कांग्रेसले हाप्याे वैकल्पिक गठबन्धन बनाउने प्रयास, सहकारी प्रकरण के गर्ला ?

कांग्रेसले हाप्याे वैकल्पिक गठबन्धन बनाउने प्रयास, सहकारी प्रकरण के गर्ला ?

A+ A A-

‘संयोग नै मान्नुपर्छ, यो सरकार बनेपछि मैले कांग्रेसका एक जना नेतालाई भेटेको छैन, सँगै बसेर एक कप चिया पनि खाएको छैन,’ पार्टी विभाजनपछि गरिएको पत्रकार सम्मेलनमा जसपा नेपालका अध्यक्ष उपेन्द्र यादवले कांग्रेस नेताहरूसँगको भेटबारे प्रस्टीकरण दिँदै थिए । अध्यक्ष यादव वर्तमान सरकारलाई समर्थन यथावत् राख्ने पक्षमा रहेको बताउँछन् । ‘संघीयताको रक्षा र सरकारको स्थायित्वका लागि यही सरकारलाई समर्थन गर्नुपर्छ भन्नेमा पहिले पनि थिएँ । समर्थन यथावत् छ,’ उनले भने ।

उपेन्द्र यादवले संयोग मान्नुपछाडि प्रमुख प्रतिपक्षी नेपाली कांग्रेसले उनीसँग र एकीकृत समाजवादीका अध्यक्ष माधव नेपालसँग आलोपालो प्रधानमन्त्रीको तारतम्यको सुइँको बालकोट र बालुवाटारले पाएको र त्यसलाई रोक्न जसपा विभाजनको अस्त्र प्रयोग गरिएको बारे प्रस्ट पार्नुपर्ने दबाब थियो । प्रमुख प्रतिपक्षी नेपाली कांग्रेसले सत्ता समीकरण आफ्नो पक्षमा पार्न एकीकृत समाजवादीका अध्यक्ष माधव नेपाललाई प्रधानमन्त्रीको ग्यारेन्टी दिएको थियो । वैकल्पिक समीकरणको नेतृत्व पाउने भए माहौल बनाउने जिम्मा पनि नेपालको थियो । कांग्रेसले वैकल्पिक गठबन्धन बन्ने सम्भावना भए लाग्नुस् भनेर नेपाललाई भनेको स्वीकार गरे पनि अन्य दलले स्वीकार गरेका छैनन् ।

के कांग्रेस गृहमन्त्री लामिछानेप्रति नरम भएको हो ?

‘जसपा र नेकपा एसले कांग्रेससँग मिलेर सरकार ढाल्ने प्रयास गर्‍यो भनेर हल्ला चलाइयो । त्यो हल्ला निराधार र कपोलकल्पित थियो,’ यादवले आफूमाथि लागेको आरोपबारे भने, ‘मैले कसैसँग भेटेको थिइनँ । त्यही हल्ला चलाएर म देशबाहिर रहेको मौका छोपेर पार्टी फुटाइयो ।’

अहिले कांग्रेस वैकल्पिक गठबन्धनबारेमा सोच्नेभन्दा पनि जिम्मेवार प्रतिपक्षको भूमिकामा रहेको र त्यसलाई निर्वाह गर्ने भनिरहेको छ । कांग्रेसले सहकारी प्रकरणमा उपप्रधान तथा गृहमन्त्री रवि लामिछानेलाई संसदीय छानबिनको घेरामा ल्याउन खाेजिरहेकाे छ । २८ वैशाखबाट सुरु हुने बजेट अधिवेशनमा कसरी प्रस्तुत हुने भन्नेबारे निर्णय गर्न कांग्रेसको संसदीय दलको बैठक भोलि बस्नेछ ।

‘आगामी अधिवेशनमा कसरी प्रस्तुत हुने भन्नेबारेमा संसदीय दलको बैठकमा छलफल गर्छौं । समय लिएर भए पनि सबै सांसदकाे कुरा सुन्ने भन्ने छ,’ कांग्रेसका प्रमुख सचेतक रमेश लेखकले भने ।

समग्र सहकारी क्षेत्रको छानबिन गर्न सरकार तयार छ । तर, कांग्रेस मन्त्री लामिछानेका बारे समग्रमा नभएर छुट्टै छानबिन हुनुपर्ने पक्षमा छ । ‘उपप्रधान तथा गृहमन्त्री व्यक्ति मात्र होइनन् । उहाँमाथि छानबिन नै हुन नहुने भन्ने हुदैँन,’ कांग्रेसका प्रमुख सचेतक लेखक भन्छन् ।

सहकारीको विषयमा कांग्रेसको अडान यथावत् रहे पनि सरकारको विकल्प खाेज्ने विषयमा भने कांग्रेस पछि हटेको छ । कांग्रेसका उपसभापति धनराज गुरुङ कांग्रेस वर्तमान सरकार फेर्न नलागेको बताउँछन् । ‘राजनीतिक दलका नेताहरूबीचको भेटघाट सामान्य हुन् । विभिन्न कारणले भेट हुन सक्छ । त्यसलाई जोडेर सरकार परिवर्तनको खेलमा लाग्यो भन्नु उचित होइन । अहिले कांग्रेस जिम्मेवार प्रतिपक्षका भूमिकामा छ । सरकारलाई खबरदारी गर्छ,’ गुरुङले शिलापत्रसँग भने ।

एकीकृत समाजवादी र जसपा नेपालसँग मिलेर नयाँ समीकरण बनाउने कुरामा सफलता नपाए पनि कांग्रेसले २१ सिटको रास्वपालाई विश्वासमा लिन नरम हुन सक्छ । सभापति शेरबहादुर देउवा उनीप्रति नरम हुँदै गएको कांग्रेसका नेताहरू बताउँछन् । तर, देउवानिकटहरू भने यसमा सत्यता नभएको बताउँछन् ।

‘गठबन्धनको कुरा होइन, अहिले सहकारीको कुरा हो । साग बेच्नेको, गाउँमा भाले बेच्नेको, दूध बेच्नेको पैसा सहकारीमा जम्मा भएको हो । यसमा ठगी भएको हो । जो संलग्न छन्, उसका बारेमा छानबिन हुँदैन भन्ने हुँदैन । कांग्रेस सभापति यसमा दायाँबायाँ हुनु हुन्न र उहाँले भेटवार्तामा पनि यही भनिरहनुभएको छ,’ देउवाका प्रेस संयोजक गोविन्द परियारले शिलापत्रसँग भने ।

अस्थिरता राेक्ने कांग्रेस र एमाले मिल्नुपर्ने आवाज पनि उठरहेकाे लेखक बताउँछन् । यसो भन्दैमा कांग्रेस सरकार ढाल्न लागेको भन्ने कुरामा सत्यता नरहेको उनले बताए । ‘हामी अहिलेको समीकरण भत्काउन लागेको भन्ने होइन । ठूलो पार्टीको हिसाबले अन्य दलसँग संवाद गर्ने सामान्य हो,’ उनले भने, ‘एमालेसँग मिलेर सरकार बनाउने भन्नेबारेमा बसेर कुरा भएको छैन ।’

प्रकाशित मिति: बुधबार, वैशाख २६, २०८१ २०:३०