राखेपको गैरजिम्मेवारीका कारण ६८ वर्ष पुरानो अन्तर्राष्ट्रिय रङ्गशालाको साख गुम्दै (भिडियो)

राखेपको गैरजिम्मेवारीका कारण ६८ वर्ष पुरानो अन्तर्राष्ट्रिय रङ्गशालाको साख गुम्दै (भिडियो)

A+ A A-

काठमाडौंको त्रिपुरेश्वरमा अवस्थित दशरथ रङ्गशाला नेपालकै एक्लो अन्तर्राष्ट्रियस्तरको रङ्गशाला हो । यो रङ्गशाला पछिल्लो समय खेलकुदका गतिविधभन्दा पनि सामान्य स्कुलका कार्यक्रमदेखि कन्सर्ट, विश्व विद्यालयको समारोह आयोजनालगायत कार्यक्रम गर्ने थलो बनेको छ । तिनै गैरखेलकुद समारोहका कारण यतिखेर रङ्गशालाले अन्तर्राष्ट्रिय मान्यता गुम्ने खतरामा पुगेको छ ।

०००

५ हजार सिट र १५ हजार दर्शक क्षमताको दशरथ रङ्गशालाको निर्माण २०१३ सालमा तत्कालीन राजा महेन्द्रको राज्याभिषेकअघि सुरु भएको थियो । त्यतिबेला हाल रङ्गशाला परिसरमा रहेको कभर्ड हलको खाली मैदानलाई सानो टुँडिखेल भनेर चिनिन्थ्यो, जहाँ सार्वजनिक रूपमा फुटबल नै खेलिन्थ्यो ।

२०२८ सालमा राजा वीरेन्द्रको राज्याभिषेकमा आयोजना हुने खेलकुद प्रतियोगिताका लागि रङ्गशालाको पूर्व र उत्तरतर्फ १४x१४ स्टेपको प्यारापिट तयार भएको थियो । पश्चिमतर्फ भीआईपीका लागि प्याराफिट बनाइएको थियो ।

यस्तै, एथलेटिक्सका लागि ६ लेनको ट्र्याकसमेत तयार पारिएको थियो । २०३० सालमा खेलाडीहरूका लागि छात्रवास र स्वीमिङ पुल निर्माणका लागि शिलान्यास गरियो । रङ्गशालालाई अन्तर्राष्ट्रियस्तरको बनाउन २०३५ सालदेखि निर्माण कार्य सुरु गरेर २०३७ सालमा निर्माण सम्पन्न गरिएको थियो ।

२०३८ सालमा दशरथ रङ्गशालामा पहिलो बृहत् राष्ट्रिय खेलकुद प्रतियोगिताको आयोजना गरिएको थियो । यसको दुई वर्षपछि अर्थात् रङ्गशालामा दक्षिण एसियाको पहिलो दक्षिण एसियाली खेलकुद प्रतियोगिता साफ सुरु भएको थियो ।

दशरथ रङ्गशालाको हालको स्वरूप भने २०५५ सालमा नेपालले आठौँ साफ खेलकुद आयोजना गर्ने निर्णय भएलगत्तै चीन सरकारको सहयोगमा आधुनिक रङ्गशाला तयार भएको थियो । रङ्गशालामा फर्ड लाइट र स्कोर बोर्ड पनि त्यसैबेला थपिएको हो । प्यारापिट रेलिङले घेर्ने काम पनि त्यसैबेला भएको थियो ।

२०७२ सालको भूकम्पले क्षतिग्रस्त बनाएपछि त्यसको दुई वर्षपछि पुनर्निर्माणको काम सकिएको थियो ।

पछिल्लो समय यो रङ्गशालामा खेलभन्दा धेरै अन्य कार्यक्रम हुने गर्छन् । गत असोजमा द एज ब्यान्डले यही रङ्गशालामा कन्सर्ट गर्‍यो । त्यसको दुई महिनापछि त्रिभुवन विश्वविद्यालयले दीक्षान्त समारोह गर्ने ठाउँ नभेटेर यही रङ्गशालामा आयोजना गर्‍यो । त्यस्तै, गत १ चैतमा मात्र मिर्गौला दिवसको कार्यक्रम पनि यहीँ आयोजना भयो ।

हुन त अन्तर्राष्ट्रियस्तरको एक मात्र खेल मैदान भए पनि यो रङ्गशालामा खेलभन्दा धेरै कन्सर्ट, स्कुलका सामान्य कार्यक्रमदेखि राष्ट्रियस्तरका समारोह आयोजना गर्ने थलो बनेको छ । खेल मैदानमा गरिने यस्ता गतिविधिका कारण रङ्गशालाको भौतिक संरचनामा पुगेको असरतर्फ भने न अखिल नेपाल फुटबल संघ एन्फा, न राष्ट्रिय खेलकुद परिषद्, न त नियामक निकाय युवा तथा खेलकुद मन्त्रालय, कसैको पनि ध्यान पुगेको छैन । परिणामत: राष्ट्रिय टोलीले रङ्गशालाको खराब पिचका कारण विश्वकपअन्तर्गत बहराइनसँगको खेल घरेलु मैदानमा खेल्ने अवसर गुमाएपछि मात्र खेलकुद मन्त्रालयको आँखा रङ्गशालामा पुग्यो । र, गत २ चैतमा अल्पकालीन रूपमा रङ्गशालामा खेलकुदबाहेकका गतिविधि गर्न मन्त्रालयले रोक लगायो ।

आगामी २४ जेठमा रङ्गशालामा विश्वकप छनोटअन्तर्गतकै यूएईसँग राष्ट्रिय पुरुष टोलीले खेल्ने त्यसपछिको तालिका थियो । सो खेलका लागि १९ वैशाखमा मैदानको परीक्षण गर्न एएफसीका म्याच कमिस्नर सुब्रत थत्तेले रङ्गशाला भ्रमण गरे । १९ र २० गतेको मैदान निरीक्षणपश्चात् उनको निरीक्षण टोलीले खराब पिच, सुरक्षा मापडण्दलगायत कारणले अन्तर्राष्ट्रियस्तरको खेलका निम्ति अयोग्य रहेको ठहर गर्‍यो ।

त्यससँगै दशरथ रङ्गशालाले अन्तर्राष्ट्रियस्तर गुमाएपछि यतिखेर एन्फा र राखेप एकअर्काबीच आरोप प्रत्यारोपमा उत्रिएका छन् । अन्तत: रङ्गशालाको संरक्षणको जिम्मा राखेपले लिएर निजी कम्पनीलाई मैदान बनाउने जिम्मेवारी दिएको छ ।

यद्यपि राखेप सदस्यसचिव टंकलाल घिसिङ भने मैदानमा विश्वकप खेल हुन नसक्नुमा आफ्नो दोष नभएको भनेर पानीमाथिको ओभानो बन्न खोज्दै छन् । एन्फाले राखेपलाई नो अब्जेक्सन लेटर नदिएसम्म राखेपले अन्य कार्यक्रमका लागि मैदान दिने नगरेको तर्क दिएर घिसिङ पन्छिन खोज्छन् ।

नेपालको खेलबारे राखेपभन्दा एन्फालाई चासो हुनुपर्ने भन्ने उनको कुतर्क त झन् लाजमर्दो मात्र होइन, सिङ्गो देशकै खेलकुदका निम्ति घातक छ ।

भिडियो:

प्रकाशित मिति: शुक्रबार, वैशाख २८, २०८१ १९:३७