शेयरबजारमा उछाल, कारोबार ४ अर्बमाथि, यस्तो छ बढ्नुकाे कारण

A+ A A-

मुलुकको वित्तीय अवस्था ठप्प रहेको अवस्थामा एकाएक शेयरबजारमा भने उछाल आएको छ । शेयरकारोबार नै एकै दिन ४ अर्ब रुपैयाँमाथि पुगेको हो ।

लामो समय सुस्त रहेका शेयरबजार निषेधाज्ञामा पनि निर्वाध रूपमा संचालनमा आएपछि कारोबारमा ह्वात्तै वृद्धि भएको हो ।

बुधबार कारोबारमा आएका १ सय ८६ कम्पनीको ९६ लाख ८६ हजार ९ कित्ता शेयर ४५ हजार २ सय ७२ पटक किनबेच हुँदा ४ अर्ब १८ करोड १० लाख ३६ हजार १ सय १५ रुपैयाँको कारोबार भयो ।

वित्तीय स्थिति स्थिर रहेको अवस्थामा कारोबारमा उछाल आई कारोबार रकम नै ४ अर्ब नाघ्नुमा प्रमुख कारण लगानीकर्तामा शेयरबजारप्रतिको विश्वास बढ्नु नै रहेको शेयरबजार विश्लेषक विष्णु वस्याल बताउँछन् ।

‘लामो समयदेखि शेयरबजार वियरिस ट्रेण्डमा थियो, लगानीकर्ता शेयर कहिले बढ्ला भनेर बस्नुपर्ने अवस्थामा थिए,’ उनले भने, ‘तर पछिल्लो केही दिनदेखि बजार लगातार बुलिस ट्रेण्डमा छ । त्यसमाथि पनि निषेधाज्ञामा पनि शेयर कारोबारमा वृद्धि हुँदा शेयरप्रति विश्वास बढ्दै गएको देखिन्छ । बुलिस ट्रेण्डमा भएपछि अवश्य कारोबार माथि नै पुग्छ ।’

खरिदकर्तामा सेन्टिमेन्ट हावी हुँदा पनि शेयर कारोबार बढ्ने बस्याल बताउँछन् ।

त्यस्तै, बजार बढ्नुमा अर्को कारण सुन र डलरको मूल्य आकासिनु पनि प्रमुख छ । नेपाली बजारमा सुनको मूल्य बढेपछि लगानीकर्ता शेयरबजारमा आकर्षित भएका हुन् भने डलरको मूल्यवृद्धिसँगै रेमिट्यान्स बढेको र ब्याजदर घटेका कारण पनि बजारमा सकारात्मक असर देखिएको विश्लेषकहरूको भनाई छ ।

बुधबार निर्जीवन बीमा समूह र जीवन बीमा समूहबाहेकका सबै समूहका परिसूचक उकालो लागेका छन् । कारोबार सुरु भएसँगै उकालो यात्रा तय गरेकाले ८ वटा जलविद्युत कम्पनीले कारोबारमा सर्किट लगाउन सफल भएका छन् ।

लामो समयदेखि जलविद्युत् क्षेत्रको कारोबार उकालो लाग्न नसकेको अवस्थामा बुधबार भने ८ वटै जलविद्युत् कम्पनीले शेयरमूल्य बढाउन सफल बनेका हुन् । योसँगै बुधबार बैंक र जलविद्युतमा लगानीकर्ता झुम्मिएका छन् ।

जलविद्युत् कम्पनीहरूको कारोबार बढ्नुमा शेयर विश्लेषक बस्याल भन्छन्, ‘अरु सेक्टर पहिले नै चलिसकेको र हाइड्रो लामो समयदेखि अलटाइम लोको अवस्थामा नै थियो । लाइफ ननलाइफ प्रोफिट बुक गरेर बैंक र हाइड्रो पावर कम्पनी तल्लो लेबलमा भएको हुनाले त्यतापट्टि पोर्टफोलियो रिस्ट्रचर भयो । त्यसैले पनि हाइड्रोमा र बैंकमा कारोबार गर्ने बढेका हुन् ।’

नेपाली शेयरबजार सेन्टिमेन्टमा चल्ने हुनाले पनि बस्याल अझै केही दिन जलविद्युत् क्षेत्रमा लगानीकर्ताको चाप बढ्ने बताउँछन् ।

योसँगै सुनको मूल्य र डलर मात्रै नभएर बैंकको ब्याजदर एकल विन्दुमा आउनु पनि कारोबार बढ्नुको मुख्य कारण भएको विश्लेषकहरूको ठम्याइ छ ।

बुधबारको शेयरबजारमा उछाल आउँदा पाँचथर पावर कम्पनी, अरुण भ्याली हाइड्रोपावर, राधी विद्युत कम्पनी, जोशी हाइड्रोपावर, युनियन हाइड्रोपावर, ङादी ग्रुप पावर लिमिटेड, रिडी हाइड्रोपावर र अपि पावर कम्पनीको शेयर मूल्य १० प्रतिशतले बढेर कारोबारमा सर्किट लाग्यो ।

पोेजिटिभ सर्किट लागेका हाइड्रोपावरको यस्तो छ शेयरमूल्य

अरुण भ्याली हाइड्रोपावरले बुधबार १० रुपैयाले शेयर मूल्य बढाएको छ । कारोबार सुरु हुँदा प्रतिकित्ता १ सय रुपैयाँ रहेकोमा बढेर अन्तिम कारोबार भने १ सय १० रुपैयाँ प्रतिकित्तामा भयो ।

त्यस्तै, राधी विद्युत कम्पनीले पनि एकै दिन १९ रुपैयाँले शेयर मूल्य बढाएर २ सय ९ रुपैयाँमा बुधबारको अन्तिम कारोबार गर्‍याे ।

जोशी र युनियन हाइड्रोपवरको पनि ६ रुपैयाँ बढेर अन्तिम कारोबार प्रतिकित्ता ६६ रुपैयाँमा भयो । योसँगै ङादीको १३ रुपैयाँ बढेर शेयर मूल्य १ सय ४३ रुपैयाँ प्रतिकित्ता पुग्यो भने रिडीको ९ रुपैयाँले बढेर शेयरमूल्य १ सय ४३ रुपैयाँँ पुगेको छ ।

योसँगै पाँचथर पावर कम्पनीको १३ रुपैयाँले शेयरमूल्य बढेर प्रतिकित्ता १ सय ४३ र अपि पावर कम्पनीको १२ रुपैयाँले बढेर शेयरमूल्य १ सय ३२ रुपैयाँ पुगेको छ ।

प्रकाशित मिति: बुधबार, भदौ १७, २०७७ २१:४५