१५ वटा क्षेत्रमा बैंकहरूकाे कर्जा ३२ खर्ब बढी

A+ A A-

गत वर्ष बैंक तथा वित्तीय संस्थाहरूले १५ वटा क्षेत्रमा कुल ३२ खर्ब रूपैयाँभन्दा बढी कर्जा लगानी गरेका छन् । राष्ट्र बैंकको तथ्याङ्कअनुसार बैंक तथा वित्तीय संस्थाहरूले जेठ मसान्तसम्म ३२ खर्ब २१ करोड रूपैयाँ कर्जा प्रवाह गरेका हुन् ।

अघिल्लो आर्थिक वर्षको सोही अवधिमा बैंक तथा वित्तीय संस्थाहरूले २९ खर्ब ११ अर्ब ८९ करोड रूपैयाँ कर्जा लगानी गरेका थिए ।

कोभिड–१९ जोखिमले गर्दा लगातार ४ महिनासम्म उद्योग व्यवसाय ठप्प भए पनि कर्जा लिनेहरूको संख्यामा भने कमी आएको छैन । त्यसैले अघिल्लो वर्षको तुलनामा गत आर्थिक वर्षमा मात्रै ३ खर्ब २१ करोडले कर्जा प्रवाह बढेको हो ।

ठूला उद्योगी र साना व्यवसायीसमेतले लकडाउनका समयमा बैंक तथा वित्तीय संस्थाहरूबाट कर्जा लिएर व्यवसाय सञ्चालन गरेकाले यस वर्ष व्यवसायिक क्षेत्रमा बढी मात्रामा कर्जा प्रवाह भएको राष्ट्रिय वाणिज्य बैंकका सीईओ किरण श्रेष्ठ बताउँछन् ।

३२ खर्ब रूपैयाँमध्ये २८ खर्ब १५ अर्ब ४० करोड रूपैयाँ वाणिज्य बैंकहरू (क वर्ग)ले लगानी गरेका हुन् ।

यसैगरी, विकास बैंक (ख वर्ग)ले ३ खर्ब ३२ अर्ब ३२ करोड रूपैयाँ लगानी गरेका छन् भने वित्त कम्पनीहरू (ग वर्ग)ले ७४ अर्ब १४ करोड रूपैयाँ कर्जा लगानी गरेका राष्ट्र बैंककाे तथ्याङ्कले देखाउँछ ।

सो अवधिमा सबैभन्दा बढी कर्जा होलसेल तथा रिटेल क्षेत्रमा प्रवाह भएको राष्ट्र बैंकको तथ्याङ्कमा उल्लेख छ । सबैभन्दा धेरै ६ खर्ब ६१ अर्ब ६७ करोड रूपैयाँ होलसेल तथा रिटेलमा प्रवाह भएको हो ।

यसबाहेक कृषि, फरेस्ट्री र पेयपदार्थ उत्पादन क्षेत्रमा ५ खर्ब ५९ अर्ब २८ करोड रूपैयाँ कर्जा प्रदान भएको छ । यसैगरी निर्माण क्षेत्रमा ३ खर्ब ४५ अर्ब ५१ करोड र रियल स्टेटमा २ खर्ब ४० अर्ब ६२ करोड रूपैयाँ कर्जा प्रवाह भएको छ ।

कोरोनाका कारण गत वर्ष पर्यटन क्षेत्रमा सबैभन्दा ठूलाे असर पुग्याे । अघिल्ला आर्थिक वर्षहरूमा जस्तो लगानी गर्ने वातावरण भएन । जसले गर्दा सञ्चालनका लागि मात्रै भए पनि गत जेठ मसान्तसम्म होटल तथा पर्यटन क्षेत्रमा १ खर्ब ४३ अर्ब ८१ करोड रूपैयाँ मात्रै लगानी भयो ।

यस्तै जलविद्युत, ग्याँस र सिँचाइ क्षेत्रमा गत जेठ मसान्तसम्म १ खर्ब ५६ अर्ब ८८ करोड रूपैयाँ कर्जा प्रवाह भएको छ । सो अवधिमा सञ्चार तथा यातायातमा ९९ अर्ब ४३ करोड रूपैयाँ कर्जा लगानी भएकाे छ ।

कर्जा प्रवाह भएका १५ वटा क्षेत्रमध्ये गत आर्थिक वर्षको जेठ मसान्तसम्म सबैभन्दा धेरै लगानी होलसेल तथा रिटेलमा भएको देखिन्छ । वाणिज्य बैंकहरूले पनि सबैभन्द धेरै होलसेल तथा रिटेल क्षेत्रमा नै कर्जा प्रवाह गरेका छन् ।

वाणिज्य बैंकले कृषि तथा वन क्षेत्रमा ५ खर्ब ३३ अर्ब ५८ करोड लगानी गर्दा होलसेल र रिटेलमा ५ खर्ब ९७ अर्ब ५४ करोड रूपैयाँ लगानी गरेका छन् ।

त्यसो त विकास बैंक तथा वित्त कम्पनीहरूले पनि यो क्षेत्रमा लगानी गरेकाे कर्जा अन्य क्षेत्रकाे तुलनामा बढि नै देखिन्छ ।। सोही अवधिमा विकास बैंकहरूले होलसेल तथा रिटेलमा ५३ अर्ब ३८ करोड रूपैयाँ लगानी गर्दा वित्त कम्पनीहरूले १० अर्ब ७४ करोड रूपैयाँले कर्जा लगानी गरेका छन् ।

पछिल्लो समय लकडाउन बढ्दै जाँदा उद्योग व्यवसाय तथा खुद्रा व्यवसायतर्फ कर्जाको माग बढ्दा लगानी पनि सबैभन्दा धैरै यही क्षेत्रमा भएको पाइन्छ ।

घर कर्जामा मात्रै २ खर्ब लगानी

गत जेठ मसान्तसम्म बैंक तथा वित्तीय संस्थाहरूले घर कर्जामा मात्रै २ खर्ब ५७ अर्ब ३७ करोड रूपैयाँ लगानी गरेका छन् । वाणिज्य बैंकहरूले घरनिर्माण तथा खरिदबिक्रीका लागि मात्रै २ खर्ब ६ अर्ब ५० करोड रूपैयाँ कर्जा प्रवाह गरेका देखिन्छ ।

सोही अवधिमा विकास बैंकले घरकर्जामा ४१ अर्ब ९२ करोड रूपैयाँ लगानी गरेका छन् । वित्त कम्पनीले पनि घरकर्जामा ८ अर्ब ९४ करोड रूपैयाँ प्रवाह गरेका छन् ।

प्रकाशित मिति: आइतबार, साउन ३२, २०७७ २०:५०