६ वर्षको ४९ लाख तलबभत्ता समाजसेवामा खर्चेका ‘माननीय’

A+ A A-

गण्डकी प्रदेशसभाका सांसदले सेवासुविधाबापत वार्षिक ९ लाख रुपैयाँ हारहारी पाउँछन् । यो पैसा सांसदहरू घर खर्च, संसद आवतजावत, स्वास्थ्यसहित विविध शीर्षकमा खर्च हुन्छ ।

गण्डकी प्रदेशसभाका ६० सांसदमध्ये एक जना यस्ता सांसद छन्, जसले सांसद भएबापत पाएको सबै सेवासुविधा आफ्नो निर्वाचन क्षेत्र र सहयोगमा खर्चन्छन् । कास्की २ (ख) बाट निर्वाचित नेपाली कांग्रेसका सांसद विन्दुकुमार थापाले पहिलो कार्यकालदेखि नै आफ्नो सेवासुविधा समाजसेवामा खर्च गर्दै आएका छन् ।

आर्थिक अवस्था कमजोर भएका, सांसद भएबापतकै सेवासुविधाले घर खर्च चलाउनेले आर्थिक सहयोग नगर्नु सामान्य हो । तर, आर्थिक हैसियत बलियो भएर पनि आफ्नो गाउँ–ठाउँको विकासमा योगदान नगर्नेको भिडमा विन्दुकुमार अपवाद हुन् । ६५ वर्षीय विन्दुकुमार प्रदेशसभाका ६० सदस्यमध्येका अर्बपति सांसद हुन् । कानुनमन्त्री हुँदा २०७८ सालमा सार्वजनिक सम्पत्ति विवरणअनुसार उनीसँग पोखराका ३३ मध्ये १२ वटा वडामा जग्गा, पोखरामै ६ वटा घर, ९० तोला सुन, ५० तोला चाँदी र १० तोला हीरा छ । यो सम्पत्ति थापा, उनकी दुई श्रीमती र छोराको नाममा छ ।

पहिलो कार्यकाल (२०७४ माघ–२०७९ पुस)सम्म सांसद, मन्त्री भएबापत बैठक भत्तादेखि मासिक पारिश्रमिक र अन्य सेवासुविधा गरी राज्यबाट ४० लाख ७१ हजार २४३ रुपैयाँमा प्राप्त गरेका थिए । ८ लाख ९६ हजार १६० रुपैयाँ उनले दोस्रो कार्यकालको पहिलो वर्षमा प्रदेशसभा सचिवालयबाट खातामा प्राप्त गरेका छन् । यसरी पछिल्लो ६ वर्षमा उनले ४९ लाख ६७ हजार ४०३ रुपैयाँ पाएका छन् ।

तलबभत्ताबाहेक पूर्वकानुनमन्त्री थापाले पहिलो कार्यकालमा १७ लाख ७५ हजार ८१७ रुपैयाँ सामाजिक कार्यमा खर्च गरेको निजी सचिवालयको रेकर्ड छ । दोस्रो कार्यकालमा २ लाख १६ हजार रूपैयाँ आफैँ थपेर पछिल्लो ६ वर्षमा ९ लाख ९१ हजार ८१७ रुपैयाँ सामाजिक कार्यमा खर्चिएको विवरण छ । उनले हरेक वर्ष पत्रकार सम्मेलन गरेर आफूले तलबभत्ता कहाँ खर्च भयो भन्ने विषय सार्वजनिक गर्ने गरेका छन् ।

1 bindukumra thapa1708062237.jpg

विन्दुकुमारमाथि पैसाकै कारण सांसद बनेको, मन्त्री बनेको आरोप छ । ढिलो गरी पार्टी राजनीतिमा छिरेका थापा पार्टी सभापति र उनकी श्रीमतीनिकट रहेकै कारण पटकपटक अवसर पाइरहेछन् । आर्थिक अवस्था बलियो भएकै कारण आफूलाई समाजसेवीका रूपमा स्थापित गर्न उनी सफल भएका छन् भन्नेमा दुई मत छैन । विन्दुकुमार यो विषय स्वीकार्दै भन्छन्, ‘म व्यवसाय गरेर राजनीतिमा आएको हुनाले मलाई सामाजिक काममा लाग्न कम्फर्टेबल भएको छ ।’

वाम गठबन्धन हुँदा २०७४ सालमा चुनाव जित्नु र २०७९ मा पार्टीभित्रै अन्तर्घातको अवस्था हुँदा पनि निर्वाचित हुनुले विन्दुकुमारलाई आर्थिक हैसियतले साथ दिएको सहजै अनुमान लगाउन सकिन्छ । सांसद विन्दुकुमार आफूले कुनै राजनीतिक आस्था नराखी सहयोग माग्नेलाई आवश्यकता हेरेर सहयोग गर्ने गरेको बताउँछन् । ‘सहयोग गर्दा यो कुन पार्टीको भन्ने कुरा हुँदैन । आमा समूह, टोल विकास संस्थामा सबै पार्टीमा आस्था राख्ने हुन्छन् नि !’ उनी भन्छन्, ‘खानेपानीको पाइप दियो भने सुविधा सबैले पाउने हो । यसमा राजनीतिक प्रभाव हुँदैन ।’

के–केमा हुन्छ खर्च ?

विन्दुकुमारले तलबभत्ता घरमा पानीको धारा जोड्ने, स्वास्थ्यपीडितको उपचारदेखि समुदायका भवनसम्म खर्च हुने गरेको छ ।

दीर्घ रोगका बिरामीको उपचारमा आर्थिक सहयोग, एम्बुलेन्स खरिद, सामुदायिक भवन र सडक निर्माण, सडकबत्ती जडान, खानेपानीको धारा जडान, विद्यालयको बस खरिदलगायत शीर्षकमा उनले तलबभत्ता खर्च गरेका छन् । उनको निर्वाचन क्षेत्रअन्तर्गत पर्ने पोखरा–२०, अर्मलाकोटतिर खानेपानीको ट्यांकीमा उनको नाम लेखिएको भेटिन्छ ।

जाजरकोट केन्द्रबिन्दु भएर गएको भुकम्प प्रभावितका लागि ३७ हजार १०५ रुपैयाँ सहयोग गरेको सांसद थापाले बताए । खानेपानीको धारासमेत जोड्न नसक्ने परिवार आफ्नो निर्वाचन क्षेत्रमा रहेको सांसद थापाले सुनाए । ‘प्रदेश सरकारले एक घर, एक धारा भनेको छ । पाइप लगेर छोडिएको छ,’ उनी भन्छन्, ‘धारा जोड्न ७ हजार ५ सय रूपैयाँ लाग्ने रहेछ । सक्नेले त त्यो तिर्छन् । नसक्ने धेरैलाई मैले नै सहयोग गरेको छु ।’

को हुन् विन्दुकुमार ?

२०७० सालपछि राजनीतिमा सक्रिय भएका विन्दुकुमारकै कारण लामो समय कांग्रेसमा बिताएकाहरू अवसरबाट वञ्चित पनि छन् । पार्टी हेडक्वार्टरसँगको पहुँच कतिसम्म छ भने सभापति शेरबहादुर देउवा, पत्नी आरजु, वरिष्ठ नेताहरू अर्बपति उनीकहाँ लञ्च–डिनर गर्न पुग्छन् ।

आफ्नै निवासमा सभापति देउवा, नेता शशांक कोइराला, मुख्यमन्त्री सुरेन्द्रराज पाण्डेसँग विन्दुकुमारको परिवार ।

पछिल्लोपटक ९ माघमा कांग्रेस कास्कीको जिल्ला सम्मेलनमा सहभागी हुन सभापति देउवा, पूर्वमहामन्त्री शशांक कोइराला पोखरा आएका थिए । त्यो बिहान खाना खान उनीहरू विन्दुकुमारको निवास पुगेका थिए । यसले पनि विन्दुकुमारमा सामथ्र्य पार्टीभित्रै छोटो समयमै कति बढेको छ भन्ने प्रस्ट देखाउँछ । विन्दुकुमार योपटक पनि गण्डकीको मन्त्री हुने सूचीमा थिए । तर, केही सांसद र पार्टीका नेताले कुनै हालतमा बनाउन नहुने अडान राखेपछि देउवाले आँट गर्न सकेनन् ।

राष्ट्र बैंकमा जागिर गरेका विन्दुकुमारले अर्थोपार्जन हुने क्षेत्रबारे धेरथोर त्यहीँबाट बुझे । पछि अटोमोबाइल क्षेत्रमा हात हाले । त्यहीँबाट आर्थिक अवस्था थप बलियो बनाए । तर, उनको पारिवारिक स्थिति बाल्यकालबाटै राम्रो थियो । विन्दुकुमार सैनिक परिवारमा जन्मिएका हुन् । उनका बुवा चन्द्रबहादुर सेनामा थिए । विन्दुकुमार बुवा चन्द्रबहादुर र आमा चन्द्रकलाका जेठा छोरा हुन् । उनका भाइ ध्रुव अटोमोबाइल व्यवसायीको छाता संगठन नाडाका निवर्तमान अध्यक्ष हुन् । विन्दुकुमारको प्रारम्भिक वर्ष र बाल्यकाल नयाँबजार, पोखरामा बित्यो । महेन्द्र माध्यमिक विद्यालयमा प्राथमिक शिक्षा र बाराही माध्यमिक विद्यालयमा उच्च शिक्षा पूरा गरेपछि उनी पृथ्वीनारायण क्याम्पस (पीएनसी) गए, जहाँ उनले कानुनमा स्नातक गरे ।

थापाले नेपाल राष्ट्र बैंकमा सहायक कर्मचारी भएर काम गरे । २०५० सालमा नेपाल राष्ट्र बैंक कर्मचारी युनियनको सदस्यको रूपमा संलग्न हुँदा संगठनात्मक र राजनीतिक उद्देश्यमा योगदान गर्ने र भाग लिने इच्छा जागृत भयो । कानुनमा आफ्नो डिग्री पूरा गरेपछि, उनले डेमोक्रेटिक लयर्स एसोसिएसनको सदस्यको रूपमा सेवा गरे । २०७४ सालमा कास्की २ (ख) बाट प्रदेशसभा सदस्यमा निर्वाचित भएका थिए । उनी प्रतिनिधिसभाका ३ र प्रदेशसभाका ६ निर्वाचन क्षेत्रमा चुनाव जित्ने एक मात्र कांग्रेसी थिए । २०७८ सालमा कृष्णचन्द्र नेपाली पोखरेलको नेतृत्वमा सरकार बन्यो । उनी त्यो सरकारमा कानुन सञ्चार तथा प्रदेशसभा मामिलामन्त्री बनेका थिए । सम्पन्नशाली विन्दुकुमारले त्यतिबेला एउटा सकारात्मक सन्देश दिए – उनले गाडी र सरकारी क्वार्टर लिएनन् ।

3 bindukumar thapa with local of his election area1708062258.jpg

थापा मन्त्री बन्ने बेलामा आलोचनाको पात्र नबनेका होइनन् । तनहुँका डोबाटे विश्वकर्मा मन्त्रीको शपथ लिन आउँदाआउँदै नाम काटियो । डोबाटेको ठाउँमा ‘पैसावाला विन्दुकुमार’लाई मन्त्री बनाइएको भन्दै त्यतिबेला कांग्रेस नेतृत्वको निकै आलोचना भयो । डोबाटेपछि आन्तरिक मामिलामन्त्री बनाइए । अन्सुभारा ग्रुपका अध्यक्ष थापासँग दर्जनौँभन्दा बढी व्यावसायिक फर्म र भेन्चर छन् । अन्सुभारा ग्रुपले अटोमोबाइल, रियल इस्टेट, हस्पिटालिटी, मल, वित्तीय सेवा र इन्फोटेकका क्षेत्रमा काम गर्छ ।

राजनीतिमा आउनुअघि थापा पोखरा उद्योग वाणिज्य संघमा सक्रिय थिए । २ वर्ष अध्यक्ष र १० वर्षभन्दा बढी समय बोर्ड सदस्य भएर काम गरेको अनुभव विन्दुकुमारसँग छ । थापाले नेपाल अटोमोबाइल डिलर्स एसोसिएसन नाडा (२०६४–२०६६)को उपाध्यक्ष, नेपाल–रसिया चेम्बर अफ कमर्स एन्ड इन्डस्ट्री, गण्डकी च्याप्टर (२०६८–२०७२), पश्चिमाञ्चल अटोमोबाइल डिलर्स एसोसिएसन (२०६१–२०७२) को सल्लाहकार, गण्डकी भूमि तथा आवास संघका सल्लाहकार (२०५८–२०७२) भएर काम गरिसकेका छन् ।

प्रकाशित मिति: शुक्रबार, फागुन ४, २०८० १३:३३