५० लाख धरौटी फिर्ता माग्दै श्रममन्त्री यादवलाई ज्ञापनपत्र

A+ A A-

नेपाल वैदेशिक रोजगार व्यवसायी संघले व्यवसायीले राखेको नगद ५० लाख धरौटी फिर्ता गरिदिन माग गर्दै श्रम रोजगार तथा सामाजिक सुरक्षामन्त्री रामेश्वर राय यादवलाई ज्ञापनपत्र बुझाएको छ । संघका अध्यक्ष विष्णु गैरे नेतृत्वमा सोमबार मन्त्रालय पुगेर संघले कोरोना महामारीका कारण व्यवसाय ठप्प भएको भन्दै नगद धरौटी फिर्ता गरिदिन माग गरेको हो ।

संघले २०६२ सालमा इराकमा १२ जना नेपालीहरूको निर्मम हत्या भएको घटनाका कारण उत्तेजित हुलहुज्जतले वैदेशिक रोजगार व्यावसायीको कार्यालयमा आगजनी र तोडफोडबाट क्षति भएको बेला व्यवसायीले राखेको धरौटी १ वर्ष चलाउन दिएको स्मरण गराउँदै अहिले पनि नगद धरौटी फिर्ता गरिदिन श्रममन्त्रीलाई आग्रह गरिएको संघका सचिव मेघनाथ भुर्तेलले जानकारी दिए ।

त्यसैगरी, वार्षिक १ सय जना कामदार विदेश नपठाए म्यानपावर कम्पनी खारेज हुने प्रावधानलाई पनि तत्काल फुकुवा गरी सहजीकरण गर्नसमेत माग गरेको छ । यसअघि सरकारले वार्षिक सय जना कामदार अनिवार्य विदेश पठाउनुपर्ने प्रावधान वैदेशिक रोजगार ऐन २०६४ संशाेधन गर्ने निर्णय गरिसकेको छ । सोहीअनुरूप त्यसको जिम्मेवारी लिँदै आगामी असारभित्र नै प्रक्रिया टुंगो लगाइसक्न संघले मन्त्रीको ध्यानाकर्षण गरेको छ ।

त्यस्तै, व्यवसायीले तिर्ने घर बहाल कर, आयकर, व्यवसाय करलगायतका राजस्वमा छुट दिन संघले माग गरेको छ । व्यवसायीले दिएको ऋणको ब्याजमा छुट दिने वा अनुदान दिन सरकासँग संघले माग गरेको छ । चैत्र मसान्तसम्म तिर्न नसकेको नपाएको ब्याजलाई असार मसान्तसम्ममा तिर्दा हर्जना नलिने व्यवस्था गर्न पनि संङले माग गरेको छ । त्यस्तै भाखा नाघेका ऋण तिर्ने अवधि १ वर्ष थप गरी ऋण नवीकरण गर्ने व्यवस्था गर्न पनि माग गरिएको छ ।

संघको नेतृत्वमा मन्त्रालय गएको टोलीमा नेपाल लोकत्रान्त्रिक वैदेशिक रोजगार एसोसिएसन, प्रगतिशील व्यवसायी मन्चलगायत विभिन्न व्यवसायी घटकका अध्यक्षलगायत व्यवसायीको प्रतिनिधित्व रहेको थियो ।