प्रकाश महत भन्छन्– पार्टीको यत्रो मेनस्ट्रिमलाई बाहिर राखेर आयोगले चुनावको कल्पना गर्ने ? (अन्तर्वार्ता)

दिपेन्द्र अधिकारी शुक्रबार, माघ २, २०८२

A+ A A-

निर्वाचन आयोगले नेपाली कांग्रेसको आधिकारिकताको निर्णयमा फैसला दिएको छ । विशेष महाधिवेशनबाट सभापति निर्वाचित गगन थापाको कार्यसमितिलाई निर्वाचन आयोगले शुक्रबार अद्यावधिक गर्ने निर्णय गर्‍यो । योसँगै कांग्रेसको साविकको संस्थापनपक्ष उग्र बनेको छ । यो समूहले कानुनी र राजनीतिक लडाइँ लड्ने उद्घोष गरेको छ । यसै सन्दर्भमा शिलापत्रले कांग्रेसका तत्कालीन कार्यसमितिका प्रवक्ता डा. प्रकाशशरण महतसँग गरेको कुराकानीको सम्पादित अंश:

०००

आयोगको निर्णय आयो, यसलाई लिएर तपाईंको प्रतिक्रिया के छ ?

संविधान, हाम्रो पार्टीको विधान, निर्वाचनसम्बन्धी नियमावली र पहिलाको नजिरको पूरै बर्खिलापमा छ । षड्यन्त्रमूलक तरिकाबाट यो आएको छ । हामीलाई यो आशंका लागिरहेको थियो । कुनै पनि कोणबाट यो ठीक छैन, गलत हो । यसलाई हामीले मान्दैनौँ । आधिकारिक कांग्रेस हामी नै हो । यससम्बन्धनमा हामी राजनीतिक, कानुनी र सबै खाले लडाइँ लड्छौँ र सबैखाले निर्णयलाई अस्वीकार गर्छौं ।

कानुनी बाटो त खुला छ । तर, निर्णय गलत छ भन्ने आधार के छ ?

आधार किन छैन ? हजारौँ आधार छन् । यो ठाडो उल्लंघन हो । अहिलेसम्म निर्वाचन आयोगले यस्तो किसिमको पार्टीभित्रको विवादको निर्णय गरेको छ, त्यसको ठाडो बर्खिलाप छ । केन्द्रीय समितिको निर्णयबिना कुनै पनि विशेष अधिवेशन वा अधिवेशन हुनै सक्दैन । त्यसको सनाखत केन्द्रीय समितिको निर्णयबिना हुनै सक्दैन, जसले विशेष अधिवेशन भन्यो, उसैले आफैँ निर्णय गर्न मिल्छ ? भाग लिएको भनेर देखाइएका प्रतिनिधिहरू फेक छन् । ८ सयभन्दा माथिले निवेदन पेस गरेका छन् ।

पार्टी नेतृत्वलाई औपचारिक रूपमा बोलाइएको छैन । बोलाउने प्रावधान छ । हामी आफैँ जाँदा हाम्रा कुरा सुनिएको हो । उनीहरूलाई कुरा गर्न पटकपटक मौका दिइएको छ । पहिल्यै बन्दोबस्त मिलाएर, योजना मिलाएर, गन्तव्यमा पुग्ने योजना अन्तर्गत यो भएको हो ।

सबै लडाइँ लड्ने भनेपछि चुनावी तालिका त प्रभावित हुने भयो नि ?

चुनाव होस् । तर, यत्रो पार्टीको मेनस्ट्रिमलाई बाहिर राखेर निर्वाचन आयोगले चुनावको परिकल्पना गर्ने ? यो लोकतान्त्रिक प्रक्रिया, विधिको ठाडो उल्लंघन गर्ने ? धज्जी उडाउने ? यो पूरै अस्वीकार्य छ । राजनीतिक, कानुनी र वैधानिक लडाइँ हामी लड्छौँ । षड्यन्त्रमूलक निर्णयलाई हामी ठाडै अस्वीकार गर्छौं ।

अब पार्टीमा छलफल पनि होला । शेरबहादुर देउवासहितका नेताहरूसँग छलफल कहिले गर्नुहुन्छ ?

छलफल गर्छौं । तत्कालै केन्द्रीय समिति बैठक पनि बस्छौँ । हामी निर्णयलाई ठाडै अस्वीकार गर्छौं । आधिकारिक कांग्रेस शेरबहादुर देउवा नेतृत्वको हो ।

प्रकाशित मिति: शुक्रबार, माघ २, २०८२ २०:५४

दिपेन्द्र अधिकारी

प्रतिक्रिया दिनुहोस्