ब्याजदरमा हस्तक्षेप नगर्ने सरकारी नीति

A+ A A-

तीनदिनभित्र ब्याजदर नघटाए आफैले हस्तक्षेप गर्ने प्रधानमन्त्रीको निर्देशनपछि अर्थमन्त्रीले यसबारे मुख खोलेका छन् । बैंकको ब्याजदर निर्धारणमा सरकारले प्रत्यक्ष हस्तक्षेप नगर्ने भएको छ । व्यवसायीले कर्जाको ब्याजदर उच्च हुँदा व्यवसाय सञ्चालन गर्न समस्या भएको भन्दै हस्तक्षेप गर्न सरकारसँग आग्रह गरेका थिए ।

तर, अर्थमन्त्री डा. युवराज खतिवडाले राष्ट्र बैंकको सहजीकरणमा बैंकर र व्यवसायीले समस्याको समाधान खोज्नुपर्ने भन्दै प्रत्यक्ष हस्तक्षेप नगर्ने बताएको समाचार आजको नयाँ पत्रिकामा प्रकाशित छ ।
त्यस्तै नयाँ पत्रिकाले नेपालमा वन, विदेशमा जान्छ धन शीर्षकमा अर्काे प्रमुख समाचार प्रकाशित गरेका छ । नेपालमा ६ वर्षमा २४ अर्ब ५३ करोडको काठ र फर्निचर आयात भएको छ भने ९३ करोडको मात्र निर्यात भएको समाचारमा उल्लेख छ ।

नयाँ पत्रिकाले घुस प्रकरणपछि राजीनामा दिएका अख्तियार दुरुपयोग अनुसन्धान आयोगका आयुक्त राजनारायण पाठकमाथि अख्तियारले नै छानबिन गर्ने भएको समाचार प्रकाशित गरेको छ । महान्यायाधिवक्ता कार्यालयले सोमबार पाठकमाथि छानबिन गर्न सकिने राय दिएपछि अख्तियारलाई सहज भएको हो । यसअघि अख्तियार अलमलमा थियो ।

गोर्खा भर्तीबारे प्रतिनिधि सभाको अन्तर्राष्ट्रिय सम्बन्ध समितिले दिएको निर्देशनबारे नयाँ पत्रिकाले सम्पादकीय लेखेको छ । गोर्खा भर्तीबारे समितिको अर्घेलो शीर्षकमा सम्पादकीय छ भने डा. प्रकाशचन्द्र लोहनीले लेखेको सरकारको निराशाजनक एक वर्ष शीर्षकमा लेख प्रकाशित छ ।

प्रकाशित मिति: मंगलबार, फागुन ७, २०७५ १७:४४