्वीरमा बाँदरकै अधिकार हुने तर्क गरेको थियो ।

अमेरिकाको एउटा अदातलले बाँदरका लागि कपीराईट संरक्षण कानुन लागू नहुने निष्कर्ष निकाल्दै पेटाले दार गरेको मुद्दा खारेज गरिदिएको थियो ।

पछि स्लेटरले सो तस्वीरबाट संकलन हुने रकमको २५ प्रतिशत रकम सो बाँदर र इन्डोनेसियामा त्यस प्रजातिका बाँदरको संरक्षणलाई दिने सहमति व्यक्त गरेका थिए । बीबीसीबाट

प्रकाशित मिति: बिहीबार, असोज १, २०७७ १६:३३