‘बरु सबैजना एकै चिहान भएको भए आनन्दै हुन्थ्यो’

A+ A A-

बेलुकाको खाना बनाउने तयारी गर्दै थिइन् कलैया भरवलियाकी सुनिता ठाकुर । एक्कासी हावाहुरी चल्न थालेपछि घरको छानो उडाउन लाग्यो । घरभित्रै खेलिरहेको सानो छोरालाई काखी च्यापेर उनी हतारिदै बाहिर निस्किइन् । छोरालाई बल्लतल्ल जोगाएर के निस्कीएकी थिइन् घरको पिल्लर उनको ढाडमा बजारियो । उनी उठ्नै नसक्ने गरी थचारिइन् ।

काठमाडौंको त्रिभुवन शिक्षण अस्पतालको अर्थोपेडिक वाड बेड नं १०११ नम्बरकी (यो समाचार तयार पार्दासम्म) घाइते हुन् उनी । ढाडमा पिलर बजारिएर अस्पताल परेकी सुनिता घाइते भएको दुःख भन्दा छोरो बचाउन सकेकोमा खुसी देखिन्थन् । काखे छोरो बचाउन सकेकी सुनिता भने अरु दुई छोराकाबारेमा भने अनभिज्ञ छिन् । उनका अरु दुई छोरा कहाँ छन् के गर्दैछन् ? केही थाहा छैन उलनाई ।

सुनिता भन्छिन्, ‘घर सबै हावाले उडायो । ६ वटा बाख्रा थिए ति पनि सबै मरे । अब के खाने, कहाँ बस्ने, छोराछोरीलाई कसरी पढाउने यही समस्याले उनी चिन्तित छिन् । पिलर बजारिएको उनको ढाड बुधबार शल्यक्रिया गरेपछि मात्रै उनको अस्पताल बसाई कति लम्बिने हो त्यसबारेमा टुंगो लाग्ने छ ।

००००००००००००००००००००००००

शिक्षण अस्पतालको अर्थोपेडिक वाड बेड नम्बर १०१२ मा उपचार्थ १० बर्षिय गुलमहम्मदलाई आमाको मृत्युबारे थाहा छैन । गुलमहम्मद भने अस्पताको बेडबाट आमा कहाँ छिन् भन्दै यताउता आँखा डुलाइरहन्छन् ।

बाराको सुवर्ण गाउँपालिका ८ हर्दियाका १० वर्षीय गुलमहम्मद अन्सारी पनि आइतबार साँझ घरमै थिए । आमा तरिखा खातुन खाना खाने तयारी गर्दै थिइन् । तर असिना पानीसँगै आएको हावाहुरीले उनले पकाएको खाना पनि खान दिएन । हावाहुरी चल्न थालेपछि छोराछोरीलाई जोगाउन थालिन् तरिखा खातुन । तर उनले घरभित्र रहेको छोरा गुलमहम्मदलाई घरबाहिर निकाल्न पाइनन् ।

सन्तानलाई बचाउने क्रममा घरको छतले किचिएर तारिखाको मृत्यु भयो भने छोरा गुलमहम्मद घरभित्रै गम्भिर घाइते हुन पुगे । शिक्षण अस्पतालमा गुलमहम्मदलाई कुर्न बसेका उनका ठूलोबुबाले यसो भनिरहँदा छोरा गुलमहम्मद भने शिक्षण अस्पतालको बेड नम्बर १०१२ मा शरीरको आधा पाटो चलाउन सकिरहेका थिएनन् । गुलमहम्मदको एक दिदी र दुई भाइ छन् ।

छोरा गुलमहम्मदतिर नजर लाउँदै ठूलोबुवा जुबैर मिया अन्सारी भन्छन्, ‘अब यसलाई कसरी भनौं कि आमाको मृत्यु भइसकेको छ । आफ्नै खेतबारी छैन, अब त घर पनि छैन् खान बस्न पनि समस्या भएको छ । अस्पतालमा चाहिँ उपचार निशुल्क भएको छ ।’

००००००००००००००००००००००००

शिक्षण अस्पतालको अर्थोपेडिक वाडकै वेड नं. १००२ मा छन्, सुरेश पटेल । काठमाडौमा उपचार गराइरहेका सात जना बिरामीमध्येका एक सुरेश पनि हुन् । उनीसँगै उपचारको लागि काठमाडौं ल्याइएका थिए उनका ३ बर्षिय छोरा अमन पटेल । उनीहरुको अवस्था सामान्य बन्दै गएको डाक्टरहरुले बताएका छन् ।

तर सुरेशकी श्रीमती गीतादेवी पनि शिक्षण अस्पतालमै उपचार्थ छिन् । तर कहाँ छिन् गीतादेवी भन्ने सुरेशलाई थाहा छैन । सुरेश भन्छन्, ‘हामी ३ जना अस्पतालमा छौं । २ छोरी बेहोस भएका थिए उनीहरु बारामा नै छन् तर कस्तो अवस्थामा छन् त्यो पनि थाहा छैन ।’

दशा लागेको रहेछ हामीलाई । हावाले घर सबै उडाएर कता लग्यो कता ? अब घर गएर के के गर्ने ? के खाने ? कहाँ बस्ने ? छोराछोरीलाई के गरेर पाल्ने ? यती भनिरहँदा शुरेसका आँखाभरी आँशु थिए । एक हातले आँशु पुछ्दै उनी भन्छन्, बरु सबैजना एकै चिहान भएको भए आनन्दै हुन्थ्यो ।’

प्रकाशित मिति: बुधबार, चैत २०, २०७५ ०४:३६