नाफामा सेञ्चुरी बैंक अगाडि, बैंक अफ काठमाण्डूकाे नाफा २७ प्रतिशतले घट्याे

A+ A A-

वाणिज्य बैंकहरूले त्रैमासको वित्तीय विवरण सार्वजनिक गर्न सुरु गरिसकेका छन् । अहिलेसम्म पाँचवटा बैंकले वित्तीय विवरण सार्वजनिक गरिसकेका छन् । सार्वजनिक वित्तीय विवरणअनुसार सेञ्चुरी कमर्सियल बैंकले नाफा बढाएकाे छ भने एसबीआई बैंकले कम नाफा आर्जन गरेकाे छ ।

कसले कति कमाए ?

सेञ्चुरी कमर्सियल बैंक

सेञ्चुरी कमर्सियल बैंकले चालू आर्थिक वर्षकाे तेस्रो त्रैमासमा ५१ करोड ५७ लाख ७९ हजार नाफा कमाएको छ । सार्वजनिक गरिएकाे वित्तीय विवरणअनुसार बैंकले ४९.६ प्रशितले नाफा बढाएको छ । जुन अघिल्लो वर्ष भन्दा ३० करोड ५१ लाख रुपैँयाले बढी हो । गत वर्ष साेही अवधिमा बैंकले २१ कराेड ६ लाख ७९ हजार नाफा आर्जन गरेकाे थियाे ।

चालू आवमा बैंकले वितरणयोग्य नाफा १३ करोड ४१ लाख १५ हजार रुपैयाँ कमाएको छ । त्यस्तै, सञ्चालन नाफा पनि १ अर्ब २६ करोड ५७ लाख रुपैयाँ छ ।

हिमालयन बैंक

तेस्राे त्रैमाससम्मको विवरण हेर्ने हो भने हिमालयन बैंकको नाफा १५ प्रतिशतले बढेको छ । अर्थात् २ अर्ब ३७ करोड १७ लाख रुपैयाँ नाफा कमाएको छ भने वितरण योग्य नाफा ८२ करोड ८७ लाख ६३ हजार रुपैयाँ छ ।

त्यस्तै, बैंकले चैत मसान्तसम्म ३ अर्ब ८ करोड ६४ लाख रुपैँयाँ सञ्चालन मुनाफा कमाएको छ । त्यस्तै बैंककाे खुद आम्दानी ३ अर्ब ७५ करोड ३४ लाख रुपैयाँ छ ।

प्राइम बैंक

प्राइम बैंकले तेस्रो त्रैमासमा २ अर्ब ३ करोड रुपैयाँ नाफा गरेको छ । बैंकले सार्वजनिक गरेको त्रैमासिक विवरणअनुसार अघिल्लो आवकाे तुलनामा यस वर्ष सोही अवधिमा ४८ करोड ४७ लाख रुपैयाँ बढी हो ।

कैलाश विकास बैंकलाई प्राप्ति गरेपश्चात् बैंकको नाफा पनि बढेको हो । बैंकको खुद आम्दानी ३ अर्ब ३४ करोड छ भने सञ्चालन मुनाफा पनि बढेको छ । वित्तीय विवरणअनुसार २ अर्ब ८९ करोड रुपैया सञ्चालन नाफा कमाएको छ ।

बैंक अफ काठमाण्डू

बैंक अफ काठमाण्डूको नाफा घटेको छ । अघिल्लो वर्षको चैत मसान्तभन्दा चालू आर्थिक वर्षको सोही अवधिमा २७ प्रतिशतले घटेकाे हो ।

चालू आर्थिक वर्षको तेस्रो त्रैमासमा बैंकले ८७ करोड ३४ लाख ९३ हजार रुपैयाँको नाफा आर्जन गरेको छ । अघिल्लो वर्षकाे साेही अवधिमा बैंकले १ अर्ब २० करोड ४६ लाख रुपैयाँ नाफा कमाएको थियो ।

एसबीआई बैंक

लकडाउनकै बीचमा बैंकहरूले नाफामा वृद्धि गरेका वित्तीय विवरण सार्वजनिक गरिरहेको अवस्थामा एसबीआई बैंकले भने तेस्रो त्रैमासमा नाफामा १०.१४ प्रतिशतले कमी आएकाे छ । सार्वजनिक वित्तीय विवरणअनुसार बैंकले चैत मसान्तसम्ममा १ अर्ब ४३ करोड रुपैयाँ मात्र नाफा कमाएको छ ।

यो अघिल्लो वर्षको सोही अवधिको तुलनामा १०.१४ प्रतिशत अर्थात १६ करोड २४ लाख रुपैयाँले कम हो । बैंकले ३ अर्ब १३ करोड ९८ लाख रुपैयाँ खुद आम्दानी गरेको छ । गत वर्षको तुलनामा खुद आम्दानी पनि कम हो ।

बैंकको सञ्चालन मुनाफा पनि १५ लाखले घटेको छ । चालू आर्थिक वर्षको चैत मसान्तसम्ममा बैंकले २ अर्ब ४ करोड ९१ लाख रुपैयाँ सञ्चालन मुनाफा गरेको छ ।

प्रकाशित मिति: सोमबार, वैशाख २९, २०७७ १८:३१