यी हुन् लकडाउनमा तपाईंले पाउने बैंकिङ सुविधा

A+ A A-

के तपाईंलाई थाहा छ ? लकडाउनले समस्या मात्र होइन, सहुलियत पनि दिएको छ नि ! रोजगारविहीन भएर घरमा बसिरहेको अवस्थामा सरकारले विभिन्न राहत प्याकेज ल्याइरहेको छ भने बैंकमा किस्ता कसरी बुझाउने ? आम्दानी ठप्प भएपछि के गर्ने ? कसरी कर्जा चुकाउने आदि ? समस्याहरूलाई लिएर तनावमा हुनुहन्छ भने तपाईंका लागि उपयोगी बन्न सक्छ ।

सरकारले लकडाउनले साना पसलेदेखि व्यक्तिगत कर्जाहरूमा व्याजमा छुट दिने, किस्ता तिर्ने समय थप्ने, निक्षेपको ब्याज बढाउने र तपाईंलाई सहुलियत दरमा कर्जा दिने व्यवस्था पनि गरेको छ ।

लकडाउनलाई नै लक्षित गरेर राष्ट्र बैंकले भर्खरै आफ्नो ६५औँ वार्षिक उत्सवमा राहत प्याकेजको घोषणा गरेको छ ।

अब तपाईं सोच्नुहोला यी त ठूलाठूला व्यवसायी तथा ऋणीका लागि मात्र होला भनेर । पक्कै पनि होइन । व्यक्तिगत रूपमा जुनसुकै बैंंकहरूबाट कर्जा लिनुभएको छ र तपाईंलाई तिर्न समस्या भइरहको छ । अर्कोतर्फ खराब ऋणीको सूचीमा पो पर्ने हो कि भन्ने चिन्ता लागेको छ भने धन्दा नमान्नुहोस् ।

सरकारले किस्ता ढिलो तिर्न सक्ने व्यवस्था गरिसकेको छ । अर्थात् तपाईंले चैत, वैशाख र जेठ महिनाको किस्ता असार अन्तिमसम्म सुस्तरी तिर्न सक्नुहुनेछ । त्यसमा जरिमाना पनि लाग्दैन ।

त्यति मात्र होइन, पैसा घरमा छ किस्ता तिर्न पाए ढुक्क हुन्थ्यो भन्ने लाग्छ भने विभिन्न अनलाइन एपहरू, जस्तै: आईपीएस कनेक्ट, ईसेवा जस्ता मोबाइल बैंकिङमार्फत् तिर्न सक्नुहुनेछ ।

यसरी समयमै किस्ता तिर्दा तपाईंले १० प्रतिशतसम्म छुट पाउनुहुन्छ । उदाहरणका लागि तपाईंले मासिक २० हजार रुपैयाँ किस्ता तिर्दै आउनुभएको छ भने अब तिर्दा तपाईंले २ हजार छुट पाउनुहुन्छ । यानिकी तपाईंले अन्य समयको भन्दा २ हजार रुपैयाँ कम पैसा तिर्नुहुनेछ ।

त्यति मात्र होइन, तपाईं व्यवसायी हुनुहुन्छ र लकडाउनले व्यवसाय ठप्प भयो । बैंकबाट कर्जा लिनुभएको छ, अब कसरी तिर्ने सोच्दै हुनुहुन्छ भने राष्ट्र बैंकले पुनर्कर्जाको व्यवस्था पनि गरेको छ ।

राष्ट्र बैंकले हिजो मात्र साना तथा मझौला उद्योग, पर्यटन र कोभिड-१९ को प्रभाव अत्यधिक परेका क्षेत्रमा प्रादेशिक सन्तुलनसमेत कायम हुनेगरी यस बैंकबाट प्रदान गरिने पुनर्कर्जा सहज ढंगले प्रवाह गर्न पुनर्कर्जा कार्यविधिमा संशोधन गरिने जनाएको छ ।

साथै, ६० अर्ब रुपैयाँको विद्यमान पुनर्कर्जा कोषलाई आवश्यकताअनुसार क्रमशः वृद्धि गर्दै लैजाने व्यवस्थासमेत मिलाइने उल्लेख गरेको छ ।

त्यस्तै, कोरोना प्रभावित क्षेत्र जस्तै: हाललाई उदयपुर र अब हुन सक्ने जोखिमपूर्ण क्षेत्रका वासिन्दालाई सहुलियतपूर्ण कर्जाको व्यवस्थाका लागि गृहकार्य थालिसकेको छ ।

यसअन्तर्गत त्यस्ता कोरोना प्रभावित क्षेत्रमा प्रवाह भएका कर्जाहरूलाई पुनतार्लिकीकरण तथा पुनर्संरचना गर्न सकिने सुविधा प्रदान गर्ने भएको छ ।

त्यसमाथि पनि तपाईंले खाद्ययवस्तु, औषधि जस्ता अत्यावश्यक वस्तुहरूको बिक्री, वितरण गरिरहनुभएको छ भने लकडाउनमा पनि तपाईंले सस्तो दरमा कर्जा लिन पाउनुहुनेछ, त्यो पनि ५ दिनभित्रै ।

यो एउटा बैंकमा मात्र नभएर सबै वाणिज्य बैंकहरूबाट लिन सक्नुुहुनेछ । यसरी लिँदा अन्य कर्जाको ब्याजभन्दा सस्तो दरमा लिन सकिनेछ ।

किसानको ऋण सरकारले तिरोस्, सुविधा दिन तयार छौँ

त्यस्तै, लकडाउनलाई नै लक्षित गर्दै तपाईंले जुनसुकै बैंक तथा वित्तीय संस्थाहरूको एटीएम मेसिनबाट तपाईंले पैसा निकाल्न सक्नुहुनेछ । यसमा कुनै शुल्क नलाग्ने व्यवस्था गरिएको छ । अर्थात् तपाईंले जुनसुकै बैंकको एटीएम मेसिन प्रयोग गर्दा शुल्कबापत १ सय रुपैयाँसम्म तिर्नुपर्थ्यो भने अहिले सो शुल्क तिर्नुपर्दैन ।

त्यस्तै, बीमातर्फ पनि विभिन्न योजनाहरू सार्वजनिक भइसकेको छन् । विश्वमै पहिलो पटक नेपाली बीमा कम्पनीहरूले कोरोना बीमा पनि सञ्चालनमा ल्याएका छन् । यसले कोरोना बीमा पनि गर्न सक्नुहुनेछ।

अहिले कोरोनको संक्रमणको जोखिमले नयाँ बीमा गर्न नसके पनि तपाईंले बीमाबापतको भुक्तानी दाबी गर्न सक्नुहुनेछ । अनलाइनबाट बीमा दाबी गरेमा तुरुन्तै भुत्तानी हुने बीमा समितिका अध्यक्ष चिरञ्जीवी चापागाईं बताउँछन् । चपागाईंका अनुसार बीमा दाबी पनि घरमै बसेर अनलाइनबाट गर्न सकिनेछ ।

यी त भए बैंक तथा वित्तीय संस्थाबाट लागू भइसकेका सहुलियतपूर्ण योजनाहरू । तीबाहेक विभिन्न व्यावसायिक सङ्गठनहरूले २ वर्षका लागि नबढ्ने गरी कर्जाको ब्याजदर ५ प्रतिशतमा पुर्‍याउनुपर्ने, लकडाउनको अवधिभर बैंक तथा वित्तीय संस्थाबाट लिएको व्यावसायिक कर्जाअन्तर्गतका ब्याज मिनाहा हुनुपर्नेजस्ता राहतको प्याकेज ल्याउन राष्ट्र बैंकलाई दबाब दिइरहेका छन् ।

ब्याजदर छुटको कसरतमा राष्ट्र बैंक, व्यवसायी मख्ख, बैंक त्रसित

त्यसैले लकडाउनले व्यवसाय चौपट पार्‍यो, कर्जा तिर्न सकिनँ, धितोे लीलाम हुने हो कि, जरिमाना लाग्ला कि भन्ने चिन्तामा हुनुहुन्छ भने अब चिन्ताबाट मुक्त हुनुहोस् र लकडाउनमा नयाँ के गर्न सकिन्छ, त्यसतर्फ लाग्नुहोस् । सरकारले राहत प्याकेज ल्याइरहेको छ । त्यसैले तनावमा हुनुपर्ने अवस्था छैन ।

प्रकाशित मिति: सोमबार, वैशाख १५, २०७७ १३:४२