आफैँले सुरु गरेको अनुसन्धान नसकी बिदा हुँदै आईजीपी ज्ञवाली

प्रहरी महानिरीक्षक (आईजीपी) ठाकुरप्रसाद ज्ञवालीको कार्यकाल सकिन अब १५ दिन मात्र बाँकी छ । ३० वर्षे सेवा अवधिका कारण उनी २४ असारमा अनिवार्य अवकासमा जान लागेका हुन् ।

आईजीपी ज्ञवालीको कार्यकाल विश्वभर महामारीको रूपमा फैलिएको कोरोना भाइरस (कोभिड- १९)का कारण उपलब्धिमूलक हुन सकेको छैन । गत २८ माघमा आईजीपी नियुक्त भएका ज्ञवालीको जम्मा कार्यकालको ५ महिनामध्ये करिब ४ महिना लकडाउनमै बितेका कारण उनको कार्यकालमा सरुवा, बढुवाको कामबाहेक देशभरको प्रहरीले कुनै ठूलो अप्रेसन चलाउन सकेको छैन ।

आईजीपी ज्ञवालीले यसअघि शिलापत्र सँगको अन्तर्वार्तामा कोरोनाको महामारीसँग प्रहरी आफैा बचेर अरूलाई पनि सुरक्षित गर्नुपर्ने बाध्यतामा रहेको भन्दै बाँकी प्रहरीको काम कारबाहीमा केही सुस्तता आएको स्वीकार गरेका थिए । ज्ञवालीको कार्यकालमा प्रहरी नायव निरीक्षक (सई)देखि अतिरिक्त प्रहरी महानिरीक्षक (एआईजी)सम्मको बढुवा भने भएको छ ।

उनको कार्यकालको सबैभन्दा उलब्धिमूलक काम नै बढुवा भए पनि त्यसमा समेत आफू निकटकालाई मात्र बढुवा गरेर व्यावसायिक प्रहरीको मनोबल घटाएको आरोप उनीमाथि लागेको छ ।

आफैँले अनुसन्धान गरेको निर्मला प्रकरण जहाँको त्यहीँ

सबैभन्दा चर्चामा रहेको कञ्चनपुरकी किशोरी निर्मला पन्त बलात्कार र हत्या प्रकरण पनि आईजीपी ज्ञवालीले सुल्झाउन सकेका छैनन् । अब उनको कार्यकालको बाँकी १५ दिनमा निर्मला हत्याको अनुसन्धान सकिने सङ्केतसमेत देखिएको छैन ।

आईजीपी ज्ञवाली प्रहरीको केन्द्रीय अनुसन्धान ब्युरो (सीआईबी)को एसएसपी हुँदा घटनालगत्तै उनी निर्मला हत्याको अनुसन्धान गर्न कञ्चनपुर पुगेका थिए । निर्मला पन्तको ११ साउन २०७५ मा बलात्कापछि हत्या भएको थियो ।

उनको बलात्कारपछि हत्या हुँदा आईजीपी सर्वेन्द्र खनाल थिए । खनालको कार्यकाल निर्मला पन्तको हत्या अनुसन्धान गर्न नसक्दा आलोचित हुन पुगेको थियो ।

खनालले ३० वर्षे सेवा अवधिका कारण अवकास पाएका हुन् । खनालले अवकासको मुखमा पुग्दा निर्मला पन्तको अनुसन्धान सुल्झाउन हरप्रयास गरे पनि सफल भने हुन सकेनन् । अवकासको १ हप्ताअघि मात्र आईजीपी खनालले सचिवालयका डीएसपी गौतम केसीलाई कञ्चनपुर पठाएका थिए ।

उसो त निर्मला हत्याको अनुसन्धान निष्कर्षमा पुर्‍याउन आफू निकटका एसपी मुकुन्द मरासिनीलाई कञ्चनपुर पठाएका थिए । तर, उनले अनुसन्धान गर्न सकेका थिएनन् ।

त्यसबीचमा आईजीपी खनाल आफैँ कैलालीसम्म पनि पुगेका थिए । तर, अनुसन्धान प्रभावकारी र सम्भव हुन सकेन । आईजीपी ज्ञवालीले कार्यकाल सम्हाल्दा अपराधी कुनै हालका उम्कन नपाउने र निर्मला हत्याको अनुसन्धान चाँडै पूरा हुने बताएका थिए ।

निर्मला पन्तको हत्या अनुसन्धान सुल्झिन नसक्दा निर्मला पन्त प्रकणरमा निलम्बनमा परेका प्रहरी अधिकारीमाथि अन्याय भएको कतिपय प्रहरी अधिकारीको भनाइ छ ।

निर्मला पन्त हत्या अनुसन्धान गर्न कञ्चनपुर पुगेका सीआईबीका डीएसपी अंगुर जीसीलगायत आधा दर्जन प्रहरी निलम्बनमा परेका थिए । त्यसरी नै कञ्चनपुरका तत्कालीन एसपी दिल्लीराज बिष्ट र एक जना प्रहरी निरीक्षक बर्खास्तगीमा परेका थिए ।

प्रकाशित मिति: मंगलबार, असार ९, २०७७ १३:१४