सामाजिक सञ्जालमा आक्राेश, ‘स्टप डेमोसाइड पीएम ओली’

A+ A A-

निषेधाज्ञाका कारण जनता भोकभोकै मर्न बाध्य भएको भन्दै अहिले सामाजिक सञ्जालमा सरकारको चर्को आलोचना हुन थालेको छ ।

काम नपाएर, घरबेटीले निकालेर भोको पेट सडकमा पुगेका मजदुरहरूको पीडा एकपछि अर्को गर्दै सामाजिक सञ्जालमा भाइरल भइरहँदा जनतामा एक प्रकारकाे आक्राेश पैदा हुन थालेको छ ।

मंगलबार बेलुकी ९ बजेदेखि युवाहरूको एक समूहले प्रधानमन्त्री केपी ओलीको असफलता, नेपाली जनताले अनाहकमा मृत्युवरण गरिरहँदा पनि प्रधानमन्त्रीको उदासीनता र भोकै मर्न बाध्य जनताको दु:खलाई इंगित गर्दै सामाजिक सञ्जालमा 'स्टप डेमोसाइड पीएम ओली' भनेर पाेस्ट गर्न थाले ।

सरकारको निरीहता र हेलचेक्र्याइँले आजित जनताले ती युवाहरूको पाेस्टलाई कपि गर्दै सामाजिक सञ्जालमा सरकारप्रतिको आक्रोश पोख्न थाले ।

कोरोना संक्रमणको नाममा चार महिनाभन्दा बढी समयसम्म जनतालाई घरभित्र थुन्दै भोकै मार्ने प्रयास गरेको, दायित्वबाट पन्छिएको जस्ता आराेप लेख्दै तिनै युवाहरूको स्टाटस कपि गर्दै सामाजिक सञ्जाल भर्न थाले ।

नेपाली जनता नै आजित बनेको बेला सरकार हत्यारा हो भन्ने किसिमले आएको स्टाटसले अहिले सामाजिक सञ्जाल गर्माएको छ । सो स्टाटसले १७ घण्टा बित्न नपाउँदै ट्रेण्डको रूप लिएको छ ।

अहिले ट्विटरदेखि फेसबुकसम्म हजारौँको संख्याले ह्यासट्यागसहित 'स्टप डेमोसाइड पीएम ओली' भन्ने नारा लेखेर भर्चुअल विरोध जनाइरहेका छन् । अभियानकर्मीदेखि राजनीतिक दलका नेताहरूले समेत समर्थन जनाउँदै 'स्टप डेमोसाइड पीएम' नारा आफ्ना समाजिक सञ्जालमा लेखिरहेका छन् ।

ट्विटर प्रयोगकर्ता सौरभ कार्की सामाजिक सञ्जालमा भाइरल भएको ह्यासट्यागसहितको उक्त नारा सरकारको निर्लज्जताको प्रमाण भएको बताउँछन् ।

उनी जनताको दु:खमा रमाउने सरकारप्रतिको जनताको आक्रोश यस शब्दले उजागर गरेको बताउँछन् । यो शब्द हत्यारा सरकारको उपज भएको भन्दै सामूहिक हत्याराको ट्याग भिराउनु गलत नभएको बताउँछन् ।

यस्तै, ट्रेण्डलाई सर्मथन गर्दै अहिले प्रधानमन्त्री केपी शर्मा ओलीका विगतका भाषण र स्लोगन एकएक गर्दै सामाजिक सञ्जालमा आउन थालेका छन् ।

ट्विटरमा एक व्यक्तिले प्रधानमन्त्रीको खाना खर्च र चिया खर्चको विवरण राख्दै नयाँ युगको सुरुवात भनी ब्यंग्य गर्दै लेखेका छन्, ‘चिया र खानामा नै २० अर्ब खर्च गर्ने हाम्रो सरकारले भोकै मर्न बाध्य जनतालाई पेट भर्न १ अर्ब पनि खर्च गर्न सकेन ।

त्यस्तै, प्रमोद न्यौपाने नाम गरेका व्यक्तिले पनि ओलीको नयाँ युग भनेको भोका जनता मार्ने रहेछ भन्दै ट्विट् गरेका छन् । त्यस्तै, परी नामको ट्विटरमा ‘सरकारको देश बनाउने नाटक खत्तम भए, भोका जनतालाई हेर्ने कि’ भन्दै लेखिएको छ ।

योसँगै भारतीय पत्रिका हिन्दुस्तान टाइम्सले महामारीबाट भोका नेपाली भारत फर्कंदै भनेर लेखेको समाचार पनि सामाजिक सञ्जालमा भाइरल बनेको छ । जनताले हिन्दुुस्तान टाइम्सको समाचारलाई सरकारको निर्लज्जताको पराकाष्ठा भएको भन्दै फेसबुक, ट्विटरलगायतका सामाजिक सञ्जालमा पाेस्ट गरिरहेका छन् ।

छोटो समयमा नै आन्दोलनको रूप देखिएको 'स्टप डेमाेसाइड पीएम ओली' वाक्यको ट्रेण्डमा जनताको सरकारप्रतिको आक्रोश कति हदसम्म बढिसकेको छ भन्ने सहजै अनुमान लगाउन सकिन्छ ।

सामान्य युवाहरूले पोखेको आक्रोशलाई एक दिन बित्न नपाउँदै हजारौँले साझा बनाएका छन् । अहिलेसम्म ट्विटरमा मात्रै ३ हजार ९ सय ५३ जनाले ट्विट गरिसकेका छन् ।

पहिलो पटक सामाजिक सञ्जालमा याे वाक्य राखेका युवा आफूले सम्पूर्ण नेपालीको क्रन्दनलाई सम्बाेधन गर्ने प्रयास गर्दै सामाजिक सञ्जालबाट सकारलाई दबाब दिन चाहेको बताए ।

‘हामी युवाहरू मिलेर सरकारको निर्लज्ज व्यवहारको विरोध गर्नुपर्छ भन्दै सामाजिक सञ्जालमा हत्यारा प्रधानमन्त्री लेख्ने सोच्यौँ,’ उनी भन्छन्, ‘सोच्नुस् न, कोरोनाले अहिले ३ सय १२ जनाको मृत्यु भयो । तीबाहेक हजाराैँले ज्यान गुमाइरहेका छन् । जसमा सयौँले भोको पेट भर्न नसक्दा आत्महत्या गर्न बाध्य छन् । कोही भोको पेट सडकमा आउन बाध्य छन् । बिरामीले अस्पताल नपाउँदै अनाहकमै ज्यान गुमाइरहेका छन् । यो मास मर्डर होइन ? त्यसैले हामीले यो नारा रोज्यौँ ।’

आफूले सुरुवात गरेको काममा नेपाली युवाहरूको साथ देख्दा यसले आन्दोलनकै रूप लिन सक्ने उनी बताउँछन् ।

केहो डेमोसाइडको अर्थ ?

अहिले सामाजिक सञ्जालमा भाइरल भएको अंग्रेजी शब्द डेमोसाइडको अर्थ कतिपय सामाजिक सञ्जालका प्रयोगकर्ताहरूले नबुझिकनै प्रयोग गरेको पनि पाइन्छ ।

वास्तवमा अंग्रेजी शब्द डेमोसाइड भनेको मास मर्डर हो । जसलाई नेपालीमा सामूहिक हत्या भनिन्छ ।

यसकाे 'महामारीको समयमा सरकारले वैकल्पिक उपायको प्रयोग नगरी जनतालाई मर्न बाध्य बनाएकाे' भन्ने बुझिन्छ ।

यसलाई राजनीतिक भाषामा 'कुनै पनि सरकारका उच्च ओहोदामा बस्ने व्यक्तिले एकभन्दा बढी व्यक्ति वा समूहहरूलाई मर्न बाध्य बनाएकाे अवस्थाको सिर्जना गर्नु अर्थात् डेमेसाइड' भन्ने गरिन्छ ।

प्रधानमन्त्री केपी शर्मा ओलीलाई नै किन जनताले 'स्टप डेमोसाइड' भन्नुको अर्थ सरकारको नेतृत्वमा रहेका प्रधानमन्त्रीले चार महिने लकडाउन र निषेधाज्ञामा जनता भोक र रोगले दिनदहाडैै मरिरहँदा पनि वैकल्पिक बाटो नखोजेको र जनतालाई मर्न बाध्य बनाएकाे अाक्राेशका रूपमा लिइएकाे छ ।

प्रकाशित मिति: बुधबार, भदौ २४, २०७७ २२:५३