सैनिक कानुन, सेनापतिले मात्र जानून्

A+ A A-

आजको नयाँ पत्रिकाले नेपाली सेनाभित्र प्रधानसेनापतिको कामका बारेमा प्रमुख समाचा प्रकाशित गरेको छ । प्रधानसेनापति मात्र होइन, सेनाको माथिल्लो दर्जाका अधिकृतले पनि कागजपत्र किर्ते गरेको विषय पटकपटक उठ्ने गरेको छ । तर, कारबाही हुने–नहुने प्रधानसेनापतिको विवेकमा भर पर्दै आएको समाचारमा उल्लेख छ । आफूनिकटलाई नियम मिचेर पनि अवसर दिने, अरूलाई त्यही अस्त्र देखाएर कारबाही गर्ने, राजीनामाका लागि बाध्य पार्ने काम हुँदै आएको छ ।
त्यस्तै नयाँ पत्रिकाले घुस प्रकरणमा मुछिएपछि शुक्रबार राजीनामा दिएका अख्तियार दुरुपयोग अनुसन्धान आयोगका पूर्वआयुक्त राजनारायण पाठकमाथिको कारबाही अन्योलमा परेको समाचार प्रकाशित गरेको छ । सरकारले उनीमाथि छानबिन गर्न चासो दिएको छैन भने अख्तियार अलमलमै छ । आयोगका पदाधिकारीबीच आइतबार पाठकमाथि कसरी अनुसन्धान गर्ने भन्ने विषयमा अनौपचारिक छलफल भएको छ । कुनै पनि विषयमा विस्तृत छानबिन गर्न आयोगको बोर्ड बैठकले निर्णय गर्नुपर्ने हुन्छ । ‘हामीमाथि धेरै दबाब रहेको बुझेका छौँ,’ आयोगका एक उच्च अधिकारीले भने, ‘यो हप्ताभित्र केही निर्णय हुन्छ ।’

मेलम्ची सक्न नयाँ टेन्डर माग्ने सरकारको तयारीबारे पहिलो पृष्ठमा समाचार प्रकाशित छ । मेलम्ची खानेपानी आयोजनाले बाँकी काम सम्पन्न गर्न एक साताभित्रै नयाँ टेन्डर आह्वान गर्ने भएको छ । अब गरिने टेन्डर कामको प्रकृतिअनुसार फरक–फरक हुनेछन् । सबै कामका लागि एक मात्रै टेन्डर गर्दा प्रक्रिया लामो र कामसमेत ढिलो हुने भएकाले एकभन्दा बढी टेन्डर आह्वान गर्ने आयोजनाको तयारी रहेको समाचारमा छ ।
नयाँ पत्रिकाले वाइडबडी, वाइड लाज शीर्षकमा सम्पादकीय लेखेको छ भने रोशन जनकपुरीले लेखेको फागुन ७, पुरातन मोह र राज्य शीर्षकको लेख प्रकाशित गरेको छ । सेनाका लागि संसदीय निगरानीको खाँचो शीर्षकमा जनकराज जोशीको लेख पनि प्रकाशित छ ।

प्रकाशित मिति: सोमबार, फागुन ६, २०७५ १८:००