महिलाभन्दा पुरुषमा बाँझाेपनकाे समस्या किन धेरै, निदान कसरी सम्भव ? (भिडियाे)

महिलाभन्दा पुरुषमा बाँझाेपनकाे समस्या किन धेरै, निदान कसरी सम्भव ? (भिडियाे)

A+ A A-

पछिल्लो समय खानपान र रहनसहन लगायत विविध कारणले विश्वभर निसन्तानको समस्या बढ्दो छ । प्रजनन् (आईभीएफ) विशेषज्ञ डाक्टर निजाराज भण्डारीका अनुसार प्रत्येक आठ जनामध्ये एक जनामा बाँझोपन अर्थात् निसन्तानपनको समस्या देखिने गरेको छ । याे सङ्ख्या बढ्दो क्रममा छ । हाल वात्सल्य नेचुरल आईभीइफ अस्पतालमा कार्यरत डा.निजाका अनुसार यो समस्या महिलामा भन्दा पुरुषमा अझ धेरै देखिने गरेको छ ।

नेपालमा पनि पछिल्लो समय निसन्तानपन ठूलो समस्याका रूपमा देखापरिरहेको छ । यो समस्या लिएर आउने पुरुषहरू मध्ये धेरैमा वीर्यमा नै समस्या देखिने गरेको उनी बताउँछिन् । पुरुषहरूको वीर्यको मात्रा, गति तथा स्वरूपमा समस्या देखिने गरेको उनको भनाइ छ ।

महिलाको सवालमा भने पाठेघरमा मासु पलाउने, झिल्ली देखा पर्ने तथा पाठेघरको आकारमा नै समस्या देखिने गरेको डा. निजा सुनाउँछिन् । कसैकसैमा भने पहिलो सन्तान भइसकेपछि पनि नली बन्द भएर प्रजनन रोकिने समस्या देखा पर्न सक्छ । महिलाहरूको उमेरसँगै महिनावारी सुक्दै जान्छ । महिनावारी सुक्दासुक्दै अण्डाशयको गुणस्तर र भण्डारमा समेत कमी आउदै जाँदा पनि प्रजननमा समस्या आउँछ ।

निजाको अनुभवमा भने श्रीमान् र श्रीमती बीचमा दूरीका कारण प्रजननमा समस्या देखिने गरेको छ । अधिकांश श्रीमान् विदेशमा रहने गरेका कारण प्रजनन् गर्ने समय नै मिल्दैन । विदेश त्यसमा पनि खाडी मुलुकबाट फर्किने पुरुषमा त्यहाँको वातावरण, खानपिन लगायत कारणले उनीहरूको शुक्राणुलाई असर गरेको हुन्छ ।

यसका साथै प्रदूषण, विषादीयुक्त खाद्य तथा तनावलगायत कारणले त झनै मानिसको प्रजननमा मात्र नभएर सिंगो स्वास्थ्यमा असर पुर्‍याइरहेको छ । सामान्यतया दम्पतीको प्रजननमा श्रीमानको वीर्य तथा शुक्रकीटको अवस्था, श्रीमतीको अण्डा भण्डारको अवस्था, पाठेघरमा कुनै प्रकारको झिल्ली तथा मासु पलाएको छ कि छैन भनेर साधारण जाँच गरेर थाहा पाउन सकिन्छ । त्यसपछि दम्पतीलाई कस्तो प्रकारको उपचार गर्ने भन्ने निर्धारण गरिन्छ।

उपचार कसरी हुन्छ?

निसन्तानपनको समस्याको निदानमा तीन प्रकारको उपचार पद्दति छ । दम्पतीको जाँचपश्चात्त कुनै समस्या नदेखिए उनीहरूको उमेर छ र अण्डाको भण्डार पनि राम्रो छ भने प्राकृतिक रूपमै उपचार गरिन्छ । जसअन्तर्गत आवश्यक सामान्य औषधि तथा परामर्श प्रदान गरिन्छ ।

श्रीमान्‌काे वीर्यको मात्रा तथा चालमा सामान्य समस्या देखिएमा तथा धेरै पटक सम्पर्क गर्दासमेत प्रजनन नभएका दम्पतीलाई श्रीमान्‌काे वीर्य श्रीमतीको पाठेघरमा जम्मा गर्न आवश्यक प्रक्रिया अपनाइन्छ । यसलाई आईयुआई भनिन्छ ।

त्यस्तै तेस्रोमा आईभीएफ प्रक्रिया जसलाई फाेर्टीलिटी प्रोसेस पनि भनिन्छ । यस प्रक्रिया अन्तर्गत श्रीमान्‌काे वीर्यको मात्रा एकदमै कम छ वा कहिलेकाहीँ वीर्यमा शुक्राणु नै नदेखिएको खण्डमा अण्डकोषबाट नै प्रजनन गराइन्छ ।श्रीमतीको अण्डा एकदमै कम छ तर छिटो प्रजनन गराउनुपर्ने त्यस्तो अवस्थामा पनि आईभीएफ अर्थात् फाेर्टीलिटी प्रोसेस गर्न सकिन्छ ।

महिलाको पाठेघरको नली बन्द भएको खण्डमा पनि प्रजनन गराउन फाेर्टीलिटी प्रक्रिया अनिवार्य हुन्छ । त्यससँगै यसै माध्यमद्वारा विदेशबाट एकदम छोटो समयका लागि आउने श्रीमानहरू जसलाई सन्तानको चाहना त छ तर समय नमिलेको अवस्थामा श्रीमान्‌काे शुक्राणु निकालेर फ्रिज गरेर राखिन्छ । जसबाट जुनसुकै समयमा प्रजनन गराउन सकिन्छ । अर्थात् आईभीएफ प्रोसेस अथवा फाेर्टीलिटी प्रोसेस अन्तर्गत महिलाकाे अण्डा अथवा पुरुषको वीर्य निकालेर फ्रिज गरेर राखिन्छ । जसबाट भविष्यमा जहिले चाहे पनि सन्तान जन्माउन सकिन्छ ।

भिडियाे हेर्नुहाेस् :

प्रकाशित मिति: बिहीबार, चैत २२, २०८० २१:१६