इन्द्रजात्रा अवलोकनमा प्रधानमन्त्री आए, स्वागतमा बालेन किन आएनन् ?

शिलापत्र संवाददाता मंगलबार, असोज १, २०८१

A+ A A-

गत वर्ष इन्द्रजात्रा सुरु भएको विषयमा आयोजित पत्रकार सम्मेलनमा काठमाडौं महानगरपालिकाका प्रमुख बालेन्द्र शाह (बालेन) ले इन्द्रजात्रालाई विश्वव्यापी बनाउने प्रयास गरेको बताएका थिए । यसैका लागि भन्दै विभिन्न देशका नगरप्रमुखलाई बोलाइएको थियो ।

काठमाडौं उपत्यकावासीले खास महत्त्व दिएर मनाउने इन्द्रजात्रालाई बालेनले पनि निकै प्राथमिकता दिएको देखिन्थ्यो । तर, यसपालि उनी काठमाडौंको वसन्तपुरमा इन्द्रजात्राको भव्य समारोहमा देखिएनन् ।

प्रधानमन्त्री केपी ओलीसँग ‘इगो’का कारण बालेनले यसपल्टको इन्द्रजात्रा छलेको चर्चा छ । मेयर बालेन पछिल्लो एक सातादेखि भारतको बैंगलोरमा छन् । इन्द्रजात्रामा प्रधानमन्त्रीलाई स्वागत गर्नुपर्ने उनी त त्यहाँ देखिएनन् नै, उनको तस्वीर अंकित टिसर्ट लगाएका युवाहरूलाई समेत प्रहरीले धपाएको देखियो । केही हप्ताअघि गौरा पर्वको कार्यक्रममा प्रधानमन्त्री ओली र कांग्रेस सभापति शेरबहादुर देउवाविरुद्ध नाराबाजी भएको थियो । इन्द्रजात्रामा पनि त्यस्तै अवरोध र विरोध हुन सक्ने आशंकामा प्रहरीले कार्यक्रम सुरु हुनुभन्दा अगाडि नै युवाहरूलाई रोकेको बताइएको छ ।

परम्पराअनुसार, काठमाडौं महानगरले वसन्तपुरमा आयोजना गर्ने इन्द्रजात्राको विशेष समारोहमा सहभागी हुन प्रधानमन्त्रीका रूपमा ओली दिउँसो सवा २ बजे वसन्तपुर पुगे । उनलाई त्यहाँ उपप्रमुख सुनिता डंगोलसहित वडाध्यक्षहरूले स्वागत गरे । यसअघि प्रधानमन्त्रीसहित उच्चपदस्थको स्वागतमा मेयर पनि देखिने गर्थे । यो कार्यक्रम अवलोकन गर्न प्रधानमन्त्री मात्र होइन, राष्ट्रपति, सभामुखलगायत उच्च पदस्थ व्यक्तिहरू पुग्ने गर्छन् ।

किन आएनन् मेयर बालेन ?

बालेनको सचिवालयका अनुसार, भारतमा आफू पढेको क्याम्पसका पूर्वविद्यार्थीले आयोजना गरेको कार्यक्रममा सहभागी हुन मेयर बालेन त्यहाँ पुगेका हुन् । र, उनी आजभोलिमै काठमाडौं फर्किने प्रमुख स्वकीय सचिव भूपदेव शाहले जानकारी दिए ।

बालेनकै अर्का एक सहयोगीका अनुसार, आफूले गलत भनेका ओलीलाई हात जोडेर स्वागत गरी मञ्चमा सँगै बस्न नचाहेकाले बालेन इन्द्रजात्रा छोडेर भारतमा बसेका हुन् । ‘इन्द्रजात्राप्रति उहाँको अनिच्छा वा अरुचि होइन,’ ती सहयोगीले भने, ‘कलेजकै कार्यक्रम हुँदा पनि इन्द्रजात्राभन्दा त्यो महत्त्वपूर्ण हुँदैनथ्यो । प्रधानमन्त्री ओलीसँग एकै मञ्चमा बस्न नचाहेकैले उहाँ अहिले काठमाडौंमा हुनु हुन्न ।’

उनका अनुसार, मेयर बालेनले आफ्नो टिमका सदस्यसँग यसबारे भारत जानुअघि नै भनेका थिए ।

करिब डेढ वर्षयता मेयर बालेनले फेसबुकमार्फत एमाले अध्यक्ष एवं हालका प्रधानमन्त्री ओलीको आलोचना गर्दै आएका छन् । पार्किङ, सुकुम्बासी, फोहोर व्यवस्थापनलगायतमा एमालेबाट सहयोगको साटो अवरोध भएको बालेन ठान्छन् । केही दिनअघि शिलापत्रसितको संवादमा बालेनका प्रमुख स्वकीय सचिव भूपदेव शाहले ओलीकै आदेशमा काठमाडौं महानगरमा वडाध्यक्षहरूबाट संगठित असहयोग भएको बताएका थिए ।

पछिल्लो समय गिरीबन्धु टी–इस्टेटमा नीतिगत भ्रष्टाचार भएको भनी सर्वोच्च अदालतले गरेको फैसला देखाउँदै बालेनले ओलीतिर औँला ठड्याएका थिए । न्युरोडमा पार्किङसम्बन्धी विवाद हुँदा पनि बालेनले फेसबुकमार्फत ओलीलक्षित स्टाटसहरू लेखे । ओलीले पनि सार्वजनिक मञ्चमार्फत बालेनको आलोचना गरे । पार्किङको लफडापछि खोला किनारको मापदण्डसम्बन्धी सर्वोच्च अदालतको परमादेश, एमाले लुम्बिनी प्रदेश सांसद रेखा शर्मामाथि लागेको बाल श्रमशोषणको मुद्दालगायतमा बालेनले प्रधानमन्त्री ओलीलाई निसाना बनाए । उनका पछिल्ला सात स्टाटस प्रधानमन्त्री ओलीलक्षित नै छन् । केही दिनअघि बालेन समर्थकले ओलीको फेसबुक पेजमा अनफलो अभियान चलाएका थिए ।

व्यक्तिगत ‘इगो’का कारण मेयरले देशका प्रधानमन्त्री सहभागी भएको इन्द्रजात्रा नै बहिष्कार गरेको प्रति काठमाडौंका वडाध्यक्षहरू आक्रोशित बनेका छन् । ‘आशा गरौँ, प्रधानमन्त्री केपी ओलीलाई नमस्कार गर्नुपर्छ भनेरै मेयरले इन्द्रजात्रा छल्न खोज्नुभएको होइन । यसो हो भने उहाँले गम्भीर भुल गर्नुभयो । केही विषयमा असहमति त हाम्रो पनि छमेयरसँग, हुन्छ नि,’ एक वडाध्यक्षले भने, ‘के हामीले अब मेयर सहभागी हुने कार्यक्रम नै बहिष्कार गर्दै हिँड्ने हो ?’

ओली एमालेका अध्यक्ष मात्र नभएर देशका प्रधानमन्त्रीसमेत भएको उनको भनाइ छ । ‘विमति भएका विषयमा प्रक्रियासंगत कुरा राख्ने विकल्प छ । यसरी बहिष्कार गर्ने संस्कृति भोलि उहाँ (मेयर)कै लागि पनि प्रत्युत्पादक हुन सक्छ ।’ उनले इन्द्रजात्राको समारोह सफल पार्न आफूहरू लागिपरेको बताए ।

मेयर बालेनको सचिवालयका एक सदस्यले भने प्रधानमन्त्री ओलीले पनि आफ्नो पदअनुसार व्यवहार नगरेको आरोप लगाए । ‘उहाँले पनि सार्वजनिक कार्यक्रममा मेयरको आलोचना गर्नुभएको छ । मेयरले उठाएको विषयको गम्भीरता बुझ्ने प्रयास गर्नुको साटो परपरैबाट पन्छाउन खोज्नुभएको छ,’ ती सदस्यले भने, ‘योचाहिँ राम्रो संस्कृति हो त ? यसलाई चाहिँ असल अभिभावकत्व भनिन्छ त ?’

प्रकाशित मिति: मंगलबार, असोज १, २०८१ १५:५०

शिलापत्र संवाददाता

प्रतिक्रिया दिनुहोस्