सुलभलाई तेस्रो पटक म्याद थप्दै प्रहरी, १२ सय थर्मल गन कालो बजारी गरेको निष्कर्ष

शंकर ग्रुपका सञ्चालक सुलभ अग्रवालबारे प्रहरीले अझै केही नयाँ ठोस तथ्य फेला पार्न सकेको छैन । २५ चैतमा तापक्रम नाप्ने ‘थर्मल गन’को कालो बजारी गर्दा प्रहरीको कोभर्ट अपरेसनमा पक्राउ परेका अग्रवालबारे प्रहरीले विशेष अनुसन्धान थालेको थियो ।

तर, पक्राउ परेको करिब २ हप्तासम्म पनि प्रहरीले नयाँ तथ्य भने फेला पार्न सकेको छैन । यसबीचमा प्रहरीले दुईचोटि अनुसन्धानका लागि जिल्ला प्रशासन कार्यालयबाट म्याद थप गरिसकेको छ ।

अझै अनुसन्धानका बाँकी तथ्य खुल्न समय लाग्ने देखिएपछि भोलि (आइतबार) पुनः अनुसन्धानका लागि म्याद थप गर्न अनुराेध गर्ने योजनामा प्रहरी छ । प्रहरीलाई कालो बजारीअन्तर्गत अनुसन्धानका लागि थप म्याद दिने वा नदिने अधिकार सीडीओलाई हुन्छ ।

‘अनुसन्धानका क्रममा सुलभको नाममा १ हजार २ सय थान थर्मल गन आएको पत्ता लागेको छ । त्यो उनले कहाँकहाँ कसकसलाई दिए वा बिक्री गरे भन्नेबारेमा अनुसन्धान केन्द्रित गरेका छौँ’, अनुसन्धानमा खटिएका १ प्रहरी अधिकारीले भने ।

आफ्नो नाममा आएको १ हजार २ सय थान थर्मल गनबारे सुलभले केही बताउन नमान्दा अनुसन्धानमा ढिलो भएको प्रहरी अधिकारीको भनाइ छ । १ हजार २ सय मात्र होइन, सुलभले चीनबाट २० हजार थान थर्मल गन ल्याएको सूचना प्रहरीलाई छ ।

भन्सार कार्यालयमा भने १ हजार २ सय थान ल्याएको प्रमाणित भए पनि बाँकी थान कसरी ल्याए ? त्यो पत्ता लगाउन प्रहरीले सकिरहेको छैन ।

इम्पोर्टर भएर कम्पनी दर्ता गरेपछि कसैले पनि सामग्री ल्याउन पाउने व्यवस्था भएपछि सुलभले कुनै अर्कैको नामबाट बाँकी थर्मल गन ल्याएको अनुमान प्रहरीको छ ।

२१ चैतमा अग्रवालले चीनको गोन्जाउबाट नेपाल एयरलाइन्सको वाइड बडी जहाजबाट मेडिकल सामग्री ल्याएका थिए । उक्त जहाज चार्टर ‘फ्ल्यास फ्राइट लजिस्टिक’ले गरेको थियो ।

जहाजमा अन्य व्यवसायीको पनि मेडिकल सामग्री आएको थियो । सुलभलाई प्रहरीले ६७ थान थर्मल गन प्रतिथान १५ हजार रुपैयाँको दरले बिक्री गर्न खोज्दा पक्राउ गरेको हो ।

थर्मल गनको बजार मूल्य ३ देखि ५ हजार रुपैयाँसम्म पर्छ ।

थप समाचार : यसरी पक्राउ परे थर्मोगन कालो बजारी गर्ने अर्बपति अग्रवाल

कसकसले ल्याएका थिए मेडिकल सामग्री ?

शंकर ग्रुपसँगै मेडिकल सामग्री ल्याउनेमा ओम्नी समूह पनि थियो । ओम्नी समूहले स्वास्थ्य मन्त्रालयको टेन्डर हात पारेपछि मेडिकल सामग्री ल्याएको हो । विवादपछि ओम्नीसँगको सम्झौता सरकारले रद्द गरिसकेको छ ।

त्यस्तै, सोही चार्टर जहाजमार्फत चौधरी फाउण्डेसन, दीपक मलहोत्रा, उत्सव डिटरजेन्ट कस्मेटिक, श्रेष्ठ साइन्टिफिक, नर्भिक अस्पताल, लक्ष्मी इन्टरनेसनल प्रालि, जय श्री श्याम ट्रेडिङ, जयमेड एप्लायन्सेस प्रालि, लर्ड बुद्ध फाउण्डेसनलगायतले मेडिकल सामग्री ल्याएका थिए ।

उनीहरूले समेत कति मेडिकल सामग्री ल्याए र कहाँ बिक्री गरे वा दिए भन्नेबारेमा केही तथ्य बाहिर आएको छैन । उनीहरूले समेत मेडिकल सामग्री के कति कहाँ राखे ? अथवा सुलभले ल्याएको भनिएको सामग्री उनीहरूको कम्पनी हुँदै आयो, यसबारे पनि अनुसन्धान जरुरी रहेको १ प्रहरी अधिकारीको भनाइ छ ।

अब के कारबाही हुन्छ सुलभलाई ?

प्रहरीले व्यवसायी सुलभ अग्रवालमाथि कालो बजारी तथा सजाय ऐन, २०३२ अन्तर्गतको कसुरमा अनुसन्धान गरेको छ ।

उक्त ऐनको दफा ३ (१) को दफा २ अन्तर्गत नेपाल सरकारले तोकेको कुनै माल वस्तुको व्यापार गर्ने व्यक्तिले सयकडा २० भन्दा बढी मुनाफा लिएको अवस्थामा वा अभावको लाभ उठाई सो माल वस्तुको अनुचित नाफा लिई बिक्री गरेमा त्यस्तो व्यक्तिलाई १ वर्षसम्म कैद वा २ लाख ५० हजार रुपैयाँसम्म जरिमाना वा दुवै सजाय हुन सक्ने प्रावधान छ ।

सम्बन्धित समाचार : जगदम्बा स्टिलका सञ्चालक सुलभ अग्रवाल पक्राउ, स्वास्थ्य सामग्री कालोबजारी गरेको आरोप

प्रकाशित मिति: शनिबार, वैशाख ६, २०७७ १२:२८