दुईपाङ्ग्रे सवारी बिक्रीमा इतिहास ब्रेक, चारपाङ्ग्रेको बिक्री शून्य

A+ A A-

लकडाउन खुकुलो भएपछि स्टकमा रहेका सवारीसाधन बिक्री वितरणमा अटो व्यवसायी विभिन्न याेजनाका साथ आक्रमक रूपमा उत्रिएसँगै साना सवारीसाधन किन्नेको घुइँचो लागेको छ ।

तीन महिनासम्म ठप्प रहेको बजार खुकुलो गरेको २ हप्ता बित्न नपाउँदै सवारी किन्नेको चाप बढ्न थालेको हो । दुईपाङ्ग्रे तथा चारपाङ्ग्रे सवारीसाधन बेच्नका लागि अहिले अटो व्यवसायीहरूले विभिन्न स्किम नै स्किम सार्वजनिक गरिरहेका छन् ।

यो पनि पढ्नुहोस

गाडी किन्दा अब सानिमा बैंकबाट ५ देखि ५० लाखसम्म कर्जा पाइने

नाडा अटोमोबाइल एसाेसिएसन नेपालका अनुसार अहिले सवारी किन्ने ग्राहक सामान्य समयको भन्दा ८० प्रतिशतले बढेका छन् । लकाडाउन खुले पनि सार्वजनिक सवारीसाधन सहज रूपमा सञ्चालन हुन केही समय लाग्ने देखिएपछि अधिकांशको ध्यान दुईपाङ्ग्रे स्कुटर तथा मोटरसाइकलतर्फ जान थालेको छ । जसले गर्दा नकिन्ने मनशाय बनाएकाहरू पनि अहिले धमाधम किन्न थालेका छन् ।

बानेश्वरकी सीता थापा स्कुटर किन्ने मनशाय नभए पनि आकर्षक अफर देखेरै किनेको बताउँछिन् । उनी भन्छिन्, ‘सार्वजनिक सवारीसाधन खुलेन, अफिस भने खुलेको १५ दिन भइसक्यो । कसरी जाने ? समस्यामा परेको बेला पैसा नितिरी स्कुटर किन्न सकिने र ब्याज र किस्ता पनि ६ महिनासम्म बुझाउनु नपर्ने भएपछि त सजिलो भइगयो । त्यसैले स्कुटर नकिन्ने विचारमा पुगेकी मैले पनि आज किनेर ल्याएँ ।’

सीता मात्र नभएर अहिले अधिकांश खरिदकर्ताहरू आकर्षक अफर देखेरै सवारीसाधन किन्न थालेका छन् । होण्डाको विक्रेता कम्पनी स्याकार ट्रेडिङका अनुसार पूरै पैसा तिर्नेभन्दा पनि अधिकांश ६ महिनासम्मको छुट लिएर किन्ने खरिदकर्ताहरू धेरै छन् ।

अहिले अटो व्यवसायीहरूले चारपाङ्ग्रे र दुईपाङ्ग्रे दुवै सवारीमा आकर्षक छुट दिए पनि दुईपाङ्ग्रेमा मात्रै भीड बढेको छ । अधिकांश कार व्यवसायीहरूले ४ महिना बितिसक्दा समेत एउटा गाडी पनि बिक्री गर्न सकेका छैनन् ।

यो पनि पढ्नुहोस

अब ५ लाख तिरेर चढ्नुुस् २४ लाखको सुजुकी गाडी

नाडा अटोमोबाइल एसाेसिएसन नेपालका सचिव अनुप बरालले चारचारपाङ्ग्रे गाडी विक्रेताहरू सबैभन्दा मारमा परेको बताए । सुजुकी ब्राण्डको चारचारपाङ्ग्रे सवारी विक्री गर्दै आएका बराल आफूले चार महिना बितिसक्दासमेत एउटा गाडी पनि बिक्री गर्न नसकेको बताए । त्यसो त महिन्द्रा गाडीको विक्री पनि शून्य छ । यस्तै, अन्य कम्पनीका गाडीहरूमा पनि खासै सुधार हुन सकेको छैन ।

स्कुटर र मोटरसाइकलमा मात्रै ग्राहक तानिँदा देखिएजस्तो अटो व्यवसाय भने नफस्टाएको व्यापारीहरूको भनाइ छ ।

लकडाउन पूर्ण रूपले नखोलिँदासम्म सुविधासम्पन्न कारहरूको विक्रीदर नबढ्ने देखिएको छ ।

त्यसो त बजार सहज हुँदै जाँदा आयातमा पनि सुधार हुँदै गएको छ । भन्सार विभागका अनुसार पछिल्लो २ महिनामा भन्दा जेठ महिनामा सवारी आयातमा सुधार भएको छ ।

विभागको तथ्याङ्कअनुसार जेठ महिनामा विदेशबाट २ अर्ब ३० करोड रुपैयाँबराबरका सवारीसाधन आयात भएका छन् । जसमा दुईपाङ्ग्रे सवारी ८० प्रतिशतभन्दा बढी छन् ।

कोरोनाको जोखिम बढेसँगै लकडाउन भएपछि आयात ठप्पजस्तै बनेको थियो । वैशाखमा जम्मा ५५ करोड रुपैयाँबराबरका सवारीसाधन मात्र आयात भएको थियो भने लकडाउन खुकुलो भएसँगै आयात १ अर्ब ७५ करोडले वृद्धि भएको हो ।

त्यसो त चालू आर्थिक वर्षको साउन महिनामा ७ अर्ब २९ करोड, भदौमा ११ अर्ब १६ करोड, असोजमा ८ अर्ब ९१ करोड, कात्तिकमा ७ अर्ब ४० करोड, मंसिरमा ६ अर्ब ६० करोड, पुसमा ५ अर्ब ५० करोड, माघमा ५ अर्ब ४९ करोड, फागुनमा ५ अर्ब ८ करोड रुपैयाँका सवारीसाधन आयात भएका छन् ।

त्यस्तै, लकडाउन सुरु भएको महिना चैतमा आयात घटेर १ अर्ब ५८ करोड र वैशाखमा ५५ करोडको मात्रै यातायात भएको तथ्याङ्कले देखाएकाे छ । जेठमा भने लकडाउन केही खुकुलो भएसँगै १ अर्ब ७५ करोडले बढेर २ अर्ब ३० करोड रुपैँयाबराबरका सवारीसाधन आयात भएका हुन्को ।

तीन महिना बन्द भएको बजारमा तीन महिनाबराबरकै बिक्री गर्न तम्सिएका व्यापारी ग्राहकलाई आकर्षण गर्ने चक्करमा शून्य प्रतिशत डाउनपेमेन्टदेखि शून्य प्रतिशत ब्याजमा स्कुटर, मोटरसाइकल तथा कारहरू बिक्रीवितरण गरिरहेका छन् ।

यो पनि पढ्नुहोस

कायो मोटरसाइकल खरिदमा ५० हजार रुपैयाँको छुट याेजना अब ४ दिन बाँकी

त्यति मात्र नभएर विश्व अटो बजार नै सवारीसाधन विक्रीमा आक्रामक भइरहँदा व्यवसायीहरू पनि मौकाको फाइदा उठाउँदै धेरैभन्दा धेरै सवारी विक्री गर्न तम्सिइरहेका छन् । त्यसो त अहिलेको मागलाई दृष्टिगत गरेर जगदम्बा मोटर्सले एसेम्बल प्लान्ट्स नै स्थापना गरेर मोटरसाइकल तथा स्कुटर एसेम्बल गर्दै आएको छ ।

सवारीकर्जा योजनाः कसरी चिप्लिए युवराज खतिवडा ?

प्रकाशित मिति: सोमबार, असार २२, २०७७ १४:२४