लकडाउनले टाट पल्टेका छन् नागरिक, सरकारलाई गाडी मालिकको चिन्ता !

A+ A A-

सरकारले लामो दूरीका सवारीसाधन संचालन गर्ने व्यवसायीलाई तोकिएको भाडादरमा ५० प्रतिशत थप गरेर यातायात संचालन गर्ने अनुमति दिएपछि त्यसकाे सिधा मार यात्रुलाई पर्ने भएकाे छ ।

मन्त्रालयका एक अधिकारी भाडा बढाइएको विषयलाई व्यवसायीका लागि राहतका रूपमा अर्थ्याउँछन् । यसअघि भाडा दर तोकिँदा ३० प्रतिशत गाडीमा लाग्ने पेट्रोल, डिजेल र मोविलबाट तथा बाँकी ७० प्रतिशत यात्रुबाट आउने रकम मिलाएर भाडा दर तोकिने व्यवस्था थियो । तर, सरकारले आधा मात्र यात्रु बोक्न पाउने भनेपछि गाडीको खर्च धान्न नसक्ने भन्दै व्यवसायीलाई भाडा बढाउन छुट दिइएको हो ।

यातायात व्यवस्था विभागका महानिर्देशक गोगन हमालले भाडा बढाउने छुटको निर्णय क्याविनेटले गरेकाले किन दिइयो भन्ने जानकारी विभागलाई नहुने बताए । उनले भने, ‘क्याविनेटले गरेको निर्णय हो । हामीले निर्देशन कार्यान्वयन मात्र गराउँछौँ । त्यसैले यो विषयमा हामीलाई जानकारी हुन्न ।’

५ महिनादेखि थलिएको व्यवसाय बचाउनका लागि भन्दै सरकारले जनताको घाँटी निमोठेको उपभाेक्ताकर्मी माधव तिम्सिना बताउँछन् । ‘व्यवसायी मर्कामा भयो भने त्यसको भरपाई सर्वसाधारण नागरिकबाट गर्ने हो कि यातायात क्षेत्रलाई सरकारले अनुदान दिएर गर्ने हो ?’ उनले भने, ‘५ महिनामा व्यवसायी थलिए भने त्यसको सयौँ गुणा आमनागरिक थलिए । नागरिकको अवस्था झन नाजुक छ ।’

सर्वसाधारणलाई एक छाक भात खुवाउन नसक्ने सरकारले व्यवसायीलाई फाइदा पुर्‍याउन गरेको भाडा बढाउने निर्णय मान्य नहुने उनले बताए । निर्णयविरुद्ध उपोभोक्ताहरू उत्रिने उनी दाबी गर्छन् ।

सरकारी निर्णयको विरोध गर्दै यातायात व्यवस्था विभागलाई निर्देशन कार्यान्वयन नगर्न उपोभोक्तावादीहरूले लिखित रूपमै दबाब दिइरहेका छन् । विभाग भने मन्त्रालयको निर्णय भन्दै पन्छिइरहेको छ ।

बढेको भाडामा यात्रु कति मार ?

लामाे लकडाउनले आर्थिकरूपमा टाट पल्टेका सर्वसाधारण अब घर जान चर्को भाडाकाे मारमा पर्नेछन् ।

यातायात व्यवस्था विभागले तोकेको भाडा दरअनुसार हेर्ने हो भने अब काठमाडौंबाट पूर्व काकरभिट्टा जानलाई सर्वसाधरणले १ हजार १ सय ७२ रुपैयाँ तिर्नुपर्थ्याे भने अब ५ सय ८६ रुपैयाँ बढी गरेर १ हजार ७ सय ५८ रुपैयाँ तिर्नुपर्ने हुन्छ ।

यस्तै, काठमाडौँबाट पश्चिमतर्फ साँफेबगर जाने यात्रुले साविकको भाडामा थप १ हजार ८ सय ७३ रुपैयाँ तिर्नुपर्ने हुन्छ । डडेलधुरा जान पनि २ हजार ३ सय ३५ रुपैयाँँ तिर्नपर्छ ।

लामो दुरी यात्रा गर्ने यात्रुले थोरैमा ५ सयदेखि १२ सयसम्म बढी भाडा तिर्नुपर्ने स्थितिले सर्वसाधारण यस वर्ष दसैँतिहार मनाउनका लागि घर जान नसक्ने अवस्था छ ।

मन्त्रालयले भाडादर बढाउने छुट यात्रुको स्वास्थ्यकै लागि दिइएको अभिव्यक्ति दिइरहँदा यातायात व्यवस्था विभाग, यातायात मन्त्रालय र स्वास्थ्य मन्त्रालयका कर्मचारीबीच बुधबार भएकाे छलफलले सामान्य सेनिटाइजर, मास्क र पञ्जाको प्रयोग गर्दै आधा मात्र यात्रु बोके पुग्ने निष्कर्ष निकालेको छ ।

यसअघि सरकारले विद्यार्थी तथा जेष्ठ नागरिकहरूलाई भाडामा छुट दिएवापत यातायात व्यवसायीलाई अनुदान दिँदै आएको थियो । यस पटक अनुदान दिने अवस्थामा सरकार नभएको भन्दै व्यवसायीलाई भाडा बढाउने छुट सरकारले दिएको अखिल नेपाल यातायात मजदुर संघका अध्यक्ष रामचन्द्र कार्कीले बताए ।

प्रकाशित मिति: बुधबार, भदौ ३१, २०७७ १८:२५