ओलीले अनुभव सुनाए– विधान महाधिवेशन काम लागेन

राजेश शर्मा बुधबार, कात्तिक २६, २०८२

A+ A A-

नेकपा एमालेका अध्यक्ष केपी शर्मा ओलीले पार्टीले गर्दै आएको विधान महाधिवेशन कामकाजी नभएको बताएका छन् । गत आइतबार ओलीनिवास गुण्डुमा लेखा आयोगका सदस्यहरूसँगको भेटमा उनले यस्तो बताएका हुन् ।

‘नेतृत्व महाधिवेशनभन्दा केही महिनाअगाडि गरेको विधान महाधिवेशन सान्दर्भिक भएन,’ ओलीले भने, ‘२०७८ भदौमा गरेको पहिलो विधान महाधिवेशनको निर्णय मंसिरमा सौराहामा गएर परिर्वतन गर्नुपर्‍यो, योपटकका निर्णयहरू पनि परिवर्तन गर्नुपर्ने अवस्था आइसक्यो ।’

लेखा आयोगका अध्यक्ष डा. पुष्प कँडेलले मंसिर २७ देखि २९ सम्म हुन लागेको ११औँ महाधिवेशनमा लेखा आयोगका सदस्यहरूलाई एमालेको केन्द्रीय कमिटीमा लैजानुपर्ने प्रस्ताव राख्नासाथ ओलीले विधान महाधिवेशनको प्रसंग निकालेका थिए ।

‘अघिल्लो महाधिवेशनका प्रतिनिधिले आगामी नेतृत्वका लागि विधि र नीति बनाउनु सान्दर्भिक नहुने रहेछ,’ ओलीले सो बैठकमा राखेको विषय सुनाउँदै लेखा आयोगका एक सदस्य भन्छन्, ‘दुईपटक गरिएका विधान महाधिवेशन औचित्यहीन भएको निष्कर्षमा पार्टी अध्यक्ष ओली हुनुहुन्छ ।’

ओलीले सुनाएको अनुभवअनुसार आगामी दिनमा विधान महाधिवेशन अहिले जस्तो अलग्गै नहुने उनले बताए । ‘यो विषयमा मैले महासचिवसँग पनि कुरा गरेको छु,’ 'विधान महाधिवेशन र नेतृत्व महाधिवेशनका विषयमा ओलीले आफ्नो सोच पनि सुनाए, ‘बरु राष्ट्रिय प्रतिनिधि परिषद् वर्षमा एकपटक गर्ने गरी जान सकिन्छ, विधान महाधिवेशन पनि नेतृत्व महाधिवेशनसँगै गर्नुपर्छ ।’

विधान महाधिवेशन र नेतृत्व महाधिवेशनका बीचमा तालमेलसमेत नमिलेको ओलीले लेखा आयोगको टोलीलाई बताएका थिए । ‘कुराकानीको सिलसिलामा दुईवटा महाधिवेशनबीचको तालमेलको विषय अध्यक्षले निकाल्नुभएको हो’, लेखा आयोगका सचिव शिव अधिकारी भन्छन्, ‘पहिल्यै विधान महाधिवेशन गर्दा परिस्थितिमा फेरबदल आउने, समय परिवर्तन हुने र फेरि रिभ्यु गर्नुपर्ने हुँदा अब यसरी नजाने कि भन्नुभएको हो, निर्णय नै भएजस्तो त होइन ।’

अधिकारीका अनुसार १२औँ महाधिवेशन पाँच दिन गर्ने र पहिलो तिन दिन नीति, विधि एवं सांगठनिक विषयमा गर्ने र पछिल्लो दुई दिन नेतृत्व चयनमा केन्द्रित हुँदा तालमेल मिल्न सक्ने कुरा ओलीले सुनाएका थिए ।

‘पार्टी र जनसंगठनमा लेखा प्रणालीले गरेको प्रगति र आगामी योजना मैले अध्यक्षज्यूलाई राखेँ, राम्रो काम गरेका साथीहरू पार्टीको केन्द्रीय कमिटीमा आउनुपर्छ भन्ने लेखा आयोगको जोड थियो, यही प्रसंगमा विधान महाधिवेन र नेतृत्व महाधिवेशनको विषयमा अध्यक्षज्यूले अनुभव सुनाउनुभएको हो’, लेखा आयोगका अध्यक्ष कँडेलले भने, ‘फरक–फरक समयमा दुईवटा महाधिवेशन गर्दा खर्चिलो पनि हुने, कतिपय निर्णय गरिसकेका विषयहरू पनि एड्जस्ट गर्नुपर्ने हुँदोरहेछ, त्यसैले आगामी दिनमा यसको रिभ्यु हुनुपर्छ भन्नुभएको हो ।’

‘२० देखि २२ भदौसम्म गोदावरीमा भएको विधान महाधिवेशनले २ सय ५१ जनाको केन्द्रीय कमिटी रहने निर्णय गर्‍यो, २९ देखि ३१ असोजसम्म ३ सय ५४ जना केन्द्रीय सदस्य भएको केन्द्रीय कमिटीको बैठक बस्यो ।’ विधान महाधिवेशनको निर्णय काम नलागेको प्रसंग सुनाउँदै ओलीले भने, ‘अब १२औँ महाधिवेशनबाट नीति र नेतृत्व एकसाथ गर्नुपर्छ ।’

प्रकाशित मिति: बुधबार, कात्तिक २६, २०८२ १७:०७

राजेश शर्मा

प्रतिक्रिया दिनुहोस्