घरभित्र युवा : कम्प्युटर र मोबाइल छाडेर पुस्तकतिर

A+ A A-

कोरोना भाइरस (कोभिड–१९)को महामारी रोक्ने प्रयासमा गरिएको लकडाउन र निषेधाज्ञाले धेरैलाई आक्रान्त पारे पनि कतिपयले यसलाई अवसरका रूपमा प्रयोग गरेका छन् । खासगरी युवा पुस्ताले घरमै थुनिनुपरेको अवस्थाको सदुपयोग गर्दै नयाँ र ज्ञानवर्द्धक पुस्तकहरू पढ्ने गरेका छन् ।

तारानिधि रेग्मीले काठमाडौंको टोखामा पुस्तक पसल सञ्चालन गरेको आठ वर्ष भयो । यसअघि अलिक पाका व्यक्ति मात्र उनीकहाँ पुस्तक किन्न आउँथे । तर, हिजोआज पाका व्यक्तिभन्दा बढी युवापुस्ताले पुस्तकप्रति चासो राखेको उनी बताउँछन् । पुस्तक वितरक उनी अनलाइन प्लेटफर्म किताबकिराडटकमका सञ्चालक पनि हुन् ।

‘लकडाउन सुरु हुनुअघि जागिरबाट अवकाश भएका व्यक्ति, प्राध्यापकहरू मात्र पुस्तक किन्न आउँथे’, रेग्मी भन्छन्, ‘तर, लकडाउन र निषेधाज्ञाका माझ युवापुस्तामा पुस्तकप्रति आकर्षण बढेको पाएको छु । यसअघि मोबाइलमा झुण्डिएर टाइम पास गर्नेहरू हिजोआज अनलाइनबाट पुस्तक मगाएर पढ्ने गरेका छन् ।’

लकडाउन सुरु भएयता उनले अनलाइनमार्फत दैनिक ३० हजार मूल्यबराबरका पुस्तक बिक्री गर्दै आएका छन् । यसरी पुस्तक मगाउनेमा भर्खरै क्याम्पस सुरु गरेका विद्यार्थीदेखि जागिरे युवा रहेको उनको भनाइ छ ।

युवापुस्तामा बढेको पुस्तक मोहले आफ्नो व्यापारमा पनि फाइदा पुगेको रेग्मी बताउँछन् ।

अत्यावश्यक कामबाहेक बाहिर निस्कन अहिले पनि रोक छ । कोरोना संक्रमण तीव्र रूपमा फैलिइरहेकाले बाहिर निस्कनु कम जोखिमपूर्ण छैन । त्यसैले अहिले धेरैले ‘अनलाइन सपिङ’ कै सहारा लिने गरेका छन् । पुस्तक पढ्न चाहनेहरूले पनि अनलाइनमार्फत नै पुस्तक मगाउने गरेका छन् ।

‘पुस्तक पसल खोल्दा जति नै पुस्तक अहिले अनलाइनबाटै बिक्री भइरहेको छ’, रेग्मीले भने ।

पाठकको मागअनुसार घरघरमा पुस्तक पुर्‍याउँदै आएको किताब यात्राका सञ्चालक ऋषिराम अधिकारी पनि अहिले दैनिक तीन सय थान पुस्तक बिक्री हुने गरेको बताउँछन् । ‘घरभित्र थुनिएकाहरूको दिन कटाउने मेसो पुस्तक बनेको छ’, अधिकारी भन्छन्, ‘अहिले पुस्तक मगाउनेमा युवा नै बढी छन् ।’

युवाले खासगरी जीवनी, फिक्सन, ननफिक्सन, उत्प्रेरक र इतिहाससँग सम्बन्धित पुस्तक बढी मगाउने गरेको अधिकारी बताउँछन् ।

लकडाउनका कारण पसल खोल्न नपाउने भएपछि अधिकांश पुस्तक पसल सञ्चालकले अनलाइनमार्फत घरघरमा पुस्तक पुर्‍याउँदै आएका छन् ।

‘एक त पुस्तक किन्न बजारसम्म जानै नपर्ने, अर्कातिर घरमा थुनिएर बस्दाको पट्यारलाग्दो समयले युवालाई पुस्तकतिर तानेको हुनुपर्छ,’ अधिकारीले भने ।

‘दिनभर कति सुत्नु ? कति फिल्म हेर्नु ? कति कम्प्युटर र मोबाइल चलाउनु ? पुस्तक पढियो भने ज्ञान पनि बढ्छ, बानी पनि बस्छ, त्यसैले पुस्तक मगाएको हुँ’, कतिपय युवा ग्राहकको प्रतिक्रिया सुनाउँदै रेग्मी भन्छन् ।

नेपाल ल क्याम्पसमा एलएलबी दोस्रो वर्षकी छात्रा रमा ठकुरी लकडाउन र निषेधाज्ञाको समयमा आफूले पुस्तक पढेर समयको सदुपयोग गरेको बताउँछिन् । उनी भन्छिन्, ‘पहिलापहिला पाठ्यक्रमको किताब मात्र पढ्थेँ तर अहिले इतिहास, जीवनी, फिक्सनसँग सम्बन्धित पुस्तक पढ्ने गरेकी छु । एक हिसाबले अब पाठ्यक्रमबाहिरका पुस्तक पढ्ने बानी नै परेको छ ।’

पुस्तक प्रकाशन तथा बिक्री गर्दै आएको बुक हिलका अध्यक्ष भूपेन्द्र खड्का भने सामान्य अवस्थाभन्दा पुस्तकको बिक्री घटेको बताउँछन् । यद्यपि, महामारीका समयमा युवापुस्तामा पुस्तक पढ्ने बानीको विकास भएकोप्रति आफू सन्तुष्ट रहेको उनको भनाइ छ ।

‘खासगरी बुकहोलिक व्यक्तिहरूले मात्रै किताब मगाउने गरेका थिए । तर, युवामा पनि पुस्तकप्रति चाख बढेको पाइन्छ । यो सकारात्मक कुरा हो’, उनले भने । अझ सरकारले किताबमा लगाएको कर हटाए पाठक बढ्ने उनको बुझाइ छ ।

प्रकाशित मिति: शुक्रबार, भदौ २६, २०७७ २३:३९