गण्डकीमा राजावादी र सहकारीपीडितबाट सुरक्षा चुनौती !

A+ A A-

गत महिना २७ पुसमा पृथ्वीनारायण शाहको ३०२औँ जन्मजयन्तीको अवसरमा आयोजित कार्यक्रममा समर्थकको भिड उर्लियो । राष्ट्र गौरव अभियान नामक संस्थाले आयोजना गरेको त्यो कार्यक्रममा अन्य १२ वटा संस्था सहआयोजक थिए । २६ र २७ पुसमा पृथ्वीनारायण शाहको सालिक स्थापित हुने सम्भावना देखेर रातभर प्रहरी परिचालित थिए ।

पोखराको पृथ्वीचोकमा अहिले प्रथम शहीद लखन थापाको सालिक छ । त्यहाँ पृथ्वीनारायण शाहको सालिक राख्नुपर्ने अभियानसहित राष्ट्र गौरव अभियान आन्दोलित छ । यो अभियानले भविष्यमा गर्न सक्ने गतिविधिमा सशंकित सुरक्षा संयन्त्रले यसलाई गम्भीर चुनौती मानेको छ ।

गत शुक्रबार र शनिबार पोखरामा बसेको गण्डकी प्रदेशस्तरीय सुरक्षा गोष्ठीमा कास्कीका प्रमुख जिल्ला अधिकारी र प्रहरी प्रमुखले यो विषय सुरक्षा चुनौतीको रूपमा राखेका हुन् । यो गोप्य गोष्ठीमा राजावादी, सहकारीपीडितको आन्दोलन पनि अर्को मुख्य चुनौती बनेको विषय उठेको थियो । मिटरब्याजको मुद्दा केही फर्छ्योट हुन बाँकी रहेकाले त्यो पनि समस्या मानिएको छ ।

गण्डकीमा २ हजार ६ सय सहकारी छन् र तीमध्ये सूर्यदर्शन, मित्रमिलन, इमेज, बलिदानीसहित नौवटा सहकारीको ९ अर्ब २६ करोड रकम जोखिममा छ । यी सहकारीको समस्या समाधान नभएको अवस्थामा बचतकर्ताले आन्दोलन अघि बढाउँदा सुरक्षा चुनौती हुने सुरक्षा निकायको अनुमान छ ।

'केही संविधान मान्दिनँ भन्ने, संविधान उल्लंघन गर्छु भन्ने, राजतन्त्र स्थापित गर्छु भन्ने धार्मिक राज्य बनाउँछु भन्ने विविध प्रकृतिका पक्षले एउटा र अर्को अराजक गतिविधि गरिरहेका छन् । यो चुनौतीको एउटा पक्ष छ,' गृहमन्त्री नारायणकाजी श्रेष्ठले गत शनिबार पोखरामा पत्रकारसँग भनेका थिए ।

पोखरामा पृथ्वीनारायण शाहको जन्मजयन्तीमा गत २७ पुसमा आयोजित कार्यक्रमका सहभागी ।

राजावादी र सहकारीसहित प्रहरी संयन्त्रको भौतिक संरचना र प्रहरीको संख्या कम हुँदा पनि समस्या भएको विषय बैठकमा उठेको थियो । चीनसँग सिमाना जोडिएको कोरला नाकामा संरचना बनाउनुपर्ने विषय पनि बैठकमा आएको थियो । 'हाम्रो देशभरको समस्याजस्तै कार्यालयमा आवश्यकताअनुसार कर्मचारी संख्या भएन, दरबन्दीमा पनि भएनन् भन्ने कुरा उठ्यो,' बैठकमा सहभागी सुरक्षा स्रोतले भन्यो, 'अर्को कोरला नाकामा कर्मचारी र भौतिक संरचना नभएको कुरा मुस्ताङतिरबाट आयो ।'

बैठकमा मुख्यमन्त्री सुरेन्द्रराज पाण्डेले प्रहरी समायोजन जतिसक्दो छिटो गरिदिन गृहमन्त्रीसँग आग्रह गरे । गृहमन्त्री श्रेष्ठले आगामी २४ माघमा प्रधानमन्त्रीसहितको राष्ट्रिय सुरक्षा परिषद्को बैठक बसेर समायोजनको विषयलाई अघि बढाउने प्रतिबद्धता जनाए । नाकामा संरचना तयार पार्न र कर्मचारी व्यवस्थापन गर्न संघ सरकार गम्भीर रहेको गृहमन्त्री श्रेष्ठको भनाइ थियो ।

दुई दिनको गोष्ठीमा प्रहरी महानिरीक्षक वसन्तबहादुर कुँवर, सशस्त्र प्रहरी महानिरीक्षक राजु अर्याल, मुख्य अनुसन्धान निर्देशक हुतराज थापा, नेपाली सेना युद्धकार्य विभागका उपरथी प्रेमध्वज अधिकारी, गृह मन्त्रालयका अधिकारीहरू, नेपाली सेनाका प्रतिनिधि, गण्डकी प्रदेशस्तरीय सुरक्षा निकायका प्रमुखहरू, प्रदेशअन्तर्गत सबै ११ जिल्लाका प्रमुख जिल्ला अधिकारी तथा सुरक्षा निकायका प्रमुख सहभागी थिए ।

प्रकाशित मिति: सोमबार, माघ २२, २०८० ०८:२३