एनपीएल फ्रेन्चाइज टोलीबीच विदेशी खेलाडी भित्र्याउने होड, कसले कुन खेलाडी अनुबन्ध गरे ?

एनपीएल फ्रेन्चाइज टोलीबीच विदेशी खेलाडी भित्र्याउने होड, कसले कुन खेलाडी अनुबन्ध गरे ?

A+ A A-

आगामी १५ मङ्सिरदेखि सुरु हुने नेपाल प्रिमियर लिग क्रिकेट (एनपीएल) को तयारी धमाधम चलिरहेको छ । प्रतियोगितामा सहभागी हुने आठवटै फ्रेन्चाइज आफ्नो टिम बलियो बनाउन विदेशी खेलाडीलाई भित्र्याइरहेका छन् ।

क्यानका अनुसार लिगमा विराटनगर, जनकपुर, चितवन, काठमाडौं, पोखरा, लुम्बिनी, कर्णाली र सुदूरपश्चिमले सहभागिता जनाउँदै छन् ।

दुई वर्षअघि नै क्यानले भारतीय कम्पनीलाई नेपाल टी– २० लिग आयोजनाको जिम्मेवारी दिएको थियो । तर उक्त लिग खेल मिलेमतो र आर्थिक अनियमिततालगायत विषयमा विवादित बनेपछि क्यानले त्यसलाई रद्द गरेर आफैँ एनपीएल आयोजना गर्ने निर्णय गरेको थियो ।

त्यसपछि क्यानले भारतमा हुने फ्रेन्चाइज लिग आईपीएलजस्तै चर्चित ब्रान्ड बनाउने महत्त्वाकांक्षी योजनाका साथ टी– २० फम्यार्टमै एनपीएलको घोषणा गरेको थियो । त्यसैले पनि एनपीएललाई चर्चित बनाउन नेपाल क्रिकेट संघ (क्यान)लाई ठूलै चुनौती छ । त्यसैले पनि यतिखेर एनपीएलको तीव्र तयारीमा क्यान जुटेको छ ।

अर्कोतर्फ प्रतियोगितामा सहभागी हुने आठवटै टिमलाई पनि खेललाई रोमाञ्चक र चर्चित बनाउन उत्तिकै दबाब र चुनौती छ । त्यसैले हुनुपर्छ, यतिखेर सबै टिम खेलाडी समायोजनमा व्यस्त बनेका छन् ।

सबै टिम अन्तर्राष्ट्रि क्रिकेटमा चर्चित खेलाडी आफ्नो टोलीमा समावेश गराएर बलियो टिम बनाउँदै उपाधि चुम्ने दाउमा छन् ।

हालसम्म एनपीएलमा अनुबन्ध भइसकेका विदेशी खेलाडी

एनपीएल टोलीमध्ये हालसम्म सर्वाधिक विदेशी खेलाडी भित्र्याउने टिमको सूचीमा पोखरा एभेन्जर्स शीर्ष स्थानमा छ । अमेरिकाका एन्ड्रिज गौस, वेस्टइन्डिजका एन्डरसन फिलिप र नेदरल्यान्ड्सका बास डे लिडे गरी पोखराले तीन जना विदेशी खेलाडीलाई अनुबन्ध गरिसकेको छ ।

गौस विकेटकिपर र ब्याटर हुन् भने लिडे अलराउन्डर र फिलिप तीव्र गतिका बलर हुन् । मार्की खेलाडीका रूपमा कुशल भुर्तेल पनि यसै टिममा छन् । पोखराले मेन्टरका रूपमा दक्षिण अफ्रिकी लिजेन्ड जोन्टी रोड्सलाई पनि अनुबन्ध गरेको छ ।

एनपीएलमा अर्को टिम कर्णाली याक्सले हालसम्म पाकिस्तानी अलराउन्डर हुसेन तलातलाई अनुबन्ध गरेको छ । मार्की खेलाडी सोमपाल कामी यसै टिममा रहेका छन् ।

सुदूरपश्चिम रोयल्सले स्कटल्यान्डका ब्याटिङ अलराउन्डर ब्रान्डन म्याकमुलेनलाई अनुबन्ध गरेको छ । म्याकमुलेनले हालसम्म २२ ओडीआई र १६ टी–२० आई खेलेका छन् । मार्की खेलाडीका रूपमा अलराउन्डर दीपेन्द्र सिंह ऐरी पनि यसै टोलीमा छन् ।

ओमान टिमका कप्तान अकिब इलियासलाई विराटनगर किंग्सले अनुबन्ध गरेको छ । इलियासले हालसम्म ५६ टी–२० आई र ३२ ओडीआई खेलेका छन् । नेपाली स्पिनर सन्दीप लामिछाने पनि विराटनगर किंग्समै छन् ।

यस्तै, एनपीएलकै अर्को टोली काठमाडौं गुर्खाजले हालसम्म नेदरल्यान्ड्सका युवा ओपनर ब्याटर माइकल लेभिटलाई भित्र्याएको छ । आक्रामक ब्याटिङका लागि माइकल चिनिन्छन् । विराटनगर किंग्समा मार्की खेलाडी सन्दीप लामिछाने छन् ।

नेपाल प्रिमियर लिगको अर्को टोली जनकपुर बोल्ट्सले विदेशी खेलाडीको रूपमा न्युजिल्यान्डका जिमी निसम र अमेरिकाका अलराउन्डर जोसुआ ट्रम्पलाई भित्र्याइसकेको छ । नेपालका पूर्वप्रशिक्षक पुबुदु दसानायके प्रशिक्षक रहेको जनकपुरको मार्की खेलाडीका रूपमा आसिफ शेख छन् ।

यस्तै, हालसम्म अन्तर्राष्ट्रिय क्रिकेटमा डेब्यु नै नगरेका इंग्ल्यान्डका टम मुरिसलाई लुम्बिनी लायन्सले अनुबन्ध गरेको छ । मार्की खेलाडी राष्ट्रिय टिमका कप्तान रोहितकुमार पौडेल पनि यसै टिममा छन् ।

त्यस्तै, चितवन राइनोज हालसम्म दक्षिण अफ्रिकाका तीव्र गतिका बलर मार्चन्ट डे लाङ्गलाई अनुबन्ध गरेको छ । एउटा टिमले एनपीएलको यो सिजनका लागि ६ जनासम्म विदेशी खेलाडी अनुबन्ध गर्न पाउनेछन् । १५ पुससम्म हुने लिगका सबै खेल कीर्तिपुरस्थित त्रिवि मैदानमा हुनेछन् ।

प्रकाशित मिति: शुक्रबार, कात्तिक ९, २०८१ १७:२४