पोखराका नगर प्रहरीको ‘डनशैली’– लड्ने भए सिंगलसिंगल आइज

नगर प्रहरी (बायाँ) र प्रहरीले फालिदिएको सामान संकलन गर्दै व्यापारी । तस्वीर : अनुप पौडेल/शिलापत्र

A+ A A-

स्याङ्जाकी कल्पना गुरूङ कोरोना आउनुअघि पोखराको अमरसिंह चोकमा रेष्टुरेन्ट चलाउँथिन् । लकडाउनले व्यवसाय डामाडोल भएपछि उनको परिवारले त्यो रेष्टुरेन्ट छोड्यो । पछिल्लो एक वर्षदेखि उनी फेवाताल किनार लेकसाइडमा चटपटे, पानीपुरी बेच्न थालेकी छन् ।

पोखरा महानगरपालिकाको निरन्तरको ‘टर्चर’ले कल्पनालाई अब हातमुख कसरी जोड्ने भन्ने चिन्ताले सताउन थालेको छ । नगर प्रहरीले फेवाताल किनारलाई व्यवस्थित बनाउने नाममा चटपटे, पानीपुरी बेचेर जीविका चलाइरहेकामाथि देखाइरहेको ‘बल’ले उनीसहितका व्यापारी आजित छन् ।

शनिबार साँझ ६ बजे उनी ताल किनार (हल्लनचोक क्षेत्र)मा भुजा, चाउचाउ, मरमसला लिएर पुगेकी थिइन् । आधा घण्टापछि केही नगर प्रहरी आएर उनको सामान सबै फालिदिए । ‘पुरै एक्सन दिएर लात्तीले हानेर टोकरी नै फालिदिए,’ उनी ताल किनारमा चिच्याउँदै थिइन्, ‘अघि भर्खर मसला ल्याएको, पैसा पनि तिरेको छैन ।’

उनका श्रीमान् पोखरामा एउटा हार्डवेयर पसलको गाडी चलाउँछन् । श्रीमतीले आलु मगाएपछि उनी जरेवरस्थित कोठाबाट साँझ ताल किनार पुगेका थिए । ‘श्रीमतीले आज राम्रै व्यापार गरिछ क्या भनेर आलु लिएर आएको । यस्तो देख्न रहेछ,’ नगर प्रहरीले भूइँभर बनाइदिएको सामानअघि उभिएर उनी बोल्दै थिए ।

गोरखा जौबारीकी मीना नेपाली पोखरा आएको ९ वर्ष भयो । एक वर्षदेखि उनी फेवाताल किनारमा चटपटे, पानीपुरीको व्यापार गर्दै आएकी छन् । शनिबार साँझ नगर प्रहरीले लात्तीले हानेर उनको सामान पोख्न खोज्दै थिए । त्यत्तिमैमा श्रीमान् मनबहादुरले प्रतिकार गरे । आफूविरुद्ध बोलेको भन्दै नगर प्रहरीले उनका श्रीमान्लाई नियन्त्रणमा लियो । ‘टोकरी उचालेर लगेको भए हुन्थ्यो, किन लात्तीले हान्नुभएको भनेर सोध्दा प्रहरीले लिएर गयो,’ मीनाले सुनाइन् ।

उनलाई वडा प्रहरी कार्यालय बैदाममा राखिएको छ । नगर प्रहरीले आफूहरुलाई बुझाएको र नगर प्रहरीले छोड्न भनेपछि उनलाई छोडिने बैदामका डीएसपी राजेन्द्र श्रेष्ठले बताए ।

‘लड्ने भए सिंगलसिंगल आइज’
पर्यटनमैत्री वातावरण बनाउने नाममा पोखरा महानगरपालिका विपन्न र गरिबमाथि निकै निर्मम बनेको छ । अझ नगर प्रहरीले सर्वसाधारणमाथि गर्ने व्यवहार निकै अशोभनीय छ ।

शनिबार साँझ एक जना प्रहरी केही जवानलाई लिएर ताल छेउ पुगेका थिए । उनले त्यहाँ व्यवसायीलाई एक्लाएक्लै भिड्न खुलेआम चुनौती दिइरहेका थिए । कुर्सी फिर्ता गर्न व्यवसायीले आग्रह गर्दा ती प्रहरी त्यत्तिकैमा आक्रोशमा आएर ‘तँ’, ‘बाबु’जस्ता शब्दले होच्याउँदै थिए । ‘म यहीँको लोकल मान्छे हो । धेरै नाटक नगर । सर, एकपटक दिनुस् भने हुन्छ नि । कसैको दादागिरी चल्दैन, लड्ने भए सिंगलसिंगल आइज,’ ती प्रहरीले भनेका छन् । यो अभिव्यक्तिको भिडियो शिलापत्रसँग सुरक्षित छ ।

कसैले छेउबाट भिडियो लिइरहेको थाहा पाएपछि उनी हच्किन्छन् । त्यसपछि भिडियो खिच्न पाइँदैन भन्दै उनी निस्कन्छन् ।

नगर प्रहरी व्यवस्थापन ऐन, २०७५ अनुसार नगर प्रहरीको काम कार्यपालिकाको आदेश कार्यान्वयनमा सहजीकरण गर्ने, सार्वजनिक तथा निजी सम्पत्तिको सुरक्षा, नागरिकलाई न्याय, सुरक्षा तथा व्यवस्थाको प्रत्याभूत, बजार क्षेत्रको प्रभावकारी व्यवस्थापन, विपद् र आकस्मिक घटनाको सम्बोधन, नागरिकको जिउधनको सुरक्षालगायत पर्छन् । तर, नगर प्रहरीले नै कुटपिट गर्ने, धम्क्याउने गरेको दृश्य फेवाताल किनारमा दोहोरिरहन्छ ।

महानगरपालिकाले फेवाताल किनारलाई सौन्दर्यकरण गर्ने योजनाअनुसार साना व्यवसायीलाई हटाउन खोजेको छ । तर, कुनै विकल्प नदिई अमानवीय व्यवहार गरेर विस्थापित गर्न खोजेको भन्दै साना व्यापारी महानगरपालिकासँग असन्तुष्ट छन् ।

प्रकाशित मिति: शनिबार, मंसिर १६, २०८० २०:४४